E Mata, e Mafai Eiloa o Maua se Olaga Aoga?

KO OKO eiloa i te ‵tonu o pati konā! E ‵fonu faeloa te olaga i te lalolagi tenei i te “fanoanoa mo te puapuaga.” E se taumate ne mafaufau aka koe penei, ‘E mata, e mafai foki eiloa o maua se olaga aoga i te taimi nei?’

Mafaufau ki te fakaakoakoga a Maria. A ia se tino e malosi ‵ki, kae nei la i te taimi ko 84 ei ana tausaga, ko sē mafai ne tou fafine o fano ki tua mo te fale i a ia eiloa. E malosi a tena mafaufau, kae ko tena foitino ko sē malosi. E mafai pefea o mafaufau tou fafine me i te vaegā olaga tenā e aoga?

Kae e a koe? Kāti ko oti ne fesili ifo koe ki a koe eiloa i nisi taimi e uiga ki te aoga o tou olaga. Kāti e fakafokifoki faeloa a tau galuega, e fakafi‵ta, kae faka‵fiu foki. Kāti e se fia ‵saga mai a tino e tokouke ki au taumafaiga io me ko au galuega. Kafai foki ko tai ‵lei a te olaga i te taimi nei, kāti koi manavase eiloa koe ki te taimi mai mua o koe. I nisi taimi, kāti ko nofo tokotasi koe io me māfatia. Kāti e pokotia loa tou olaga nofo kāiga i taua mo fakalavelave. Kāti ko oti ne mate atu sou tino pele. Ne pili ‵ki a André ki tena tamana, telā ne masaki kae mate. Se mea fakafanoanoa ‵ki ki a André, kae ne manatu aka tou tagata me e se mafai o faka‵lei aka a te tulaga fakapoi kae fakafanoanoa tenā.

Faitalia me se a te fakalavelave e fe‵paki mo tatou, e isi se mea telā e ‵tau ke iloa ne tatou: E mata, e mafai eiloa o maua se olaga aoga? E maua ne tatou a te tali i te olaga o se tagata telā ne ola i te lalolagi nei i se 2,000 tausaga ko ‵teka​—ko Iesu Keliso. Faitalia a mea katoa ne fe‵paki mo ia, ne aoga tonu eiloa te olaga o Iesu. E penā foki tatou māfai e tau‵tali tatou i tena fakaakoakoga.