Ke Fakapilipili Atu ki te Atua

“Te Aliki, . . . ko Iloa Foki au ne Koe”

“A TE ‵toe amoga ‵mafa telā e mafai o maua ne tatou ko te iloa atu me e seai se tino e atafai mai kae malamalama ‵lei i a tatou.”a E mata, e mafai o fakamatala mai ne koe a pati konā? E mata, kai mafaufau aka loa koe me e seai se tino e atafai mai io me malamalama ‵lei i mea kolā e ‵tupu ki a koe, mo ou lagonaga? Kafai e penā loa, e mafai o maua ne koe se fakamafanafanaga i te feitu tenei: E atafai malosi mai eiloa a Ieova ki ana tino tapuaki kae e masaua faeloa ne ia a mea kolā e ‵tupu ki a latou i aso takitasi o te olaga. E fakatalitonu mai ki a tatou a pati a Tavita i te Salamo 139 e uiga ki te munatonu tenei.

Ona ko te talitonu me e amanaia atu eiloa te Atua ki a ia, e fai mai a Tavita penei: “Te Aliki, ko oti au ne sukesuke ne koe, ka ko iloa foki au ne koe.” (Fuaiupu 1) Ne fakaaoga ne Tavita se fakatusaga i konei. A te veape Epelu telā ne ‵fuli ki ei te pati “sukesuke” e mafai o fakasino atu ki te keli eiloa ke oko ki te kaupapa. (Iopu 28:3), sukesuke faka‵lei te fenua, (Famasino 18:2), io me sukesuke faka‵lei se mea ne tupu. (Teutelonome 13:14) E tonu, e iloa ‵lei tatou ne Ieova me e sukesuke ne ia a vaega katoa o ‵tou olaga. Mai te fakaaogaga o te suinauna tenei “au,” e akoako mai ne Tavita tatou me e fiafia eiloa a te Atua ki ana tavini. E sukesuke ne ia latou kae fai ke iloa ne ia a tino taki tokotasi.

Ne fakalauefa aka ne Tavita a te sukesukega maea a te Atua, i ana pati: “E iloa ne koe aku mea katoa e fai; e iloa ‵mao mai ne koe oku mafaufauga.” (Fuaiupu 2) A Ieova e nofo “‵mao” i te lagi. Kae e iloa ne ia māfai e saga‵saga tatou ki lalo, kāti mai se malōlōga i se aso kātoa, io me māfai e ala aka tatou i te taeao kae fai a mea i ‵tou olaga i aso takitasi. E iloa foki ne ia a ‵tou mafaufauga, manakoga mo fakamoemoega. E mata, ne mataku a Tavita me e sukesuke ‵loto ne Ieova a ia? Ikai, e fiafia eiloa ke sukesuke mai a ia. (Fuaiupu 23, 24) Kaia e fai ei penā?

E iloa ne Tavita me e isi se lagonaga ‵lei o Ieova ke sukesuke ne ia Ana tino tapuaki. Ne fakasino atu a Tavita ki te faiga tenei, i ana muna: “E lavea mai au ne koe, māfai au e galue io me malōlō; e iloa katoa ne koe aku faifaiga.” (Fuaiupu 3) I aso takitasi, e lavea ne Ieova ‘‵tou faifaiga’ io me ko ‵tou auala katoa—ko ‵tou mea ‵se e pelā foki mo ‵tou galuega ‵lei. E mata, e saga mai eiloa a ia ki amioga ma‵sei io me ko amioga ‵lei? A te pati Epelu telā ne ‵fuli ki te “lavea” e mafai o fakauiga ki te “faka‵ma” e pelā loa mo te auala e faka‵ma ei ne se tino fai fatoaga a kaiga ke maua ei ne ia a saito. A te tugapati ko te “iloa” ne ‵fuli mai i se pati Epelu telā e mafai o fakauiga ki te “fakatāua.” Kafai e sukesuke ne ia a pati mo faifaiga a ana tino tapuaki i aso takitasi, e fakatāua eiloa ne Ieova a mea ‵lei. Kaia? Me e fakatāua ne ia olotou taumafaiga ke fakafiafia atu ki a ia.

E akoako mai ki a tatou a te Salamo 139 me ko oko eiloa i te atafai mai o Ieova ki ana tino tapuaki. E sukesuke faka‵lei ne ia a latou kae onoono foki ki a latou i olotou mea e fai i aso takitasi o olotou olaga. Kae e iloa ne ia a fakalavelave kolā e fe‵paki mo latou, kae malamalama a ia i te ‵mae o te mafaufau mo te loto telā e mafai o iku mai i mea faiga‵ta konei. E mata, ka gasuesue koe ke tapuaki atu ki se vaegā Atua atafai penā? Kafai e manako koe ki ei, e mafai o mautinoa i a koe a te mea tenei: A Ieova ka “se mafai foki o puli i a ia a galuega ne fai ne koutou, io me ko te alofa ne fakaasi ne koutou mō ia.”—Epelu 6:10.

Faitauga ki te Tusi Tapu mō Setema:

◼ Salamo 119-150

[Fakamatalaga fakaopoopo]