Ke Fakauiga Tau Ao Ki Te Ao

“Ke fakauiga fua tau pati Ao ki te Ao, a ko te Ikai ki te Ikai.”​—MATAIO 5:37.

ONOONO AKA ME MAFAI NE KOE O TALI:

Ne a pati a Iesu e uiga ki tautoga?

Kaia ne fai ei a Iesu mo fai se fakaakoakoga ‵lei i te fakataunuga o ana pati?

I feitu fea o te olaga e ‵tau ei o fakauiga ‵tou Ao ki te Ao?

1. Ne a muna a Iesu e uiga ki te faiga o tautoga, kae kaia?

A KELISIANO ‵tonu e masani o sē tauto. Te pogai, me i a latou e faka‵logo ki a Iesu telā ne fai mai penei: “Ke fakauiga fua tau pati ‘ao’ ki te ao.” Ne fakauiga a ia me e ‵tau mo te tino o tausi ki tena pati e fai. Ne fakatomua ne Iesu a te fakatonuga tenā mai te fai atu: “Ke mo a eiloa e tau‵to koutou.” Ne faipati ne ia te mea tenei o taku fakamasei a te uiga masani o tino e tokouke i te tauto sāle i olotou sau‵talaga e fai i aso takitasi, e aunoa mo te mafaufau ke fakataunu olotou pati e fai. Mai te fai atu o “so se mea i tafa” o se Ao io me se Ikai ke fakaasi atu olotou ‵kanoloto tonu, kāti e fakaasi mai ne vaegā tino penā me ko sē fakatalitonugina latou kae ko ‵nofo mai lalo i te malosi o “te tino masei.”​—Faitau te Mataio 5:​33-37.

2. Fakamatala mai te pogai e sē ‵se faeloa a te faiga o tautoga.

² E mata, e fakauiga a pati a Iesu me i te faiga o tautoga katoa e ma‵sei? Ne mafai pefea o fai penā? I te mataupu mai mua atu, ne tauloto tatou i ei me i a Ieova te Atua mo tena tavini amiotonu ko Apelaamo ne tauto foki e uiga ki mea tāua. Ne manakogina foki i te Tulafono a te Atua a te faiga o se tautoga ke faka‵lei aka a kinauga. (Esoto 22:​10, 11; Numela 5:​21, 22) Tela la, kāti e ‵lei ke tauto se Kelisiano kae faipati ki te mea tonu māfai e molimau i se fono o te tulafono. Io me i se taimi, ko manatu aka se Kelisiano me se mea ‵lei ke fai se tautoga ke fakatalitonu atu ki nisi tino ana lagonaga ‵tonu io me fesoasoani atu ke faka‵lei aka se fakalavelave. A te tonuga loa, i te taimi ne fai atu ei te faitaulaga sili ki a Iesu ke tauto, ne seki ‵teke atu a ia ki ei kae ne tali ‵tonu atu eiloa a ia ki te Sanetulini a te kau Iutaia. (Mataio 26:​63, 64) E ui i ei, ne seki ‵tau o tauto atu a Iesu ki so se tino. Ke faka‵mafa a te fakatuagagina o tena fekau, ne kamata sāle ne ia ana pati i te auala tenei: “E tonu, e tonu, au e fai atu ki a koutou.” (Ioane 1:​51, NW, Tusi Paia, Samoa; 13:​16, 20, 21, 38) Ke onoono aka tatou me ne a nisi mea e mafai o tauloto ne tatou mai te fakaakoakoga a Iesu, Paulo, mo nisi tino kolā ne fakauiga te lotou Ao ki te Ao.

