Fakaakoako ki te Kufaki o Ieova

“Me vave fakataunu ne te Aliki a te mea ne folafola ne ia, . . . ka ko ia e fakatalitali mo te kufaki.”​—2 PETELU 3:9.

1. Se a te meaalofa se fuafuagina telā ko oti ne tuku mai ne Ieova ki tino?

KO OTI ne tuku mai ne Ieova ki a tatou se mea telā e se mafai o tuku mai ne se isi tino aka. Se mea telā e lasi tena fakafiafia kae tāua ‵ki, kae se mea telā e se mafai o ‵togi tupe io me e maua ne koe e ‵togi ei au galuega. A te mea tenā ko te meaalofa ko te ola se-gata-mai​—mō te tokoukega o tatou, ko te ola se-gata-mai i te lalolagi palataiso. (Ioane 3:16) Ma‵faga o mea fakafiafia! Ka se toe ai ne mea e māfua mai ei te fanoanoa lasi​—ko kinauga, fakasauāga, te mativa, amioga solitulafono, masaki, ke oko ki te mate. Ka ola a tino i te filemu mo te fealofani katoatoa mai lalo i te pulega alofa a te Malo o te Atua. E pefea te ma‵nako malosi o tatou ki te Palataiso tenā!​—Isaia 9:​6, 7; Fakaasiga 21:​4, 5. 

2. Kaia ne seki fakaseai atu ei ne Ieova a te olaga masei a Satani?

² E penā foki a Ieova, e olioli faeloa ki te taimi ka fakatu ei ne ia te Palataiso i luga i te lalolagi tenei. E tonu eiloa te mea tenā, me i a Ieova e fiafia ki te amiotonu mo te fai mea tonu. (Salamo 33:5) E se fia kilokilo lele a ia ki se lalolagi telā e se fia ‵saga atu io me e se amanaia ki ana fakatakitakiga amio‵tonu, se lalolagi telā e ‵teke malosi atu ki tena pulega kae fakasauā ki ana tino. Kae, e isi ne pogai tāua ne seki gasuesue ei a ia o fakaseai atu a te olaga ma‵sei tenei a Satani. E aofia i pogai konā ko te kinauga e uiga ki te ‵tonu io me ko te se tonu o tena pulega i te lagi mo te lalolagi. Ke faka‵lei aka a kinauga konei, ne fakaasi mai ei ne Ieova se uiga tafasili i te fakafiafia loto, se uiga telā e se maua i tino e tokouke i aso nei​—ko te kufaki.

3. (a) Se a te uiga o te pati Eleni mo te pati Epelu kolā e ‵fuli ki te “kufaki” i te Tusi Tapu? (e) Ne a fesili ka sau‵tala nei tatou ki ei?

³ E isi se pati Eleni telā ne ‵fuli fakatolu taimi i te New World Translation ki te pati ko te “kufaki.” E fakauiga tonu eiloa ki te “loa o te agaga” kae ne ‵fuli i te ukega o taimi ki te “fa‵ki i se taimi leva” kae ne ‵fuli fakatasi fua ki te “fakaasiatuga o te kufaki.” E aofia i te pati Eleni mo te pati Epelu kolā ne ‵fuli ki te “kufaki” ko te manatu ke fa‵ki mo te tuai o ita. E aogā pefea a te kufaki o Ieova ki a tatou? Ne a akoakoga e tauloto ne tatou mai te kufaki mo te fa‵ki o Ieova e pelā foki mo ana tavini fakamaoni? E iloa pefea ne tatou me e isi se tapulā ki te kufaki o Ieova? Ke onoono aka tatou.

Ke Mafaufau ki te Kufaki o Ieova

4. E uiga ki te kufaki o Ieova, ne a pati ne tusi mai ne te apositolo ko Petelu?

⁴ E uiga ki te kufaki o Ieova, ne tusi mai te apositolo ko Petelu: “Ke mo a e puli i a koutou a te mea tenei e tasi! E seai se kesekesega o te aso e tasi mo te afe tausaga i te kilokiloga a te Aliki; e ‵pau katoa ki a ia a mea konā e lua. Fai mai nisi tino me [“tuai o,” NW] fakataunu ne te Aliki a te mea ne folafola ne ia, kae i nisi taimi e fai penā. Ka ko ia e fakatalitali mo te kufaki me se manako a ia ke malaia se tino, tenā te pogai e fakatuai ei a ia o fakataunu ana folafolaga, ko te mea ke lava se taimi e salamo ei a tino.” (2 Petelu 3:​8, 9) Ke masaua a manatu e lua e fakaasi mai i konei kolā e fesoasoani mai ke malamalama tatou i te kufaki o Ieova.

