Tauloto Mai Te Kufaki O Ieova Mo Iesu

“Ke mafaufau ki te kufaki o te ‵tou Aliki e pelā me ko te fakaolataga.”—2 PETELU 3:15.

KA TALI MAI PEFEA NE KOE?

Ne fakaasi mai pefea ne Ieova me i a ia e loto kufaki?

Kaia ne ‵tau ei o kufaki a Iesu mō se taimi leva ‵ki?

Ne a lasaga e mafai o fai ne tatou ke fakamalosi aka a te loto kufaki?

1. Se a te mea e fesili mai ki ei a nisi tino fakamaoni?

NE FESILI mai mo te loto maulalo se tuagane telā ne kufaki i mea faiga‵ta e uke i se fia sefulu tausaga, E mata, “ka lavea ne au te gataga a koi tuai au o mate?” A nisi tino kolā ko leva ne tavini ki a Ieova ne mafau‵fau foki penā. E fakamoe‵moe eiloa tatou ki te aso telā ka faka‵fou ei ne te Atua a mea katoa kae ave keatea a fakalavelave kolā e fe‵paki nei mo tatou. (Fakaasiga 21:5) E ui eiloa e uke a pogai e tali‵tonu ei tatou me i te gataga o te fakanofonofoga a Satani ko pili ‵ki mai, e mafai eiloa o faigata ke faka‵tali mo te kufaki ki te aso tenā.

2. Ne a fesili e uiga ki te kufaki ka mafau‵fau tatou ki ei?

² E tigā te feitu tenā, e fakaasi mai i te Tusi Tapu me e ‵tau o maua ne tatou a te kufaki. E pelā mo tavini a Ieova mai mua atu i a tatou, ka maua eiloa ne tatou a te mea telā ne tauto mai ei a Ieova māfai e ma‵losi ‵tou fakatuanaki kae faka‵tali mo te kufaki ki te taimi tonu ka fakataunu ei ne ia a folafolaga konā. (Faitau te Epelu 6:11, 12.) Ne kufaki eiloa a Ieova. Ne mafai fua o fakagata ne ia amioga ma‵sei i so se taimi, kae e faka‵tali eiloa a ia ki te taimi tonu. (Loma 9:20-24) Kaia e kufaki katoa ei a ia penei? Ne fai pefea a Iesu mo fai se fakaakoakoga o te kufaki? Ne a mea aoga ka maua ne tatou māfai e ati aka ne tatou a te kufaki? A tali ki fesili konei e mafai o fesoasoani mai ki a tatou ke ati aka te kufaki mo te fakatuanaki malosi, māfai foki loa e foliga mai me e tai tuai a Ieova.

KAIA E FAKAASI MAI EI NE IEOVA A TE KUFAKI?

3, 4. (a) Kaia ne fakaasi mai ei ne Ieova a te kufaki i te fakataunuga o tena fuafuaga mō te lalolagi? (e) Ne saga atu pefea a Ieova ki te ‵tekeatuga i Etena?

³ E isi ne pogai ‵lei e fakaasi mai ei ne Ieova a te kufaki. Se mea tonu me e pule kātoatoa atu a ia ki te lagi mo te lalolagi i taimi katoa; kae koi faka‵sae aka eiloa ne te ‵tekeatuga i Etena a fesili kolā e tāua ki tino katoa i te lagi mo te lalolagi. Ne kufaki eiloa a Ieova, me e iloa ne ia me e ‵tau o lava ‵lei te taimi ke tali faka‵lei aka ei a fesili konā. Ona ko te mea e iloa ‵lei ne ia a mea e fai kae mafau‵fau ki ei a tino taki tokotasi i te lagi mo te lalolagi, e mautinoa ‵lei me e fai eiloa ne ia te ‵toe mea ‵lei mō tatou.—Epelu 4:13.