IESU​—TE ‵TOE FAKAAKOAKOGA ‵LEI

3. Se a te mea ne tauto atu Iesu ki te Atua i te ‵talo, kae ne tali mai pefea a tena Tamana faka-te-lagi?

³ “Kiloke! Tenei au ko vau . . . o fai tou loto, e toku Atua.” (Epelu 10:7) Mai pati tāua konei, ne tuku atu ei ne Iesu a ia eiloa ki te Atua ke fakataunu a mea katoa kolā ne ‵valo mai e uiga ki te Fanau, e aofia i ei a tena ‘fakapakia i te mulivae’ ne Satani. (Kenese 3:15) E seai eiloa se tino kai ofo mai ke amo ne ia se vaegā amoga ‵mafa penā. Ne fakaasi mai ne Ieova mai te lagi a tena talitonu kātoatoa ki tena Tama, e tigā eiloa ne seki manakogina ke tauto a Iesu me ka tausi ne ia ana pati.​—Luka 3:​21, 22.

4. Se a te mea ne loto fiafia a Iesu o fai ke fakatalitonu atu me ne fakauiga loa a tena Ao ki te Ao?

⁴ Ne fakauiga faeloa ne Iesu a tena Ao ki te Ao. Ne seki talia lele ne ia so se mea ke fakalavelave atu ki a ia i te faiga o te galuega telā ne tuku atu ne tena Tamana ke fai ne ia. Ke talai a te tala ‵lei e uiga ki te Malo o te Atua kae ke fai a soko mai tino katoa kolā ne ‵futi atu ne te Atua ki a Iesu. (Ioane 6:44) E fakamatala mai i te Tusi Tapu a te ‵tonu o pati a Iesu i pati lauiloa konei: “Me faitalia te uke o folafolaga a te Atua ne fai mai, ne fai katoa eiloa mo fai te Ao e auala i a ia.” (2 Kolinito 1:20) E tonu, a Iesu ko te ‵toe fakaakoakoga ‵lei o te tino telā e fakataunu ne ia a mea kolā ne tauto a ia ki tena Tamana. I te suā mea, ka sau‵tala tatou ki se tino telā ne galue malosi ke fakaakoako atu ki a Iesu.

PAULO​—SE TAGATA E TAUSI KI ANA PATI

5. Se a te fakaakoakoga ne fai ne te apositolo ko Paulo mō tatou?

⁵ “Se a te mea e ‵tau o fai ne au, e te Aliki?” (Galuega 22:10) E tenei te tali a Paulo, ko Saulo i aso konā, ki te fakatonuga a te Aliki ko Iesu telā ne sae atu ki a ia i se fakaasiga ke taofi aka tou tagata mai te fakasauā atu ki soko o Keliso. Kae ko te ikuga, ne salamō a Saulo ki ana mea mua ne fai, papatiso, kae talia a te galuega telā ne tuku atu ki a ia ke molimau atu ki atufenua e uiga ki a Iesu. Mai te taimi tenā o fano ki mua, ne tumau eiloa a Paulo i te taku ne ia a Iesu ko tena “Aliki,” mai te gasuesue e ‵tusa mo te tugāpati tenā ke oko eiloa ki te gataga o tena olaga i te lalolagi. (Galuega 22:​6-16; 2 Kolinito 4:5; 2 Timoteo 4:8) E ‵kese a Paulo mai nisi tino kolā ne fai mai a Iesu e uiga ki ei: “Kaia la e ka‵laga mai ei koutou ki a au te Aliki! te Aliki! kae e se fai ne koutou a mea kolā e fai atu ne au?” (Luka 6:46) Ao, e fakamoemoe eiloa a Iesu ko tino katoa kolā e talia ne latou a ia e pelā me ko te lotou Aliki ke tausi ki olotou pati, e pelā mo te apositolo ko Paulo.

6, 7. (a) Kaia ne ‵fuli ei ne Paulo a tena palani ke toe āsi atu ki Kolinito, kae kaia ne ‵se ei a te fai atu o nisi tino me i a ia ko sē fakatalitonugina? (e) E ‵tau o ‵kilo atu pefea tatou ki a latou kolā ne filifili aka ke fai ne latou te takitakiga?

