TALI KI FESILI MAI TE TUSI TAPU
E mata, e mafai o iloa ne tatou te munatonu e uiga ki te Atua?
Kaia e Manako ei te Atua ke Iloa ne Tatou a te Munatonu? Faitau te Ioane 17:3
Ne fesokotaki sāle a te Atua mo tino. Ne fakaaoga ne ia tena agaga tapu, io me ko tena malosi galue ke fakaasi atu ana mafaufauga ki mafaufau o tino kolā ne tusi ne latou a te Tusi Tapu. (2 Petelu 1:20, 21) E mafai o iloa ne tatou te munatonu e uiga ki te Atua mai te faitau ki te Tusi Tapu.—Faitau te Ioane 17:17; 2 Timoteo 3:16.
I loto i te Tusi Tapu, e fakaasi mai i ei ne te Atua a mea e uiga ki a ia eiloa. E fakaasi mai i ei a te pogai ne faite ne ia a tino, ana fuafuaga mō tino, mo te vaegā olaga e manako a ia mō tatou. (Galuega 17:24-27) E manako a Ieova te Atua ke iloa ne tatou te munatonu e uiga ki a ia.—Faitau te 1 Timoteo 2:3, 4.
Kaia e ‵kami atu ei ne te Atua a tino kolā e a‵lofa ki te munatonu?
A Ieova ko te Atua o te munatonu, kae ne uga mai ne ia tena Tama ko Iesu ke akoako a tino e uiga ki te munatonu. A tino kolā e a‵lofa ki te munatonu e tosina atu ki a Iesu. (Ioane 18:37) E manako a te Atua ki vaegā tino penā mo fai ana tino tapuaki.—Faitau te Ioane 4:23, 24.
Ko oti ne taumafai a Satani te Tiapolo ke mo a ma iloa ne tino a te Atua mai te fakasalalau atu o akoakoga ‵loi e uiga ki te Atua. (2 Kolinito 4:3, 4) A tino kolā e se a‵lofa ki te mea ‵lei e tosina atu ki akoakoga ‵se. (Loma 1:25) Kae e maua ne te fia miliona o tino fakamaoni a te munatonu e uiga ki te Atua mai te sukesuke ki te Tusi Tapu.—Faitau te Galuega 17:11.