E Mata, e Atafai Tonu Atu a Ieova ki a Koe?

“A te ‵toe mea telā e fakalavelave mai ke fakapilipili atu au ki te Atua ko lagonaga i au e se aoga.” Ko pati a se fafine e tokotasi telā ne faigata o talitonu me mafai o atafai atu a Ieova ki a ia. E penā foki ou lagonaga? Kafai e penā, kāti ka fai aka koe penei, ‘E mata, e atafai tonu atu a Ieova ki ana tino tapuaki taki tokotasi?’ A te tali ki ei ko te ao! E fakatalitonu ne tatou a te atafai tonu mai o Ieova i pati a Iesu.​—Faitau te Ioane 6:44.

Ne a pati a Iesu, telā e iloa ‵lei atu ne ia a uiga totino mo te loto o Ieova i lō so se tino aka? (Luka 10:22) Ne fakamatala mai ne Iesu: “E seai se tino e vau ki a au seiloga ke talia a ia ne te Tamana, telā ne uga mai ne ia au.” Tela la, e se mafai o fai tatou mo soko o Keliso​—mo se tino tapuaki o te ‵tou Tamana faka-te-lagi, ko Ieova​—vaganā ke ‵futi atu tatou ne Ieova. (2 Tesalonia 2:13) Kafai e malama‵lama tatou i te mea e fakauiga ki ei a Iesu, ka lavea ne tatou i ei a fakamaoniga o te atafai tonu mai o te Atua.

Se a te uiga me e ‵futi atu tatou ne Ieova? A te veape Eleni telā ne ‵fuli ki te “‵futi” ne fakaaoga foki ki te ‵futiga o te tili e ‵fonu i ika. (Ioane 21:6, 11) E mata, e ‵futi mālō tatou ne Ieova, o fai mālō tatou ke tavini atu ki a ia? Ikai. Ne tuku mai ne Ieova a te saolotoga ki a tatou, tela la, e se fai mālō ne ia a ‵tou loto. (Teutelonome 30:19, 20) E iloilo ne Ieova a te fia piliona o loto i te lalolagi tenei, o salasala ki tino taki tokotasi kolā e ‵sala atu ki a ia. (1 Nofoaiga Tupu 28:9) Kafai e maua ne ia se tino penā, e tali atu a ia i se auala alofa. E pefea la?

E takitaki malielie mai ne Ieova a te loto o se tino telā e “loto ‵lei.” (Galuega 13:48) E lua auala e fai ei ne Ieova a te mea tenā​—e auala i te fekau o te tala ‵lei mai te Tusi Tapu telā e oko mai ki a tatou taki tokotasi, mo tena agaga tapu. Kafai e lavea ne Ieova se loto o te tino e talia ne ia a te munatonu mai te Tusi Tapu, e fakaaoga ne ia a tena agaga tapu ke fesoasoani atu ki te tino tenā ke puke ‵mau kae fakagalue a te munatonu tenā i tena olaga. (1 Kolinito 2:11, 12) E aunoa mo te fesoasoani o te Atua, e se mafai lele o fai tatou mo fai ne soko tonu o Iesu mo tino tapuaki tukugina atu o Ieova.

Se a la te mea e akoako mai ne pati a Iesu i te Ioane 6:44 ki a tatou e uiga ki a Ieova te Atua? E ‵futi mai ne Ieova a tino me e lavea ne ia se mea ‵lei i olotou loto kae atafai atu ki a latou taki tokotasi. A te malamalama i te munatonu tenei ne fakamafanafana atu ki te fafine telā ne taku atu i te kamataga. Muna a tou fafine: “A te fai mo tavini a Ieova ko te ‵toe tauliaga maluga e mafai o maua ne se tino. Kae kafai ne filifili au ne Ieova ke fai mo ana tavini, ko tena uiga, e tāua ‵ki eiloa au ki a ia.” Kae e a koe? E mata, e fakamalosi atu a te iloa ne koe me i a Ieova e atafai ki ana tino tapuaki taki tokotasi ko te mea ke fakapilipili atu koe ki a ia?