⁶ Ne loto finafinau a Paulo o fakasalalau atu a te fekau o te Malo i Asia Foliki ke oko atu ki Eulopa. Ne faka‵tu aka ne ia a fakapotopotoga e uke kae toe asi atu ki a latou. I nisi taimi, se mea ‵lei ke tauto a ia ki te ‵tonu o se mea ne tusi ne ia. (Kalatia 1:20) I te taimi ne ma‵natu aka ei a nisi tino i Kolinito me ko sē fakatalitonugina a Paulo, ne tusi mai a ia penei: “A te Atua e fakamaoni ko te mea ke se fai te motou Ao mo fai te motou Ikai.” (2 Kolinito 1:18) Ko oti ne tiakina ne Paulo a Efeso i te taimi ne tusi ei a te mea tenā, kae ko faimalaga atu i loto i Maketonia i tena auala ki Kolinito. Muamua loa, ne palani a ia ke toe āsi atu ki Kolinito a koi tuai o fanatu ki Maketonia. (2 Kolinito 1:​15, 16) E pelā mo ovasia faima‵laga i aso nei, e mafuli‵fuli a malaga fai i nisi taimi. E se fai a ‵fuliga konei ona ko pogai sē tāua io me ko te kaimanako kae ona ko nisi fakalavelave e seki fakamoemoegina. E pelā mo Paulo, te pogai ne fakatalave ei a tena palani ke āsi atu ki Kolinito ne fai mō te ‵lei o te fakapotopotoga. E pefea la?

⁷ I se taimi mai tua ifo o tena palani muamua ne fai, ne maua ei ne Paulo a tala o te sē ‵kaufakatasi mo te fai amioga sē ‵tau kolā ne talia i Kolinito. (1 Kolinito 1:11; 5:1) Ke fakatonu aka te tulaga tenā, ne tusi atu ei ne ia a polopolokiga ‵mafa i tena tusi muamua ki te kau Kolinito. Tela la, i lō te folau tonu atu mai i Efeso ki Kolinito, ne fakaiku aka ne Paulo ke tuku atu ki ana taina se taimi e lava ke fakagalue aka ana polopolokiga me kafai e oko fakamuli atu a ia, ka mafai o fakamalosi loto a tena āsiga. I te fakatalitonu atu ki a latou te pogai tonu ne ‵fuli ei ana palani, ne tusi atu ne Paulo i te lua o ana tusi: “E molimau atu au ki a koutou i mua o te Atua me ka se fanatu au ki Kolinito ko te mea ke se fanoa‵noa koutou.” (2 Kolinito 1:23) Ke mo a eiloa e fai tatou pelā mo latou kolā ne fāmeo ki a Paulo; kae ke fakaasi atu ne tatou a te ‵poko o ‵tou āva ki a latou kolā ne filifili aka ke takitaki ne latou a tatou. E ‵tau o fakaakoako atu tatou ki a Paulo e pelā mo te fakaakoako atu o ia ki a Keliso.​—1 Kolinito 11:1; Epelu 13:7.

NISI FAKAAKOAKOGA ‵LEI

8. Se a te fakaakoakoga ne fai ne Lepeka mō tatou?

⁸ “Au e loto fiafia o fano.” (Kenese 24:​58, NW) Ne tali atu a Lepeka ki tena mātua mo tena tuagane i pati faigo‵fie konei ke fakaasi atu ei a tena loto fiafia o olo fakatasi mo se tino fakaa‵tea i se 500 tupu maila (800 km) ke fai mo fai te avaga a te tama tagata a Apelaamo ko Isaako. (Kenese 24:​50-58) Ne fakauiga ne Lepeka a tena Ao ki te Ao, kae ne fai a ia mo fai se avaga ‵lei o Isaako telā e fakamaoni kae mataku ki te Atua. I tena olaga kātoa, ne nofo a ia i faleie e pelā me se tino fakaalofa i te Fenua o te Folafolaga. Ne maua ne ia te taui o tena fakamaoni me ne fai a ia mo fai se tupuga fafine e tokotasi o te Fanau telā ne folafola mai, ko Iesu Keliso.​—Epelu 11:​9, 13.