5. E pokotia pefea a faifaiga a Ieova i tena kilokiloga e uiga ki te taimi?

⁵ A te manatu muamua, e se ‵pau a te kilokiloga a Ieova ki te taimi e pelā mo tatou. E ‵pau eiloa a te afe tausaga mo se aso e tasi ki te Tino telā e ola ki te se-gata-mai. E se fakatapulāgina a ia io me tulituli a ia ne te taimi, kae e se tuai foki o faka‵tonu aka se mea ‵se. Ona ko te seai o se tapulā ki tena poto, e iloa ‵lei ne Ieova a te taimi tonu ke gasuesue ei a ia mō te ‵lei o tino katoa, kae fakatalitali a ia mo te kufaki ki te taimi tenā. Kae e se ‵tau o fakaiku aka ne tatou me e se fia saga mai a Ieova ki logo‵maega kolā e mafai o pokotia i ei ana tavini i te vaitaimi tenei. A ia ko te Atua telā e “alofa ‵nau,” ko te alofa eiloa a ia. (Luka 1:78; 1 Ioane 4:8) E mafai ne ia o fakaseai katoatoa ki te se-gata-mai so se logo‵maega telā e māfua mai i te vaitaimi se tumau tenei o logo‵maega.​—Salamo 37:10.

6. Se a te mea e se ‵tau o fakaiku aka ne tatou e uiga ki te Atua, kae kaia?

⁶ E tonu, e se se mea faigofie ke fakatalitali ki se mea telā e manako malosi ki ei se tino. (Faataoto 13:12) Telā la, kafai e se fakataunu fakavave ne tino olotou tautoga, e mafai o fakaiku aka ne nisi tino me ka se ma‵nako eiloa latou o fai te mea tenā. Ma‵faga o mea valea ke mafau‵fau i te Atua e fai foki penā! Kafai e faka‵tau ‵se tatou ki te kufaki o Ieova e pelā me tuai, a ia e faigofie o fakalotolotolua io me loto vāi‵vāi tatou ona ko te leva o te taimi, kae fai ei ke ‵tu atu tatou i se tulaga fakamataku i te feitu faka-te-agaga. Kae sili atu i te masei, e mafai o faka‵segina tatou ne tino kolā ne polopoloki mai a Petelu ke fakaeteete i ei​—ko tino fakatauemu, ko tino kolā e seai se lotou fakatuanaki. E fakatauemu mai a tino konā penei: “Ne folafola mai ne ia me i a ia e vau. E tonu? Tefea nei a ia? A o‵tou tupuga ko leva ne ‵mate, kae e seai eiloa se ‵fuliga o mea katoa talu te kamataga o te lalolagi!”​—2 Petelu 3:4.

7. E fetaui pefea a te kufaki o Ieova mo tena manakoga ke sala‵mo a tino?

⁷ A te lua o manatu telā e fakaasi mai i pati a Petelu, i a Ieova e kufaki me e manako a ia ke sala‵mo a tino katoa. A tino loto ma‵keke kolā e se fia ‵fuli mai i olotou uiga ma‵sei katoa ka ‵ta fakapalele latou ne Ieova. Kae e se fiafia a Ieova ke mate se tino amio masei. Kae e fiafia a ia māfai ko sala‵mo a tino kae ‵fuli keatea mai i olotou auala ma‵sei, kae tumau i te ola. (Esekielu 33:11) Tenā loa te pogai e fakaasi atu ei ne ia tena kufaki, kae uga atu ana tavini ke folafola atu te tala ‵lei ki te lalolagi kātoa ko te mea ke maua ne tino katoa te avanoaga ke maua ne latou te ola.

