E Fai Tau Pati​—‘Ao mo fai te Ikai’?

Toe fakaataata i tou mafaufau a te suā mea tenei: Ne maua ne se mātua mo ana tamaliki e tokolua se ‵kamiga mai i se tauavaga i tena fakapotopotoga ke olo atu i se afiafi po ke ta‵fao fakatasi latou. I tena faiatuga ki ana tamaliki e uiga ki ei, ne fia‵fia ‵ki lāua. Ne ‵nofo fakatalitali eiloa lāua mo te fia‵fia ki te taimi tenā. E ui i ei, i te aso mai mua o te afi po tenā, ne fai atu te tauavaga ki te mātua me e isi se fakalavelave e seki fakamoemoegina ne sae aka, tela la, ko sē fakataunu a te ‵kamiga tenā. Ne iloa fakamuli ne tou fafine a te pogai ne ‵solo ei te ‵kamiga. Mai tua o te ‵kamiga o ia, ne ‵kami a te tauavaga ne nisi taugasoa ke olo atu ki olotou fale i te afiafi po foki tenā, kae ne talia ne lāua.

E pelā me ne Kelisiano, e ‵tau mo tatou o tausi ki ‵tou pati e fai. E se ‵tau lele o fai ne tatou te “‘ao mo fai te ‘ikai.’” (2 Koli. 1:18) E ui i ei, e pelā mo te mea e fakamatala mai i fakaakoakoga e lua konā, e se ko fakanofonofoga katoa e ‵pau. E isi eiloa ne taimi e se mafai ne tatou o fai se filifiliga ki ei kae nā ko te ‵solo fua o se fakatokaga ne fai ne tatou. E tasi te taimi ne oko a te apositolo ko Paulo ki se tulaga penā.

NE ‵LOSI ATU TE ‵SE KI A PAULO ONA KO TE ‵FULIGOFIE

A koi nofo atu a Paulo i Efeso i te tolu o ana malaga fakamisionale i te 55 T.A., ne manako tou tagata o fano i loto i te Aegean Sea ki Kolinito ko malaga ei mai konā o fano ki Maketonia. I tena auala o foki ki Ielusalema, ne palani tou tagata ke āsi atu a ia i te lua o taimi ki te fakapotopotoga i Kolinito, kāti o puke olotou meaalofa ki taina i Ielusalema. (1 Koli. 16:3) E fakaasi manino mai a te mea tenei i te 2 Kolinito 1:15, 16, telā e faitau penei: “Ne manako au o fanatu ki a koutou mo te loto malosi i te taimi muamua, ko te mea ke toe maua se taimi e fia‵fia ei koutou. Kae ke ‵nofo malie aka tatou ko fano ei au ki Maketonia, kae toe foki mai ki a koutou mai Maketonia, ko olo fakatasi ei tatou mō se taimi toetoe ko faka‵soko atu ei taku malaga ki Iuta.”

E foliga mai me ko oti ne fakailoa atu ne Paulo i se tusi ki taina i Kolinito e uiga ki tena palani. (1 Koli. 5:9) Mai tua malie eiloa o te tusiga o te tusi tenā, ne logo a Paulo mai te kaukāiga o Keloe me e ‵nofo mavae‵vae a te fakapotopotoga. (1 Koli. 1:10, 11) Ne fakaiku aka ne Paulo ke fakamafuli a tena palani, kae tusi ne ia te tusi telā e iloa nei ne tatou me ko te 1 Kolinito. Ne alofa a Paulo o fakaasi atu i loto i ei a pati polopoloki mo fakatonutonuga. Ne taku atu foki ne ia me ko oti ne ‵fuli a tena malaga, me ka fano muamua a ia ki Maketonia ko fanatu ei a ia ki Kolinito.​—1 Koli. 16:5, 6.a

E foliga mai me i te taimi ne maua ei ne taina i Kolinito a tena tusi, ne ‵losi atu ne nisi “apositolo fia ‵sili” i te fakapotopotoga tenā a te ‵se ki tou tagata ona ko te ‵fuligofie, me ne seki tausi ki ana tautoga. Ne fesili atu a Paulo e puipui ei a ia: “I te faiga o taku fakaikuga tenā, e a, ne manatu māmā au ki ei? E a, e se fai ne au a fuafuaga e pelā me se tagata, ko te mea ke fai atu au ‘Ao, Ao’ kae fakamuli ko fai atu ‘Ikai, Ikai’?”​—2 Koli. 1:17; 11:5.

E mafai ne tatou o fesili ifo, e mata, “ne manatu māmā” tonu a te apositolo ko Paulo ki fakanofonofoga konei? Ikai! A te pati telā ne ‵fuli ki te “māmā” e maua i ei te manatu ki te ‵fuligofie, e pelā me e se fakatuagagina a te tino, e se tausi ki ana tautoga. Mai luga i te fesili a Paulo “e a, e se fai ne au a fuafuaga e pelā me se tagata?” ne ‵tau o maina a Kelisiano i Kolinito me i te fakaikuga a Paulo ke ‵fuli ana palani ne seki pogai mai luga i te sē fakatuagagina o ia.

Ne tusi mai a Paulo e faka‵se ei ne ia a te ‵losiga: “A te Atua e fakamaoni ko te mea ke se fai te motou ‘Ao’ mo fai te motou ‘Ikai.’” (2 Koli. 1:18) E mautinoa, me ne nofo loa mo Paulo i tena loto a te fiafia lasi ki ana taina mo tuagane i Kolinito i te taimi ne ‵fuli ei ana fakatokaga. I te 2 Kolinito 1:23, e faitau ne tatou i ei te pogai ne ‵fuli ne tou tagata a tena palani muamua ke fano ki Kolinito, ko te mea ‘ke se fanoa‵noa latou.’ E tonu, ne tuku atu ne ia se avanoaga ki a latou ke faka‵tonu a mea a koi tuai o oko atu a ia. E pelā mo te mea ne fakamoemoe tou tagata ki ei a koi nofo atu a ia i Maketonia, ne logo Paulo i a Tito me ne fakamalosi tonu atu a tena tusi ke fanoa‵noa kae sala‵mo latou, kae ne fiafia malosi a ia.​—2 Koli. 6:11; 7:5-7.

