“Se a te ‵Toe Tulafono Sili?”

Se a te mea e ‵tau o fai ke fakafiafia atu ki te Atua? E mata, e uke ‵ki eiloa a tulafono e ‵tau o tau‵tali tatou ki ei? A te tali ki ei ko te ikai. E ‵tusa mo pati a te Tama eiloa a te Atua, ko Iesu Keliso, a mea kolā e manako mai te Atua ke fai ne tatou e mafai fua o tuku fakatasi ki se pati e tasi.​—Faitau te Maleko 12:28-31.

Mafaufau muamua ki pati a Iesu. Ne akoako atu a ia i loto i te faletapu i a Nisani 11, i nāi aso fua mai mua o tena mate. Ne taumafai ana fili o salasala sena mea ‵se mai te faiga o nisi fesili kolā e ‵tupu i ei a kinauga. I taimi takitasi ne fesili atu ei latou, ne ‵pono ne ia olotou gutu ki ana tali. Oti aka, fesili atu ei ne latou ki a Iesu a te fesili tenei: “Se a te ‵toe tulafono sili?”​—Fuaiupu e 28.

A te mea tenā se fesili e faigata. Ne fai manatu a nisi tino Iutaia me se a te ‵toe tulafono sili io me tāua, i tulafono e silia atu i te 600 kolā ne faite ki ei te Tulafono a Mose. E foliga mai me e toko sefululua ne lotoma‵lie me i tulafono katoa e ‵pau te tāua kae se mea ‵se ke fakatāua atu a nisi tulafono i lō nisi tulafono. Ka pefea te tali a Iesu ki te fesili?

I tena tali, ne seki taku mai fua ne Iesu se tulafono e tasi, kae ne taku mai ne ia a mea e lua. Te mea muamua, ne fai mai a ia: “E ‵tau mo koe o alofa ki a Ieova tou Atua mo tou loto kātoa, mo tou foitino kātoa, mo tou mafaufau kātoa, mo tou malosi kātoa.” (Fuaiupu e 30; Teutelonome 6:5) A tugāpati ko te “loto,” “mafaufau,” “foitino,” mo te “malosi” e mafai o ‵pau a te fakauigaga.a Tenei tena uiga: E ‵tau o aofia i te alofa ki a Ieova a te tino mo ana mea katoa kolā e mafai o fai mo mea katoa kolā e maua ne ia. E fai mai penei te mau i se Tusi Tapu e tasi: “A te Atua e ‵tau eiloa o katoatoa te alofa ki ei.” Tela la, kafai koe e alofa ki te Atua, ka fai ne koe a te ‵toe mea e mafai o fai ke ola i aso takitasi i se auala telā e talia ne ia.​—1 Ioane 5:3.

A te lua o mea, muna a Iesu: “E ‵tau mo koe o alofa ki tou tuakoi e pelā mo koe ki a koe eiloa.” (Fuaiupu e 31; Levitiko 19:18) A te alofa ki te Atua mo te alofa ki tuakoi e ‵soko tasi eiloa. A te alofa ki tuakoi ko te ikuga o te alofa ki te Atua. (1 Ioane 4:20, 21) Kafai e a‵lofa tatou ki ‵tou tuakoi e pelā mo ‵tou a‵lofa ki a tatou eiloa, ka fai faka‵lei atu tatou ki a latou i te auala telā e ma‵nako tatou ke fai mai ne latou ki a tatou. (Mataio 7:12) I te auala tenā, e fakaasi atu ei ne tatou a ‵tou a‵lofa ki te Atua telā ne faite ne ia tatou​—mo latou​—ki ana foliga.​—Kenese 1:26.

E pefea te tāua o tulafono ke a‵lofa ki te Atua mo tuakoi? “E seai se mea e sili atu i tulafono e lua konei,” ko muna a Iesu. (Fuaiupu e 31) I se fakamatalaga tai ‵pau, ne fai mai a Iesu me i nisi tulafono katoa e fakavae ki tulafono e lua konei.​—Mataio 22:40.

A te fakafiafia atu ki te Atua e se faigata. A mea katoa kolā e manako mai a ia ke fai ne tatou e mafai o tuku fakatasi ki se pati e tasi: alofa. Ne fai faeloa a te mea tenā​—kae ka fai faeloa​—mo fai te fakavae o te tapuakiga tonu. Kae ko te alofa e se fai fua i pati io me ko lagonaga; e ‵tau o fakaasi atu i faiga. (1 Ioane 3:18) Kaia e se tauloto ei koe ki te auala e mafai ei ne koe o ati aka kae fakaasi atu tou alofa ki a Ieova, te Atua telā “ko te alofa eiloa”?​—1 Ioane 4:8.