8. E lavea atu pefea a te kufaki o Ieova i ana faifaiga ki te fenua ko Isalaelu?

⁸ E lavea atu foki te kufaki o Ieova i ana faifaiga ki te fenua mua ko Isalaelu. I te fia o senitenali, ne fa‵ki a ia i te lotou se faka‵logo. E auala i ana pelofeta, ne fakamalosi atu faeloa a ia ki a latou: “Tiakina otou amioga ma‵sei kae faka‵logo mai ki aku fakatonuga kolā e tu i loto i te tusi o Tulafono telā ne tuku ne au ki otou tupuga, tenei foki eiloa ne fakaoko mai ki a koutou ne aku tavini ko pelofeta.” Se a te mea ne iku mai i ei? Se mea fakafanoanoa me “ne seki faka‵logo eiloa latou.”​—2 Tupu 17:​13, 14.

9. Ne fakaata mai pefea ne te kufaki o Iesu a te kufaki o tena Tamana?

⁹ Fakamuli loa, ne uga mai ne Ieova tena Tama, telā ne fakaoti ana mafi o fakamalosi atu ki tino Iutaia ke faka‵lei aka te lotou vā mo te Atua. E fakaata faka‵lei mai ne te kufaki o Iesu a te kufaki o tena Tamana. Me ne iloa ‵lei ne ia i a ia ko pili o tamate, ne fai atu a Iesu mo te fanoanoa lasi: “Ielusalema, Ielusalema! Ne tamate ne koe a pelofeta, kae peipei ki fatu a ave fekau a te Atua ne uga atu ki a koe! Ko uke a taimi ne manako au o fakapulupulu koutou ki oku lima, e pelā eiloa mo se moa fafine e fakapulupulu ana tama ki ona kapakau, kae ne seki talia ne koe au!” (Mataio 23:37) A pati fakaotia loto konā ne seki fai mai ne se famasino telā ko oko eiloa te manako o fakasala se tino, kae ko pati a se taugasoa alofa telā e loto kufaki e uiga ki tino. E pelā mo tena Tamana i te lagi, ne manako Iesu ke sala‵mo a tino kae ke ‵sao i te fakasalaga. Ne faka‵logo a nisi tino ki pati a Iesu kae ne ‵sao ei latou i te fakasalaga matagā telā ne oko ki Ielusalema i te 70 T.A.​—Luka 21:​20-22.

10. I te auala fea e aogā ei te kufaki o te Atua ki a tatou?

¹⁰ E mata, e se ‵tau o ofo tatou i te kufaki o te Atua? Faitalia te lasi o te se faka‵logo o tino, ko oti ne tuku mai ne Ieova ki a tatou taki tokotasi, fakatasi mo te fia miliona o nisi tino a te avanoaga ke iloa ne tatou a ia kae ke puke ‵mau ki te fakamoemoega o te fakaolataga. “Mafaufau ki te kufaki o te Aliki . . . ke faka‵sao ei koutou,” ko pati a Petelu ki ana taina Kelisiano. (2 Petelu 3:15) E mata, e se fakafetai tatou mō te avanoaga ne ‵tala mai ne te kufaki o Ieova ke ‵sao ei tatou? E mata, e se ‵talo atu tatou ke tumau eiloa te kufaki o Ieova ki a tatou i te taimi e tavini atu ei tatou ki a ia i aso katoa?​—Mataio 6:12.

11. Se a te mea e fakamalosi mai ke fai ne tatou mai te ‵tou malamalama i te kufaki o Ieova?

¹¹ Kafai e malamalama tatou i te pogai e kufaki ei a Ieova, ka iloa ei ne tatou o faka‵tali mo te kufaki ki te fakaolataga telā ka aumai ne ia, e aunoa mo te faiga o se fakaikuga i a ia e tuai o fakataunu ana fuafuaga. (Tagiga a Ielemia 3:26) I te ‵tou ‵talo atu faeloa ke oko mai te Malo o te Atua, e tali‵tonu tatou me iloa ne te Atua a te ‵toe taimi ‵lei ke tali mai ei ki te ‵talo tenā. E se gata i ei, e fakamalosi aka foki ei tatou ke fakaakoako atu ki a Ieova mai te fakaasiatuga o te kufaki o te Atua i ‵tou faifaiga ki ‵tou taina mo tino kolā e talai tatou ki ei. E se ma‵nako foki tatou ke fakaseai atu so se tino kae e fia lavea atu a latou ko sala‵mo kae maua fakatasi ne tatou te fakamoemoega ko te ola se-gata-mai.​—1 Timoteo 2:​3, 4. 

