“Ne Matea ne au, a ko Au e se Malamalama i ei”

I te taimi koi pepe ei au, ne māvae oku mātua, kae ko toku mātua ne puti tokotasi aka eiloa ne ia au mo oku taina ma‵tua e tokolua mo te motou tuagane. I te taimitenā, a tamaliki ‵tuli i Falani e seki akoako i te auala telā ko akoako ei latou i aso nei, kae i nisi taimi e iku atu ki logo‵maega e uke a auala kolā e fakaaoga i ei. E ui i ei, ne maua ne au se feitu ‵lei telā ne seki maua ne tino ‵tuli e tokouke talu mai taku folikiga. Ke fakamatala atu ne au.

Mō se taimi tai mata leva, ne tali‵tonu a faiakoga me e ‵tau o akoako a tamaliki ‵tuli mai te faimālō ke fai‵pati kae taumafai ke malamalama i pati a te faiakoga mai te kilo‵kilo ki laugutu o te faiakoga. A te tonuga loa, i te koga telā ne tupu aka ei au i Falani, e tapu ‵ki eiloa te fakaaogaga o te ‵gana fai tāga i loto i te akoga. A nisi tamaliki a‵koga e ‵sai olotou lima ki olotou tua i te taimi e fai ei a mataupu.

I nāi tausaga muamua eiloa o toku olaga, ne fakamāumāu ne au se fia o itula i vaiaso takitasi fakatasi mo se tino poto i te fakaakoakoga o tino ke fai‵pati. Ne puke ne ia toku ulu io me ko te kauvae kae faimālō mai ke fai se leo telā e se mafai o lagona ne au. Ne seki mafai o fesokotaki atu au ki nisi tamaliki. Konā la a tausaga ne logo‵mae ei au.

I te taimi ko ono ei oku tausaga, ne ave au ki se akoga fakapito telā e ‵nofo eiloa a tamaliki i loto i te akoga. Ko te taimi muamua eiloa ne fesokotaki ei au mo tama‵liki ‵tuli. I konei foki, e tapu a te ‵gana fai tāga. Kafai e fai motou tāga i te taimi o te mataupu, e ‵kini a motou tuālima io me ‵futi motou laulu. E ui i ei, ne fesokotaki ‵muni eiloa matou mai te fakaaogaga o tāga kolā ne faite eiloa ne matou. I te fakaotiga, ne mafai ne au o fesokotaki atu ki nisi tamaliki. Tela la, ne kamata mai konā a tausaga e fa ne fiafia ei au.

I te katoaga o toku sefulu tausaga, ne ave au ki se akoga lasaga muamua fakatasi mo tamaliki kolā e se ‵tuli. Au ne sē fiafia ‵ki eiloa. Ne mafaufau au me i tamaliki ‵tuli katoa ko oti ne ‵mate kae ko au fua koi ‵toe i te lalolagi. Mai te tau‵tali ki te fautuaga a te tino poto i te akoako o tino ke fai‵pati, ne seki tauloto ei a toku kāiga ki te faipati ki tāga kae ne seki talia foki ke fesokotaki atu au ki tamaliki ‵tuli. Koi masaua ne au se taimi ne āsi atu ei au ki se tokita e fakapitoa loa ki te fakalogologo. E isi sena tusi o te ‵gana fai tāga i luga i tena taipola. I te mateaga ne au a te ata i te ‵kava, ‵tusi atu au ki ei kae fai atu, “Au e manako ki ei!” Se mea vave eiloa o ‵funa ne te tokita a te tusi.a

TOKU KAMATAGA FAKA-TE-AGAGA

Ne taumafai te motou mātua o puti aka matou ki fakatakitakiga faka-Kelisiano. Ne ave matou ne tou fafine ki fakatasiga a te Fakapotopotoga o Molimau a Ieova i Mérignac, e pili ki Bordeaux. E pelā me se tamaliki, e se lasi toku malamalama i fakatasiga. E ui i ei, ne fakasolosolo a tino i konā o saga‵saga i oku tafa ke tusi ki lalo a mea kolā ne faipatigina. Ne otia toku loto i te lotou a‵lofa mo te ‵saga tonu mai. I te fale, ne fai ne toku mātua a taku akoga faka-te-Tusi Tapu, kae ne seki malamalama katoatoa eiloa au i mea kolā ne akoako mai ki a au. Ko tai pelā au mo te pelofeta ko Tanielu, telā ne fai mai i te otiga ne maua ne ia se valoaga mai i se agelu: “Ne lagona ne au au muna ne fai, ka ko au e se malamalama i ei.” (Tanielu 12:8) Kae ki a au, “Ne matea ne au, a ko au e se malamalama i ei.”