9. Ne fakauiga pefea te Ikai a Luta ki te Ikai?

⁹ “Ikai! Tatou e olo tasi eiloa ki tou fenua.” (Luta 1:10) Ne tumau eiloa a fāfine Moapi ko ‵mate a lā avaga, ko Luta mo Olepa, i te fai atu o pati konei ki te mātua o lā avaga, ko Naomi. Ko mate foki tena avaga kae ko toe foki atu mai Moapi ki Peteleema. I te fakaotiga loa, ne toe foki atu a Olepa ki tena fenua tonu ona ko te fakamalosiga a Naomi. Kae ko te Ikai a Luta ne fakauiga eiloa ki te Ikai. (Faitau te Luta 1:​16, 17.) Ne alofa fakamaoni eiloa tou fafine ki a Naomi faitalia me ka tiakina ne ia tena kāiga mo lotu ‵se a te kau Moapi ke oko eiloa ki te se-gata-mai. Ne lotomau a ia e pelā me se tino tapuaki fakamaoni a Ieova kae ne maua ne ia tena taui me ne aofia a ia i fāfine e tokolima fua kolā ne taku mai ne Mataio i te gafa o Keliso.​—Mataio 1:​1, 3, 5, 6, 16.

10. Kaia ne fai ei a Isaia mo fakaakoakoga ‵lei ki a tatou?

¹⁰ “Ko au! Uga mai au!” (Isaia 6:8) A koi tuai o fai atu a pati konei, ne lavea ne Isaia se fakaasiga ‵malu o Ieova e sagasaga i Tena nofogaaliki mai luga o te faletapu o Isalaelu. A koi pula ‵toka atu ana mata ki te fakaasiga ‵malu tenei, kae lagona ne Isaia a pati a Ieova: “Ko oi te tino ka uga atu ne au? Ko oi ka fai mo avefekau a tatou?” A te mea tenei se ‵kamiga ke fai mo fai se tukumuna a Ieova ke fakailoa atu te fekau a te Atua ki Ana tino faka‵logo. Ne fakatalitonu mai ne Isaia me tonu eiloa a ia mo tena pati​—ne fakauiga eiloa tena Ao ki te Ao. Ne tavini atu a ia mo te fakamaoni e pelā me se pelofeta i tausaga e silia atu i te 46, o fakailoa atu a fakasalaga e pelā foki mo tautoga fakaofoofogia e uiga ki te ‵toe fakafokimaiga o te tapuakiga tonu.

11. (a) Kaia e tāua ‵ki ei ke fakauiga ‵tou Ao ki te Ao? (e) Ne a fakaakoakoga e ‵tau o fakaeteete i ei e uiga ki nisi tino kolā ne seki tausi ki olotou pati?

¹¹ Kaia ne fai ei a Ieova ke tusi a fakaakoakoga konei ki loto i tena Muna mō tatou? Kae e pefea te tāua ke fakauiga a ‵tou Ao ki te Ao? E manino ‵lei te faimaiga i te Tusi Tapu me i te tino telā “e se fakamaoni ki feagaiga” io me e sē fai te mea ne tauto a ia ke fai, e aofia i a latou kolā “e iku atu eiloa ki te ‵mate.” (Loma 1:​31, 32) Ne aofia i loto i te Tusi Tapu a fakaakoakoga ma‵sei a tino taki tokotasi kolā ne seki fakauiga te lotou Ao ki te Ao, ko te falao o Aikupito, te tupu o Iuta ko Setekaia, mo Anania mo Safaila. Ne logo‵mae katoa latou kae ne fai mo fakaakoakoga ke fakaeteete tatou i ei.​—Esoto 9:​27, 28, 34, 35; Esekielu 17:​13-15, 19, 20; Galuega 5:​1-10.

12. Se a te mea ka fesoasoani mai ke tausi tatou ki ‵tou pati?

¹² Ona ko tatou ko ola “i aso fakaoti,” ko sikomia tatou ne tino kolā e “se a‵lofa fakamaoni,” tino kolā “e foliga mai me e fakamaoni latou ki te Atua kae e fakafiti ne latou tena ‵mana.” (2 Timoteo 3:​1-5) Fai te ‵toe mea e mafai o fai ke ‵kalo kea‵tea mai taugasoa ma‵sei penā. Kae ‵tau mo tatou o ‵kau fakatasi faeloa mo latou kolā e taumafai eiloa o fakauiga te lotou Ao ki te Ao.​—Epelu 10:​24, 25.