⁴ Ko te fuafuaga eiloa a Ieova ke faka‵fonu ne fanau a Atamu mo Eva a te lalolagi. I te taimi ne fakaloiloi ei ne Satani a Eva kae fakamuli ifo ne sē fakalogo a Atamu, ne seki tiaki ne te Atua a tena fuafuaga. Ne seki polepole a ia, sonafai a fakaikuga, io me fai a mea e aunoa mo te mafaufau, ko sē fia saga mai ei ki te kau kāiga o tino. I lō te fai penā, ne ‵sala ne ia se auala ke fakataunu ei a te mea telā ne fuafua ne ia mō tino mo te Lalolagi. (Isaia 55:11) Ke fakataunu a tena fuafuaga kae fakamaluga aka tena pulega, ne lasi ‵ki eiloa te loto pulea mo te kufaki o Ieova, kae ne faka‵tali foki a ia i te fia afe tausaga ko te mea ke ga‵lue a nisi vaega o tena fuafuaga i te ‵toe auala ‵lei.

5. Se a te fakamanuiaga e mafai o maua mai te kufaki o Ieova?

⁵ A te suā pogai ne faka‵tali ei a Ieova mo te kufaki ko te mea ke tokouke atu a tino e mafai o maua a te ola se-gata-mai. I te taimi nei, e fai ne ia a fakatokatokaga ke ‵sao “se vaitino tokouke.” (Fakaasiga 7:9, 14; 14:6) E oko atu a Ieova ki tino e auala i te ‵tou galuega talai, o ‵kami mai latou ke tauloto e uiga ki tena Malo mo ana tulaga amio‵tonu. A te fekau o te Malo ko te ‵toe tala tafasili i te ‵lei e ‵tau o maua ne tino—ao, a te mea tenā ko te “tala ‵lei.” (Mataio 24:14) A tino taki tokotasi kolā e ‵futi mai ne Ieova e fai mo vaega o se fakapotopotoga o taugasoa ‵tonu kolā e a‵lofa ki te mea tonu i te lalolagi kātoa. (Ioane 6:44-47) E fesoasoani atu te ‵tou Atua alofa ki vaegā tino penā ke maua a tena taliaga. Ko oti foki ne filifili ne ia mai tino a sui fakamaoni o tena malo faka-te-lagi. I te taimi e ‵nofo ei i olotou tulaga faka-te-lagi, ka fesoasoani mai latou ki tino faka‵logo ke oko atu ki te tulaga ‵lei kātoatoa mo te ola se-gata-mai. Tela la, a koi faka‵tali a ia mo te kufaki, ko oti ne galue a Ieova ke fakataunu ana tautoga—mō te ‵lei o tatou.

6. (a) Ne fakaasi mai pefea ne Ieova a te kufaki i aso o Noa? (e) E fakaasi mai pefea ne Ieova a te kufaki i ‵tou aso nei?

⁶ E kufaki eiloa a Ieova faitalia te ma‵sei o pati fakaitaita e fai atu ki a ia, e pelā mo ana faifaiga ne fai ki amioga ma‵sei mai mua o te Lolo. Ne ‵fonu te lalolagi i te taimi tenā i amioga sē ‵tau kae fakasauā, kae ‘ko oko eiloa i te fanoanoa’ o Ieova ona ko te masei o te tulaga o te tagata. (Kenese 6:2-8) Ne sē talia ne ia ke tumau a te tulaga masei tenā ke oko ki te se-gata-mai, tenā ne fakaiku ei ne ia ke aumai se lolo ke fakaseai atu a tino sē faka‵logo. A koi “faka‵tali ei te Atua mo te kufaki i aso o Noa,” ne fai ne Ieova a fakatokaga ke ‵sao a Noa mo tena kāiga. (1 Petelu 3:20) I te taimi tonu, ne fai atu ne Ieova ki a Noa a te fakaikuga tenei kae fai atu ki tou tagata ke faite se vaka. (Kenese 6:14-22) E se gata i ei, a Noa se “tino talai o te amiotonu,” e fakailoa atu ki ana tuakoi e uiga ki te fakamaseiga telā ko pili o tupu. (2 Petelu 2:5) Muna a Iesu me e ‵pau eiloa ‵tou taimi nei mo aso o Noa. Ko oti ne fakaiku aka ne Ieova a te taimi ka aumai ei ne ia te gataga ki te olaga masei tenei. E seai se tino e iloa ne ia “te aso mo te itula” ka oko mai ei. (Mataio 24:36) I te taimi nei, e isi se galuega ne tuku mai ne te Atua ki a tatou, ko te fakailoatuga ki tino a te auala e mafai ei o ‵sao latou.