E ui i ei, ne tauloto malielie eiloa ne au a nisi muna‵tonu fakavae i te Tusi Tapu. Ne fakatāua ne au a mea kolā ne malamalama tonu au i ei kae taumafai o fakagalue a mea konā i toku olaga. Ne tauloto foki au mai te onoono ki amioga a nisi tino. Pelā me se fakaakoakoga, e fai mai te Tusi Tapu ki a tatou ke kufaki. (Iakopo 5:7, 8) Ne seki malamalama tonu au me se a te kufaki. Kae mai te kilokilo atu ki tino tali‵tonu e fakaasi mai ne latou a te uiga tenei, ne mafai ei o malamalama au i te uiga o te kufaki. E tonu, ne aoga ‵ki eiloa a te fakapotopotoga Kelisiano ki a au.

E FAKAFANOANOA KAE SE MEA FAKAPOI FAKAOFOOFOGIA

I te aso e tasi, a ko au koi talavou i ei, ne matea ne au a talavou ‵tuli i te auala e fai‵pati ki tāga. Ne kamata au o fesokotaki ‵muni ki a latou kae tauloto ki te French Sign Language (‵gana Falani fai tāga). Ne kau faeloa au ki fakatasiga Kelisiano, tenā ne fiafia mai ei se talavou Molimau e tokotasi ki a au, ko Stéphane. Ne taumafai malosi tou tagata o fesokotaki mai ki a au, kae ne pili ‵ki te mā fesokotakiga. Kae e tiga te feitu tenā, ne faka‵tali mai ki a au se mea fakafanoanoa lasi ‵ki. Ne ‵tau o fano a Stéphane ki te falepuipui me e ita ma kau ki te kautau. Au ne sē fiafia ‵ki eiloa! Me ko galo a Stéphane, ne loto vāivāi au kae toeitiiti kae fakagata te kau ki fakatasiga.

I te sefulutasi masina mai tua ifo, ne ‵tala mai a Stéphane kae vau ki te fale. Mafaufau ki toku poi i te taimi ne fesokotaki mai ei a Stéphane ki a au i te fakaaogaga o te ‵gana fai tāga. Au e se talitonu ki te mea ne matea ne au! Se a te mea ne tupu? Ne tauloto a Stéphane ki te FSL i te falepuipui. Ne kilokilo atu au ki te gasuesuega o lima o Stéphane mo foliga o ana mata, kae tupu aka ei a toku fiafia me kafai e mafaufau au ki mea katoa konā, ne fai eiloa mō oku.

KO MALAMALAMA I MUNA‵TONU I TE TUSI TAPU I TE FAKAOTIGA

Ne kamata o suke‵suke fakatasi māua mo Stéphane ki te Tusi Tapu. Mai te taimi tenā o fano ki mua ne kamata ei au o ‵soko tasi a muna‵tonu i te Tusi Tapu kolā ne tauloto muamua ne au. E pelā me se tamaliki, ne fiafia au o kilokilo ki ata ‵gali i ‵tou lōmiga faka-te-Tusi Tapu, fakatusatusa a tino i loto i ata kae sukesuke ki fakamatalaga likiliki katoa ko te mea ke ‵mau a tala i toku mafaufau. Ne iloa ne au a mea e uiga ki a Apelaamo, tena “fanau,” mo te “vaitino e tokouke,” kae e mafai fua o malamalama tonu au i uiga o mea konei māfai e matea ne au me e fakamatala mai i te ‵gana fai tāga. (Kenese 22:15-18; Fakaasiga 7:9) E fakaasi mai i ei me ko maua ne au a taku ‵gana, te ‵gana telā e manako ki ei toku loto.

Nei la, ona ko te mea ko mafai o malamalama au i mea kolā e fai i fakatasiga, ne otia toku loto kae ko manako malosi au o tauloto ki mea e uke atu. Fakatasi mo te fesoasoani o Stéphane, ne gasolo aka faeloa ki luga a toku malamalama i te Tusi Tapu, kae i te 1992, ne tuku atu ei toku ola ki a Ieova te Atua kae papatiso. Faitalia toku gasolo ki mua, koi ma eiloa au kae faigata ke fesokotaki atu ki nisi tino me ne seki mafai ne au o fesokotaki atu ki nisi tino e pelā me se tamaliki.