NE FAI ATU TE “AMENE” KI TE ATUA

Kāti ne fakauiga a te ‵losiga e uiga ki te ‵fuligofie me kafai e sē fakatuagagina a Paulo i te tausi ki ana tautoga i aso takitasi o te olaga, e se mafai foki o fakatalitonugina a ia i tena galuega talai. E ui i ei, ne fakamasaua atu a Paulo ki te kau Kolinito me ne talai atu ne ia a Iesu Keliso ki a latou. “Me i te Tama a te Atua, ko Keliso Iesu, telā ne talai atu ki a koutou, e auala i a matou, ko tena uiga ko matou mo Suliano mo Timoteo, ne seki fai mo fai te ‘Ao’ kae fakamuli ifo ko te ‘Ikai’ i te feitu tenei.” (2 Koli. 1:19) E mata, a te tino telā ne fakaakoako a Paulo ki ei, ko Iesu Keliso, e se fakatuagagina i so se mea? Ikai! Ne faipati faeloa a Iesu ki te munatonu i tena olaga kātoa mo te galuega talai. (Ioa. 14:6; 18:37) Kafai ne ‵tonu kae fakatuagagina katoatoa a mea kolā ne talai ne Iesu kae ne talai foki ne Paulo a te fekau eiloa tenā, ko tena uiga ne fakatuagagina foki a te talaiga a te apositolo.

Ao, a Ieova ko “te Atua fakamaoni.” (Sala. 31:5) E lavea ne tatou a te mea tenei i mea kolā ne tusi mai ne Paulo: “Faitalia te uke o folafolaga a te Atua ne fai mai, ne fai katoa eiloa mo fai te Ao e auala i a ia,” ko tena uiga, e auala i a Keliso. A te fakamaoni katoatoa o Iesu i tena nofoga i te lalolagi ne faka‵ma aka i ei so se māfuaga o te fakalotolotolua e uiga ki tautoga a Ieova. E toe fai mai a Paulo: “E auala foki i a ia [Iesu] ne fai atu ei matou penei ‘Amene’ ki te Atua, e avatu ei ki a ia a te ‵malu e auala i a matou.” (2 Koli. 1:20) A Iesu ko te fakamaoniga totino, io me ko te “Amene,” telā ka fakataunu ki ei a tautoga katoa a Ieova te Atua e fai!

E pelā mo Ieova mo Iesu e fai‵pati faeloa ki te munatonu, ne fakauiga faeloa ne Paulo ana pati e fai. (2 Koli. 1:19) E se ‵fuligofie a ia, te tino telā ne fai ana tautoga “e pelā me se tagata.” (2 Koli. 1:17) I lō te fai penā, ne ‘sasale a ia i te agaga.’ (Kala. 5:16) I ana faifaiga ki nisi tino, ne nofo loa mo ia i tena loto a mea kolā e fia‵fia malosi latou ki ei. Ne fakauiga eiloa a tena Ao ki te Ao!

E MATA, E FAKAUIGA TAU AO KI TE AO?

I aso nei, se mea masani ke fai ne tino kolā e se ola e ‵tusa mo fakatakitakiga fakavae mai te Tusi Tapu a tautoga, kae oti aka, ko ofa ei ne latou māfai e isi se fakalavelave foliki io me se mea e fia‵fia ki ei e sae aka. I mea tau pisinisi, e se fakauiga faeloa a te “ao” ki te “ao,” māfai foki loa ko oti ne tusi ki lalo ke fakapa‵tonu ei a feagaiga ne fai. E tokouke a tino ko sē ‵kilo atu ki te fakaipoipoga e pelā me se feagaiga ne fai i te vasia o tino e lua, se tautoga e oti i te mate. I lō te fai penā, e fakaasi mai i te makini ki luga a te aofaki o te talaga o avaga me i te tokoukega o tino e ‵kilo atu ki te fakaipoipoga e pelā me se ‵sai fakatasiga ne sōnafai kae e faigofie ke tiakina. ​—2 Timo. 3:1, 2.

Kae e a koe? E mata, e fakauiga tau Ao ki te Ao? E tonu, e pelā mo te mea ne mafau‵fau tatou ki ei i te kamataga o te mataupu tenei, e mafai o sē fakataunu ne koe se fakatokaga ne fai, e se ona ko koe e ‵fuligofie, kae ona ko tulaga kolā e se mafai o pule atu tatou ki ei. Kae kafai koe se Kelisiano e fai se tautoga io me se feagaiga, e ‵tau eiloa mo koe o fai a te ‵toe mea e mafai ne koe ke tausi ki ei. (Sala. 15:4; Mata. 5:37) Kafai e fai koe penā, ka lauiloa koe e pelā me se tino e fakatuagagina, se tino e tausi ki au pati, se tino telā e faipati faeloa ki te munatonu. (Efe. 4:15, 25; Iakopo. 5:12) Kafai e iloa ne tino me e fakatalitonugina koe i au mea e fai i aso takitasi, kāti ka loto fia‵fia malosi latou o fakalogo‵logo māfai e talai atu ne koe ki a latou a muna‵tonu e uiga ki te Malo o te Atua. Tela la, ke nā fakamautinoa ne tatou me e fakauiga tonu eiloa ‵tou Ao ki te Ao!