Ke Mafau‵fau ki te Kufaki o Pelofeta

12, 13. E ‵tusa mo te Iakopo 5:​10, ne manuia pefea a te pelofeta ko Isaia i te fakaasiatuga o te kufaki?

¹² Mai te mafau‵fau ki te kufaki o Ieova, e fesoasoani mai i ei ke matea ne tatou tena tāua kae ke maua foki ne tatou te uiga tenā. E se se mea faigofie ke maua ne tino se ‵lei katoatoa a te uiga ko te kufaki, kae se mea eiloa e mafai o fai. E uke a akoakoga e maua ne tatou mai tavini a te Atua i aso mua. Ne tusi mai te soko ko Iakopo: “Taina, ke masaua ne koutou a pelofeta kolā ne fai‵pati i te igoa o te Aliki. Ke fai latou mo fakaakoakoga o te loto kufaki i puapuagā.” (Iakopo 5:10) Se mea fakamafanafana kae fakamalosi loto ke iloa atu me ko oti ne fakafesagai atu mo te manuia a nisi tino ki fakalavelave kolā e fe‵paki nei mo tatou.

¹³ E pelā mo te pelofeta ko Isaia, ne ‵tau eiloa o maua ne ia te kufaki i te faiga o tena galuega. Ne fakaasi atu ne Ieova te mea tenā i ana pati konei: “Ne fai mai ei ki a au ke fano au o fakaoko atu te fekau tenei ki tino o tena fenua: ‘Me pefea eiloa te uke o mea ne fakalogo‵logo koutou ki ei, kae ka se mafai eiloa koutou o malamalama. Me pefea eiloa te ‵pula mai o otou mata, kae ka se iloa eiloa ne koutou a mea konā e ‵tupu.’ Tenā kae fai mai ei ki a au penei, ‘Fai atu a mafaufau o tino konā ke va‵lea, olotou taliga ke ‵tuli, mo olotou mata ke ‵kivi, ko te mea ke se mafai ne latou o matea se mea, io me lagona se mea, io me malamalama i se mea; me kafai e matea, io me lagona, io me malamalama i se mea, ko tena uiga ka ‵fuli mai latou ki a au ko fakaola ei ne au latou.’ ” (Isaia 6:​9, 10) Faitalia te se fia ‵saga mai o tino, ne folafola atu eiloa ne Isaia mo te kufaki a te fekau a Ieova i tausaga e 46! E penā foki tatou, ka fesoasoani mai a te kufaki ke fa‵ki tatou i te ‵tou galuega ko te talaiatuga o te tala ‵lei, faitalia te se fia ‵saga mai o tino e tokouke.

14, 15. Se a te mea ne fesoasoani atu ki a Ielemia ke fakafesagai atu ki fakalavelave mo te loto vāivāi?

¹⁴ E tonu, e se gata fua i te se fia ‵saga mai o tino i te faiga o te lotou galuega, ne fakafesagai atu foki a pelofeta ki nisi mea; ne logo‵mae latou i fakasauāga matagā. Ne saisai a Ielemia ki filifili, ne ‵loka i te “fale o Ionatana,” kae ne ‵pei foki ki lalo i se vaikeli. (Ielemia 20:2; 37:15; 38:6) Ne fakasauā eiloa a ia ne tino kolā ne fia fesoasoani atu a ia ki ei. Kae ne seki loto masei a Ielemia io me taui atu ne ia olotou mea konā. Ne kufaki eiloa a ia i te fia sefulu o tausaga.

