Fesili 1: E Mata, e Isi se Aoga o Toku Olaga?
A LOSALINI, telā ne tupu aka i Egelani, ne manako malosi ke maua ne ia te poto. Ne manako foki a ia o fesoasoani atu ki tino. I te otiga mai te akoga, ne maua ne ia se galuega tāua telā ne aofia i te fesoasoani atu ki tino e seai ne olotou fale, kae ne fesoasoani atu foki tou fafine ki a latou kolā e se katoatoa kae sē mafai o tauloto. Faitalia me ne maua ne ia se galuega tāua kae tokagamalie ei a ia i te feitu faka-te-foitino, e fai mai tou fafine, “E uke tausaga ne mafaufau ei au, ‘Kaia e ‵nofo ei tatou i konei?’ kae ‘Se a te aoga o te olaga?’”
Kaia e ‵tau ei o ‵sili atu te fesili tenā? E se ‵pau a tino mo manu kolā e se mafai o fakasako‵sako atu. E mafai ne tatou o tauloto mai mea ko ‵teka, palani mō te taimi mai mua, kae ‵sala ke maua se mea aoga i ‵tou olaga.
Ne a pati a nisi tino me se a te tali? E mafau‵fau a tino e tokouke me i te ‵toe mea tāua i te olaga ko te mauaga o te maumea io me se tulaga takutakua ko mafai ei o maua te fiafia.
Se a te mea e fakauiga ki ei a te tali tenā? E ‵tau o fakamuamua a ‵tou manakoga totino i te olaga. E tāua atu ‵tou manakoga i lō te faiga o te loto o te Atua.
Se a te mea e akoako mai i te Tusi Tapu? Ne maumea ‵ki a te tupu ko Solomona kae fiafia kae ne iloa aka ne ia me e seai eiloa se mea aoga ne maua mai i mea konā. Ne fakaasi mai ne ia a te mea telā e maua tonu i ei a te aoga o te olaga: “I te otiga ne kilokilo au ki mea katoa konā, e tasi eiloa taku muna e fai atu: Ma‵taku ki te Atua, kae tausi ki ana fakatonuga, me e tenā eiloa te pogai ne faite ei a te tagata.” (Failauga 12:13) Se a la te mea e aofia i te tausiga o tulafono a te Atua?
Ke fia‵fia tatou i te olaga se vaega o te fuafuaga a te Atua mō tatou. Ne tusi mai a Solomona: “A te mea tafasili e ‵tau o fai ne te tino ko te kai, inu kae fakafiafia ki mea ko oti ne maua ne ia i ana galuega. A te mea tenā e vau foki mai i te Atua.”—Failauga 2:24.
E manako foki te Atua ke a‵lofa tatou kae tausi atu ki ‵tou kāiga. Ke onoono ki takitakiga aoga kae faigofie kolā ne tuku mai ki tino taki tokotasi i te kāiga.
“E ‵tau . . . o a‵lofa a tāgata ki olotou avaga e pelā eiloa me ko olotou foitino ‵tonu.”—Efeso 5:28.
“E ‵tau o lasi te āva o te fafine ki tena avaga.”—Efeso 5:33.
“Tama‵liki, ke faka‵logo koutou ki otou mātua.”—Efeso 6:1.
Kafai e fakagalue ne tatou a fakatakitakiga faka-te-Tusi Tapu konā, ka maua eiloa ne tatou se fiafia mo te lotomalie. E ui i ei, a te ‵toe mea tāua e mafai o fai ne tatou ko te tauloto ki mea katoa e mafai ne tatou e uiga ki te ‵tou Māfuaga kae fakapili‵pili atu ki a ia e pelā me se Taugasoa o tatou. E ‵kami tatou ne te Tusi Tapu ke “fakapili‵pili atu ki te Atua.” Tenā ne fai mai ei a te tautoga fakaofoofogia tenei: “Kae ka fakapilipili mai a ia ki a koutou.” (Iakopo 4:8) Kafai e talia ne koe a te ‵kamiga tenei, ka aoga tonu eiloa tou olaga.
Ke maua ne koe ne fakamatalaga e uke atu e uiga ki te auala e mafai ei o ola koe i se auala telā e fakafiafia atu ki te Atua, ke onoono ki te mataupu e 12 o te tusi ko te Ne a Mea e Akoako ‵Tonu Mai i te Tusi Tapu? Ko mafai foki o maua i te www.jw.org
[Ata i te itulau e 5]
Ne a Muna a Iesu e Uiga ki te Aoga o te Olaga?
Ne seki fakalotolotolua a Iesu ki te aoga o te olaga. Ana muna: “Tenā te pogai ne fanau mai ei au, kae tenā foki te pogai ne vau ei au ki te lalolagi, ko te mea ke molimau atu au ki te munatonu.” (Ioane 18:37) Ne fakamāumāu ne Iesu a tena olaga i te akoakoga o tino ki te munatonu e uiga ki te Atua mo Ana fuafuaga.
Ka aoga tonu ‵tou olaga māfai e tau‵tali tatou i te fakaakoakoga a Iesu. A te tonuga loa, e ‵kami tatou ne Iesu ke tauloto mai i a ia. (Mataio 11:29) Ke mafau‵fau ki auala e lua e mafai ei o fai tatou penā.
Ke maua ne tatou a te fiafia, ne akoako mai a Iesu me e ‵tau o “iloa ‵lei ne [tatou ‵tou] manakoga faka-te-agaga.” (Mataio 5:3) E mafai o fakama‵lie aka ne tatou a ‵tou manakoga faka-te-agaga māfai e tauloto ne tatou a te iloaga e uiga ki “te Atua tonu e tokotasi, penā foki loa mo te tino telā ne uga mai ne [ia], ko Iesu Keliso.”—Ioane 17:3.
Ne fakatonu atu a Iesu ki ana soko ke akoako atu a nisi tino ki mea kolā ko oti ne tauloto ne latou. Ana muna: “Tela la, olo atu koutou ki fenua katoa o fai a tino i ei mo fai a soko, kae papatiso atu latou i te igoa o te Tamana mo te Tama mo te agaga tapu, akoako atu latou ke faka‵logo ki mea katoa ne fakatonu atu ne au ki a koutou.”—Mataio 28:19, 20.
A latou kolā ne fakama‵lie aka olotou manakoga faka-te-agaga mai te sukesuke ki te Tusi Tapu kae fakagalue aka a mea kolā ne tauloto ne latou, ko maua ne latou se olaga tai ‵lei atu. E tali‵tonu latou me ka aoga tonu olotou olaga māfai e kamata latou o fesoasoani atu ki nisi tino ke tauloto e uiga ki te Atua.