7. E mata, e tuai a Ieova o fakataunu ana fuafuaga? Fakamatala mai.

⁷ E manino ‵lei me e se fakauiga te kufaki o Ieova ki te faka‵tali fua ke ‵seke atu a taimi. Ikai, e se ‵tau lele eiloa o faka‵numi ne tatou a tena kufaki mo te sē fia saga mai! A te tonuga loa, se mea faigata ke masaua a te mea nei i te taimi e gasolo aka ei tatou o ma‵tua io me tigāina i te olaga masei tenei. E mafai loa o loto vāi‵vai tatou io me ma‵natu aka i te Atua e tuai o fakataunu ana fuafuaga. (Epelu 10:36) Ke mo a eiloa e puli me e isi ne pogai ‵lei e kufaki ei a ia kae e fakaaoga ne ia a te fakatalavega tenei mō te ‵lei o ana tavini a‵lofa fakamaoni. (2 Petelu 2:3; 3:9) Ke mafaufau foki ki te auala ne fakagalue ei ne Iesu a te kufaki.

NE FAI PEFEA A IESU MO FAI SE FAKAAKOAKOGA ‵LEI O TE KUFAKI?

8. Ne a fakanofonofoga ne fakaasi mai ei ne Iesu a te kufaki?

⁸ E fai ne Iesu a te loto o te Atua kae ne fai ne ia mo te loto finafinau i te fia afe tausaga. I te taimi ne ‵teke atu ei a Satani, ne fakaiku aka ne Ieova ke fanaifo a tena Tama fagasele e tokotasi ki te lalolagi e pelā me se Mesia. Mafaufau ki lagonaga o Iesu—ke faka‵tali mo te kufaki i te fia afe tausaga ke oko ki te taimi tonu. (Faitau te Kalatia 4:4.) Ne seki sagasaga fua a ia o faka‵tali i te taimi kātoa tenā; ne fakalavelave malosi a ia i te galuega telā ne tuku atu ne tena Tamana ki a ia. I te taimi ne fanaifo ei a ia ki te lalolagi, ne iloa ne ia me e ‵tau o mate a ia i lima o Satani, e pelā mo te mea ne ‵valo mai. (Kenese 3:15; Mataio 16:21) Ne fai eiloa ne ia mo te kufaki a te loto o te Atua, faitalia me ka logo‵mae a ia i se ‵mae tigāina. A tena alofa fakamaoni ko te ‵toe vaega maluga eiloa. Ne seki saga atu a ia ki a ia eiloa mo tena tulaga, kae e mafai o maua ne tatou a mea aoga mai i ei.—Epelu 5:8, 9.

9, 10. (a) Ne a mea ne fai ne Iesu a koi faka‵tali a ia mo te kufaki ke gasuesue a Ieova? (e) E ‵tau o ‵kilo atu pefea tatou ki te fakasologa o taimi o Ieova?

⁹ Mai tua o tena toetuakaga, ne maua ne Iesu a pulega i te lagi mo te lalolagi. (Mataio 28:18) E fakaaoga ne ia te pulega tenā ke fakataunu te fuafuaga a Ieova e ‵tusa mo te fakasologa o taimi telā ko oti ne fakatoka ne te Atua. Ne faka‵tali a Iesu mo te kufaki i te feitu fakaatamai o te Atua ke oko eiloa ki te 1914, i te taimi ka tuku atu ei ana fili ke fai mo mea e tuku ei ana vae. (Salamo 110:1, 2; Epelu 10:12, 13) Ko pili fua o gasuesue a ia o aumai te gataga ki te fakanofonofoga a Satani. I te vaitaimi nei, e galue eiloa a Iesu mo te kufaki fakatasi mo tino kae ‵taki atu latou ki “vai o te ola.”—Fakaasiga 7:17.