¹⁵ Ne seki ‵pono ne fakasauāga mo fakatauemuga a te gutu o Ielemia, kae se ‵pono foki ne latou a ‵tou gutu i aso nei. E tonu, e mafai o loto vāi‵vāi tatou i nisi taimi. Ne loto vāivāi a Ielemia. “Te Aliki, a tino e o‵mai faeloa o fakaitaita au kae fakalili mai au i taimi katoa me e folafola ne au tau fekau,” ko ana pati. “Kae kafai e faipati au penei, ‘Ka fakapuli ne au a te Aliki kae se toe faipati i tena igoa.’ ” Se a la te mea ne tupu? E mata, ne taofi aka ne Ielemia te galuega talai? Ne toe fai mai a ia: “Ko tau fekau ka ‵ka pelā me se afi i loto i a au. E taumafai au o taofi i loto, kae e se mafai eiloa o taofi ne au.” (Ielemia 20:​8, 9) Ke onoono me i tena sagaatuga ki pati fakatauemu a tino, ne galo ei tena fiafia. Kae i tena ‵fuliga o saga atu ki te gali mo te tāua o te fekau tenā, ne toe maua ei tena fiafia. E se gata i ei, ne fakatasi atu eiloa a Ieova ki a Ielemia e pelā me se tino “mafi kae malosi,” o fakamalosi a ia ke folafola atu te muna a te Atua mo te loto finafinau mo te loto toa.​—Ielemia 20:11.

16. E mafai pefea o fakatumau te ‵tou fiafia i te faiga o te galuega ko te talaiatuga o te tala ‵lei?

¹⁶ E mata, ne fiafia a te pelofeta ko Ielemia ki tena galuega? Ao! Ne fai atu a ia ki a Ieova: “Ne faipati mai koe ki a au, kae ne fakalogo faka‵lei eiloa au ki au muna katoa ne fai. Te Aliki te Atua Malosi, au e o koe, telā la, au muna e aumai ne ia te fiafia ki toku loto.” (Ielemia 15:16) Ne fiafia malosi a Ielemia ki tena tauliaga ke sui ne ia te Atua tonu kae folafola atu tena muna. E mafai foki o fia‵fia tatou. E se gata i ei, e fia‵fia tatou e pelā foki mo agelu i te lagi, me ko oti ne talia ne tino e tokouke i te lalolagi kātoa a te fekau o te Malo, sala‵mo, kae ko sa‵sale atu nei i te auala ki te ola se-gata-mai.​—Luka 15:10.

“Te Kufaki o Iopu”

17, 18. I te feitu fea ne fa‵ki ei a Iopu, kae se a te mea ne iku mai i ei?

¹⁷ Mai tua o ana pati e uiga ki pelofeta i aso mua, ne tusi mai te soko ko Iakopo: “Ko oti ne lagona ne koutou te kufaki o Iopu, ka ko iloa foki ne koutou i te Aliki ne fesoasoani atu ki a ia i te fakaotiga. Me i te Aliki e ‵fonu i te alofa ‵nau mo te alofa fesoasoani.” (Iakopo 5:11) A te pati Eleni telā ne ‵fuli i konei ki te “kufaki” e tai ‵kese malie mo te pati ne fakaaogā ne Iakopo ki te “kufaki” i te fuaiupu mai mua atu i ei. I te fakasino atu ki te ‵kese o pati e lua konā, ne tusi mai se tagata poto penei: “A te pati muamua ko te kufaki māfai e sōna fai tatou ne nisi tino, a ko te pati fakamuli ko te fa‵ki mo te loto toa i mea faiga‵ta.”

¹⁸ Ne fepaki a Iopu mo mea faiga‵ta matagā. Ne ‵galo ana koloa, ne ‵mate ana tama‵liki kae ne poko foki a ia i se masaki fakalogo‵mae. Ne taua atu foki a ia ki ‵losiga ‵se me ko fakasala a ia ne Ieova. Ne seki nofo fifilemu a Iopu i ana logo‵maega; ne fakaasi mai ne ia tena fanoanoa e uiga ki tena tulaga kae pelā me ne fakaasi mai i ana pati me e amiotonu atu a ia i te Atua. (Iopu 35:2) Kae, ne seki galo lele tena fakatuanaki, io me ko tena fakamaoni. Ne seki pati masei foki a ia ki te Atua e pelā mo te ‵losiga a Satani. (Iopu 1:​11, 21) Se a te ikuga? “Ne fakamanuia ne [Ieova] te vaega fakaoti o te olaga o Iopu, e silia atu i te fakamanuiaga muamua.” (Iopu 42:12) Ne toe faka‵lei ne Ieova te masaki o Iopu, fakafoki fakalua atu tena maumea, kae fakamanuia atu ki se olaga fiafia fakatasi mo ana kāiga pele. Ne fai foki ne te fa‵ki o Iopu ke malamalama ‵lei a ia e uiga ki a Ieova.