TAKU TAUA KI TE MATA MA

I te fakaotiga loa, ne ‵kau fakatasi te potukau foliki o tino ‵tuli telā e kau au i ei mo se fakapotopotoga i Pessac, se kogā koga i Bordeaux. E ui eiloa koi taua malosi atu au ki toku vāivāiga ko te fesokotaki atu, e fakaeteete malosi oku taugasoa kolā e ‵logo olotou taliga ko te mea ke malamalama au i mea katoa. Ne taumafai se tauavaga, ko Gilles mo Elodie, o fesokotaki mai ki a au. E ‵kami faeloa ne lāua au ke ‵kai io me inu kōfe fakatasi mo lāua mai tua o fakatasiga, i te auala tenā e ati aka i ei se va fakataugasoa fakaofoofogia. Se mea fakafiafia ke nofo atu i va o tino kolā e tau‵tali i auala a‵lofa o te Atua!

Tenei te fakapotopotoga ne fetaui ei au mo Vanessa. Ne tosina atu toku loto ona ko tena alofa mo te fai mea tonu. Ne seki kilo mai tou fafine ki toku ‵tuli e pelā me se mea faigata ke fesokotaki mai, kae e pelā me se auala ke tauloto ei a ia o fesokotaki ki se tino ‵tuli. Ne fia fai au ki tou fafine, kae ne avaga māua i te 2005. E ui eiloa e faigata ke fesokotaki faka‵lei atu au, ne fesoasoani mai a Vanessa ke taua atu au ki toku mata ma kae ke fakaasi tonu atu oku lagonaga. E amanaia tonu au ki te ‵lago mai o tou fafine ke fai ne au oku tiute.

TE SUĀ MEAALOFA MAI I A IEOVA

I te tausaga ne avaga ei māua, ne ‵kami au ne te ofisa lagolago o Molimau a Ieova i Louviers i Falani, ke fanatu au o akoga ki galuega ‵fuli tusi i se masina e tasi. I tausaga fakamuli nei, ne ga‵lue malosi a te ofisa lagolago o faite a nāi lōmiga ki DVD i te ‵gana Falani fai tāga. Kae ona ko te uke o galuega, ne manakogina ei ne tino fakaopoopo ki te potukau ‵fuli tusi.

Ne ma‵natu aka māua mo Vanessa me i toku galue i te ofisa lagolago se tauliaga lasi ‵ki kae se meaalofa mai i a Ieova te Atua, kae e taku tonu atu ne au me i a māua ne manava‵se. Kae e pefea la te motou potukau i te ‵gana fai tāga? Se a te mea ka fai ne māua ki te mā fale? E mata, ka maua ne Vanessa se galuega i te koga tenā? I se auala fakaofoofogia, ne tuku mai eiloa ne Ieova se faka‵leiga ki fakalavelave takitasi konā. Ne lagona tonu ne au te alofa o Ieova ki a māua mo tino ‵tuli.

NE ‵LAGO KI EI A TINO LOTO TASI

Ona ko toku aofia i te galuega ‵fuli tusi, ne mafai ei o malamalama faka‵lei au i mea katoa kolā ne fai ke fesoasoani atu i te feitu faka-te-agaga ki tino ‵tuli. Kae se mea fakafiafia ke lavea atu a tino ga‵lue e tokouke e taumafai o fesokotaki mai ki a au! Ne otia toku loto i nāi tāga ne tauloto ne latou kae taumafai o fakaaoga. Ne seki ai eiloa soku lagonaga i a au ko tuku tiaki. A faiga a‵lofa katoa konā se fakaasiga o te loto tasi sē fuafuagina telā e maua i va o tino o Ieova.​—Salamo 133:1.

E fakafetai au ki a Ieova me e auala i te fakapotopotoga Kelisiano, ne fai faeloa ne ia ke isi se tino e fesoasoani mai ki a au. Ne fakafetai foki au ki te tusaga foliki ne fai ne au o fesoasoani atu ki oku taina ‵tuli ke iloa ne latou a ‵tou Mafuaga alofa kae ke fakapili‵pili atu ki a ia. E fakamoemoe eiloa au ki te aso telā ka fakaseai ei a tapula katoa ki fesokotakiga kae ka fai‵pati a tino katoa ki te “‵gana ‵ma”​—ko muna‵tonu e uiga ki a Ieova te Atua mo ana fuafuaga​—e pelā me se vaega o te kaukāiga ‵kaufakatasi o tino.​—Sefanaia 3:9.