¹⁰ E mata, e lavea ne koe i te fakaakoakoga a Iesu a te auala e ‵tau ei koe o kilo atu ki fakasologa o taimi a Ieova? E seai se fakalotolotolua me ne loto finafinau a Iesu o fai so se mea e fakamolemole atu tena Tamana ki a ia, kae koi loto fiafia eiloa a ia o faka‵tali ki te taimi o te Atua. A koi faka‵tali tatou ki te gataga o te fakanofonofoga masei a Satani, e manakogina ne tatou katoa a te kufaki. E manakogina ke faka‵tali tatou ki te takitakiga a te Atua kae ke sē ‵fiu ona ko tatou ko loto vāi‵vai. Ne a mea e mafai o fai ne tatou ke ati aka se vaegā kufaki penā?

E ATI AKA PEFEA NE AU A TE KUFAKI O TE ATUA?

11. (a) I te auala fea e isi ei se sokoga i te va o te fakatuanaki mo te kufaki? (e) Kaia e maua ei ne tatou a pogai tāua e ‵tau ei o ma‵losi ‵tou fakatuanaki?

¹¹ A koi tuai o fanaifo a Iesu ki te lalolagi, ne tuku mai ne pelofeta mo nisi tavini fakamaoni se fakaakoakoga ki te auala e mafai ei ne tino sē ‵lei kātoatoa o kufaki. Ne isi se sokoga tonu i te va o te lotou fakatuanaki mo te lotou kufaki. (Faitau te Iakopo 5:10, 11.) Moi fai ne seki tali‵tonu latou ki mea kolā ne fai atu ne Ieova ki a latou—moi fai ne seki lava te lotou fakatuanaki—e mata, ka faka‵tali eiloa latou mo te kufaki ki te fakataunuga o ana tautoga? I taimi katoa, ne fetaui eiloa latou mo tofotofoga fakama‵taku io me faiga‵ta o te lotou fakatuanaki, ne tali‵tonu latou me ka fai fakamuli ne te Atua a mea kolā ne tauto mai a ia ki ei. (Epelu 11:13, 35-40) E uke atu pogai e ‵tau ei o ma‵losi ‵tou fakatuanaki, me i a Iesu ko galue nei e pelā me ko te “Tino telā e fakakatoatoa ne ia ‵tou fakatuanaki.” (Epelu 12:2) Ne fakataunu ne ia te valoaga kae fakaasi mai a fuafuaga a te Atua i se auala telā e tuku mai ei a pogai tāua e ‵tau ei o fakatuanaki tatou.

12. Ne a mea e mafai o fai ne tatou ke ati aka ‵tou fakatuanaki?

¹² Ne a lasaga tāua e mafai o fai ne tatou ke fakama‵losi aka ‵tou fakatuanaki, kae ati aka i ei a ‵tou loto kufaki? A te kī ko te fakagalue aka ne tatou o fakatakitakiga a te Atua. Pelā me se fakaakoakoga, mafaufau ki pogai e fakamuamua ei ne koe te Malo i tou olaga. E mata, e mafai ne koe o momea aka au taumafaiga ke fakagalue a te fakatakitakiga i te Mataio 6:33? Ko tena uiga e ‵tau o uke a taimi e fakamāumāu i te galuega talai io me fai a ‵fuliga ke fakafaigofie te vaegā olaga e ola ei koe. Ke mo a e mafaufau koe me ne seki fakamanuia ne Ieova au taumafaiga ke oko mai eiloa ki te taimi nei. E se taumate ne fai ne ia ke mafai ne koe o fai se akoga faka-te-Tusi Tapu fou io me ne fesoasoani atu ke maua ne koe a “te filemu o te Atua telā e sili fakafia atu i mea katoa.” (Faitau te Filipi 4:7.) I te saga atu ki mea aoga kolā ne maua koe mai te tautali i fakatonuga a Ieova, ka iloa aka i ei ne koe me e ‵lei atu ke kufaki koe.—Salamo 34:8.