19. Se a te mea e tauloto ne tatou mai te kufaki mo te fa‵ki o Iopu?

¹⁹ Se a te mea e tauloto ne tatou mai te kufaki mo te fa‵ki o Iopu? E pelā mo Iopu, e mafai o pokotia tatou i masaki io me ko nisi fakalavelave. E mafai o se malamalama tatou i te pogai e talia ei ne Ieova ke pokotia tatou i se tofotofoga penā. Kae tenei eiloa te mea e mautinoa i a tatou: Kafai e tumau tatou i te fakamaoni, ka fakamanuiagina tatou. Ka fakamaoni eiloa a Ieova o fakamanuia a tino kolā e ‵sala atu mo te loto finafinau ki a ia. (Epelu 11:6) Ne fai mai Iesu: “Ka ko te tino e loto mau ke oko ki te ikuga, e ola eiloa a ia.”​—Mataio 10:22; 24:13.

‘A te Aso o Ieova ka Oko Mai Eiloa’

20. Kaia e mautinoa ei i a tatou me ka oko mai eiloa te aso o Ieova?

²⁰ E ui eiloa e kufaki a Ieova, kae e fai mea tonu foki a ia kae ka se mafai o fa‵ki a ia i amioga matagā ke oko ki te se-gata-mai. E isi se tapulā ki tena kufaki. Ne tusi mai a Petelu: “Ne seki fakasao foki ne te Atua a te lalolagi taumua.” E ui eiloa ne ‵sao a Noa mo tena kāiga, ne faka‵fonu te lalolagi sē amioatua tenā ki te vai. Ne fakamasei katoatoa foki ne Ieova a Sotoma mo Komolo. E fakaasi mai i fakasalaga konei se “fakaakoakoga ki tino ma‵sei, ki mea [ka] ‵tupu ki a latou.” Kae tenei eiloa te mea e mautinoa i a tatou: ‘A te Aso o Ieova ka oko mai eiloa.’​—2 Petelu 2:​5, 6; 3:10.

21. E fakaasi atu pefea ne tatou te ‵tou kufaki mo te fa‵ki, kae se a te mea ka sau‵tala tatou ki ei i te suā mataupu?

²¹ Ke na fakaakoako la tatou ki te kufaki o Ieova mai te fesoasoani atu ki nisi tino ke sala‵mo ko te mea ke mafai o ‵sao latou. Ke na fakaakoako foki tatou ki pelofeta mai te folafola atu mo te kufaki a te tala ‵lei faitalia te se fia ‵saga mai o tino kolā e talai tatou ki ei. E se gata i ei, e mautinoa eiloa me ka fakamanuia ne Ieova a tatou māfai e kufaki tatou i tofotofoga kae tumau i te fakamaoni. E se lausia a pogai e ‵tau ei o fia‵fia tatou i ‵tou galuega māfai e iloa ne tatou a te uke o fakamanuiaga a Ieova ki luga i taumafaiga ana tino ke folafola atu te tala ‵lei i te lalolagi kātoa. Ka lavea ne tatou a te mea tenei i te suā mataupu.

E Masaua ne Koe?

• Kaia e fakaasi mai ei ne Ieova te kufaki?

• Ne a mea e tauloto ne tatou mai te kufaki o pelofeta?

• Ne fakaasi atu pefea ne Iopu te kufaki, kae se a te mea ne iku mai i ei?

• E iloa pefea ne tatou me e isi se tapulā ki te kufaki o Ieova?

[Ata i te itulau e 14]

Ne taui atu pefea ne Ieova te kufaki o Ielemia?