TE ‵TOE AO TĀUA EILOA A KOE

13. Se a te ‵toe Ao tāua eiloa e fai atu ne se soko o Iesu Keliso?

¹³ A te ‵toe tautoga tāua eiloa e ‵tau o fai ne se tino ko tena tukuatuga ki te Atua. I taimi kese‵kese e tolu, ka maua ne tino kolā e ma‵nako ke fai mo soko o Iesu a te avanoaga ke fai atu Ao ki fesili e uiga ki olotou ‵kanoloto tonu. (Mataio 16:24) I te taimi e fakafesilisili ei ne toeaina e tokolua se tino telā ko manako ke fai mo fai se tino talai seki papatiso, e fesili atu ki te tino tenā, “E manako tonu koe ke fai mo fai se tokotasi o Molimau a Ieova?” Fakamuli ifo, kafai ko gasolo ki mua te tino i te feitu faka-te-agaga kae ko manako o papatiso, ka saga‵saga fakatasi a ia mo toeaina kae fesili atu ki a ia, “E mata, ko oti ne fai tau tukuatuga ki a Ieova e auala i te ‵talo?” I te fakaotiga loa i te aso o te papatisoga, ko fesili atu ei te failauga ki tino taki tokotasi kolā ka papatiso, “E fakavae ki luga i te taulaga a Iesu Keliso, e mata, ko oti koe ne salamō ki au agasala kae tuku atu ki a Ieova ke fai tena loto?” Tela la, i mua o molimau e tokouke, ka fai atu a tino ‵fou konei Ao e fakailoa atu ei te lotou tautoga ke tavini atu ki te Atua ke oko eiloa ki te se-gata-mai.

14. Se a te iloiloga totino e ‵tau o fai sāle ne tatou?

¹⁴ Faitalia me ko leva koe ne tavini atu ki te Atua i te fia sefulu tausaga io me ne fatoā papatiso, e ‵tau o iloilo sāle ne koe a koe eiloa kae fesili ifo a fesili penei: ‘I te fakaakoako atu ki a Iesu Keliso, e mata, e tumau au i te fakauigaga o taku toe Ao tāua eiloa ki te Ao? E mata, e tumau au i te fakalogo ki a Iesu mai te faiga o te galuega talai mo te faiga o soko mo fai te ‵toe galuega tāua i toku olaga?’​—Faitau te 2 Kolinito 13:5.

15. I feitu fea o te olaga e tāua ei ke fakauiga ‵tou Ao ki te Ao?

¹⁵ Ke fakapa‵tonu atu a ‵tou tautoga ne fai i te taimi ne fai ei ‵tou tukuatuga, e ‵tau foki o fakamaoni tatou i nisi mea tāua aka. Pelā me se fakaakoakoga: E mata, a koe ko oti ne avaga? Ke tumau la i te faka‵malu ki te tautoga tāua ne fai ne koe ke alofa kae ‵lago atu ki tau avaga. Kai saina aka loa ne koe se feagaiga pisinisi io me faka‵fonu se pepa mō galuega i te fakapotopotoga? Ke fakamaoni la koe ki au feagaiga kae fai a mea kolā ne tauto koe ki ei. Kai talia aka loa ne koe se ‵kamiga ki se ‵kaiga mai se tino telā e se uke ana mea? Ke mo a la ma fakaseaogā ne koe māfai e oko mai se ‵kamiga mai se tino telā e tai uke atu ana mea. Io me kai tauto aka loa koe ki se tino i te galuega mai fale ki fale me ka toe āsi atu koe o tuku atu a fesoasoani faka-te-agaga e uke atu? Tela la, ke na fakauiga eiloa tau Ao ki te Ao, kae ka fakamanuia ne Ieova a tau galuega.​—Faitau te Luka 16:10.