13. Ka fakamatala atu pefea ne tatou a te atiakaga o te fakatuanaki mo te loto kufaki?

¹³ A te faiga tenei e tai ‵pau mo te tamilosaga o te natula i te fakamalūga o te laukele, ‵tokiga o fuaga, mo te ‵tauga o fuataga. I taimi takitasi e tau ei ne te tino ‵toki lakau a fuataga e uke, ko te momea aka o tena loto talitonu ki te ‵tokiga o fuaga i te suā taimi. E tonu, kae e ‵tau o faka‵tali a ia mo te kufaki ke oko ki te taimi e tau ei te taukai, kae ka sē taofi aka a ia ne te mea tenā mai te ‵tokiga o fuaga, ke oko foki ki te ‵tokiga o fuaga i laukele e uke atu i lō te taimi muamua. E talitonu a ia me ka tau ne ia a fuataga. I se auala tai ‵pau, kafai e tauloto tatou ki fakatakitakiga a Ieova, tau‵tali i ei, kae oti aka ko tau ei ne tatou a mea aoga, a ‵tou tali‵tonu ki a Ieova e gasolo aka eiloa ki luga. A ‵tou fakatuanaki ka gasolo aka eiloa ki luga, kae ko faigofie foki ke faka‵tali tatou ki fakamanuiaga kolā e iloa ne tatou me ka oko mai eiloa.—Faitau te Iakopo 5:7, 8.

14, 15. Se a te kilokiloga e ‵tau o maua ne tatou e uiga ki logo‵maega o tino?

¹⁴ A te suā auala e ati aka ei a te loto kufaki ko te mafaufau ki te auala e ‵kilo atu ei tatou ki te lalolagi mo ‵tou fakanofonofoga totino. Taumafai ke kilo atu ki mea e pelā mo Ieova. Pelā me se fakaakoakoga, mafaufau me e kilo atu pefea a ia ki logo‵maega o tino. Ko leva ne ‵mae a ia i te taimi ne logo‵mae ei a tino; e ui i ei, ne seki takavale a ia i te fanoanoa, ko sē mafai ei o fai se mea ‵lei. Ne uga mai ne ia tena Tama fagasele e tokotasi “ke lepe ne ia a galuega a te Tiapolo” kae fakaseai a fakamaseiga katoa ne aumai ne Satani ki luga i tino. (1 Ioane 3:8) A te tonuga loa, ka fakatalitonu mai i ei me i logo‵maega ne mea fua e se tumau, kae ko te faka‵leiga a te Atua e tumau ki te se-gata-mai. E penā foki loa, i lō te talia ne tatou a te masei o te pulega a Satani ke fakavāivāi mai io me sē lava te kufaki e uiga ki te taimi ka gata atu i ei, ke na fakatuanaki tatou ki mea e se lavea kolā ka tumau ki te se-gata-mai. Ko oti ne fakatoka ne Ieova se tapulā fakapito mō amioga ma‵sei, kae ka gasuesue eiloa a ia i te taimi tonu.—Isaia 46:13; Nauma 1:9.

¹⁵ I aso fakaoti kae faiga‵ta o te olaga tenei, kāti ka fe‵paki tatou mo mea faiga‵ta fakapito ki ‵tou fakatuanaki. I lō te tali atu mo te kaitaua māfai e fakasauagina tatou io me ko ‵tou tino pele e logo‵mae, e manakogina ke tali‵tonu kātoatoa tatou ki a Ieova. A tatou ne tino sē ‵lei kātoatoa, tela la, e se faigofie ke fai a te mea tenā. Masaua a mea ne fai ne Iesu, e pelā mo te mea e tusi i te Mataio 26:39.—Faitau.

16. Se a te mea e se ‵tau o fai ne tatou i taimi konei koi ‵toe?

¹⁶ A te mea telā e fakalavelave mai ki te fakaasiatuga ne tatou o te kufaki ko te uiga masani ko te faka‵tali ke onoono aka. Se a te uiga o te mea tenā? Ko ‵lei la, a te tino telā e se lava tena loto talitonu me i te gataga ko pili mai kāti ka kamata o fai ne ia se fakatokaga tai ‵kese, e se iloa la e se taunu a mea kolā ne fai mai a Ieova e uiga ki ei. I nisi tugāpati, e mafai a ia o mafaufau aka penei, ‘Au ka faka‵tali kae onoono aka me ko Ieova e tonu eiloa mo ana pati io me ikai.’ Kāti e taumafai tou tagata ke fai se igoa ‵lei mō ia i te lalolagi nei, ke ‵sala atu ki te tokagamalie i mea tau tupe i lō te fakamuamua o mea o te Malo, io me ko te talitonu ki akoakoga ma‵luga ke maua se olaga nofogamalie i te taimi nei. E mata, a mea konā e se ko te fakamaoniga o te sē lava o te fakatuanaki? Masaua me ne fakamalosi mai a Paulo ke fakaakoako atu tatou ki tino fakamaoni kolā ne maua ne latou a folafolaga mai i a Ieova “e auala i te fakatuanaki mo te kufaki.” (Epelu 6:12) Ko oti ne fakaiku aka ne Ieova ke fakaseai a te lalolagi masei tenei, kae ka sē tuai eiloa a ia. (Sapakuka 2:3) Ke oko atu ki te taimi tenā, ke mo a ma ‵pafu tatou i te faiga o ‵tou taviniga ki a Ieova. I lō te fai penā, e ‵tau o tumau tatou i te matapula‵pula kae ga‵lue malosi i te talaiatuga o te tala ‵lei, te māfuaga o te lotomalie kātoatoa i te taimi eiloa tenei.—Luka 21:36.

NE A FAKAMANUIAGA E AUMAI NE TE LOTO KUFAKI?

17, 18. (a) Se a nei te avanoaga ko maua ne tatou e aofia i ei te kufaki? (e) Ne a fakamanuiaga ka maua nei ne tatou mai te fakaasiatuga o te loto kufaki?

¹⁷ Faitalia me ne tavini atu tatou ki te Atua i te fia masina fua io me i te fia sefulu tausaga, e ma‵nako tatou o tavini atu ki a ia ki te se-gata-mai. E fesoasoani mai te kufaki ke loto ‵mau tatou ke oko eiloa ki te taimi e maua ei ne tatou a te fakaolataga, faitalia me pefea te leva o te taimi koi ‵toe i te olaga tenei. Ko tuku mai nei ne Ieova ki a tatou a te avanoaga ke fakatalitonu atu a ‵tou tali‵tonu kātoatoa ki ana fakaikuga kae—kafai e mafai—ke loto fia‵fia foki o logo‵mae i amioga ma‵sei mō te ‵lei o tena igoa. (1 Petelu 4:13, 14) E tuku mai foki ne te Atua a akoakoga kolā e mafai o fesoasoani mai ke maua ne tatou a te kufaki telā e manakogina mō te faka‵saoga.—1 Petelu 5:10.

¹⁸ E nofo mo Iesu a te pule kātoa i te lagi mo lalolagi, kae seai se mea e mafai ne ia o ‵fao koe kea‵tea mai tena puipuiga atafai—kae na ko koe loa. (Ioane 10:28, 29) E se ‵tau o ma‵taku tatou ki te taimi mai mua io me ko te mate. A latou kolā e kufaki kae loto mau ke oko ki te gataga ka ‵sao. Tela la, e ‵tau o fakamautinoa aka ne tatou me e se talia ne tatou a mafaufauga o te lalolagi ke pokotia i ei ‵tou mafaufauga kae ko fakagata i ei ‵tou tali‵tonu ki a Ieova. E ‵tau o fakaiku aka ne tatou ke ga‵solo ki mua i te fakatuanaki kae fakaaoga faka‵lei a te taimi o te kufaki o te Atua.—Mataio 24:13; faitau te 2 Petelu 3:17, 18.

[Ata i te itulau e 21]

Ka feso asoani atu te kufaki o te Atua ke saga tonu koe ki mea o te Malo kae maua mai i ei a fakamanuiaga!