MEA AOGA E MAUA MAI ‵TOU FAITAULAGA SILI MO TE TUPU

16. Kafai ne fakata‵mala tatou o fakataunu ‵tou pati, se a te mea e ‵tau o fai ne tatou?

¹⁶ E pelā me ne tino sē ‵lei kātoatoa, e fai mai te Tusi Tapu “me i a tatou katoa e ‵siga i taimi e uke,” maise eiloa i pati e fai ne tatou. (Iakopo 3:2) Se a te mea e ‵tau o fai ne tatou māfai ko iloa aka me ne seki tausi ne tatou ‵tou pati? I te Tulafono a te Atua telā ne tuku atu ki te kau Isalaelu, ne isi se fakatokaga alofa i ei mō so se tino telā ne “sona fai tena tautoga.” (Levitiko 5:​4-7, 11) E isi foki se fakatokaga alofa mō Kelisiano kolā e fai ne latou se vaegā agasala penā. Kafai e fakaasi tonu atu ne tatou ki a Ieova se agasala ne fai, ka alofa eiloa a ia o fakamagalo tatou e auala i ‵tou Faitaulaga Sili, ko Iesu Keliso. (1 Ioane 2:​1, 2) Ke tumau tatou i te taliaga a te Atua, e ‵tau o fakaasi atu ne tatou ne faiga kolā e lavea atu i ei a te sala‵mo tonu mai te sē toe fai a vaegā agasala penā kae fai te ‵toe mea e mafai o fai ke faka‵lei aka so se fakalavelave ne fakamāfua aka ne te sona fai o ‵tou pati. (Faataoto 6:​2, 3) E tonu, e sili atu te ‵lei ke mafau‵fau faka‵lei a koi tuai o fai a tautoga kolā e se mafai o fakataunu ne tatou.​—Faitau te Failauga 5:2.

17, 18. Se a te taimi mai mua fakaofoofogia e faka‵tali mai ki a latou katoa kolā e taumafai ke fakauiga te lotou Ao ki te Ao?

¹⁷ Ko oko eiloa i te fakaofoofogia o te taimi mai mua tenā e faka‵tali mai ki tino tapuaki katoa o Ieova kolā e taumafai malosi ke fakauiga te lotou Ao ki te Ao! Ka maua ne te toko 144,000 o tino fakaekegina a te ola se-gata-mai i te lagi, te koga telā ka pule fakatasi ei latou mo Iesu i tena Malo “kae ka pule fakatasi latou mo ia i te afe o tausaga.” (Fakaasiga 20:6) Kae mō te fia miliona kolā e se mafai o lau aka, ka maua ne latou a mea aoga mai te pulega a te Malo o Keliso i se lalolagi palataiso. Ka fesoasoani atu ki a latou i konā ke ga‵solo ki mua ke oko eiloa ki te tulaga ‵lei kātoatoa i te feitu faka-te-foitino mo te feitu tau te mafaufau.​—Fakaasiga 21:​3-5.

¹⁸ Mai te tumau i te fakamaoni i te ‵toe tofotofoga i te fakaotiga o te Pulega a Iesu i te Afe Tausaga, ka sē toe ai eiloa se pogai e ‵tau ei o fakalotolotolua tatou ki pati a so se tino. (Fakaasiga 20:​7-10) Ka fakauiga eiloa Ao katoa ki te Ao, kae ko Ikai katoa ki te Ikai. Me i tino katoa kolā e ola i te taimi tenā ka fai mo fai se fakaakoakoga ‵lei kātoatoa o te ‵tou Tamana alofa faka-te-lagi, ko Ieova, “te Atua fakamaoni.”​—Salamo 31:5.

[Ata i te itulau e 29]

Mai te papatisoga ke oko eiloa ki te mate, ne fakataunu eiloa ne Iesu a mea kolā ne tauto ei a ia ki tena Tamana

[Ata i te itulau e 31]

E mata, e fakataunu eiloa ne koe a tau toe Ao tāua?