Ke Loto Fakafetai Ki Te Alofa Fakamaoni Mo Te Loto Fakamagalo O Ieova

1, 2. (a) Kaia e fakatāua ei ne tatou a taugasoa kolā e a‵lofa fakamaoni kae loto fakamagalo? (e) Ne a fesili ka tali aka ne tatou?

E FAKAMATALA mai pefea ne koe se taugasoa tonu? Muna a te tuagane Kelisiano ko Ashley: “Ki a au eiloa, a te taugasoa tonu se tino telā e toka faeloa o fesoasoani ki a koe i so se taimi kae fakamagalo ne ia koe māfai e isi sau mea ‵se e fai.” E fakatāua ne tatou katoa a taugasoa kolā e a‵lofa fakamaoni kae loto fakamagalo. E fesoasoani mai latou ke tokagamalie kae alofagina tatou.—Faata. 17:17.

² A Ieova ko te ‵toe Taugasoa alofa fakamaoni kae loto fakamagalo e mafai o maua ne tatou. E pelā eiloa mo pati a te faisalamo: “[Ieova] a koe e ‵lei kae loto fakamagalo ki a matou, kae ‵fonu foki koe i te alofa tumau [io me “alofa fakamaoni”] ki tino katoa kolā e ‵talo atu ki a koe.” (Sala. 86:5) Se a te uiga ke alofa fakamaoni kae loto fakamagalo? E fakaasi mai pefea ne Ieova a uiga gali konā? Kae mafai pefea o fakaakoako atu tatou ki tena fakaakoakoga? Ka fesoasoani mai a tali ki fesili konei ke fakamalosi aka i ei a ‵tou a‵lofa ki te ‵toe taugasoa ‵lei o tatou, ko Ieova. Ka fesoasoani mai foki ki a tatou ke fakamalosi aka a ‵tou va fakataugasoa mo nisi tino.—1 Ioa. 4:7, 8. 

JEHOVAH IS LOYALA IEOVA E ALOFA FAKAMAONI

3. Se a te uiga ke alofa fakamaoni?

³ A te alofa fakamaoni se uiga gali telā e aofia i ei a te tuku katoatoa atu, fakamaoni, mo te tumau i te loto fakamaoni. A te tino alofa fakamaoni e se ‵fuligofie. E ‵piki ‵mau eiloa a ia ki se tino io me se mea, ke oko foki ki tulaga faiga‵ta. Ao, a Ieova ko te ‵toe “Tino alofa fakamaoni.”—Faka. 16:5.

4, 5. (a) E fakaasi mai pefea ne Ieova a te alofa fakamaoni? (e) E mafai pefea o maua ne tatou a te malosi mai te mafau‵fau ki faifaiga alofa fakamaoni a te Atua?

⁴ E fakaasi mai pefea ne Ieova a te alofa fakamaoni? E se mafai o tuku tiaki ne ia ana tino tapuaki fakamaoni. A te tupu ko Tavita, se tino tapuaki e tokotasi telā ne molimau ki te alofa fakamaoni o Ieova. (Faitau te 2 Samuelu 22:26.) I te taimi ne fepaki ei a Tavita mo tofotofoga, ne alofa fakamaoni a Ieova o takitaki, puipui, kae fakasao tou tagata. (2 Samu. 22:1) Ne iloa ne Tavita me e uke atu a mea e aofia i te alofa fakamaoni o Ieova i lō te faiga fua o pati. Kaia ne alofa fakamaoni ei a Ieova ki a Tavita? Ona ko Tavita se ‘tino e alofa fakamaoni.’ E fakatāua ne Ieova a te a‵lofa fakamaoni o ana tino tapuaki, kae toe taui atu ne ia mo te alofa fakamaoni ki a latou.—Faata. 2:6-8.

⁵ E mafai o maua ne tatou a te malosi māfai e mafau‵fau tatou ki faifaiga alofa fakamaoni a Ieova. “E fesoasoani tonu mai ki a au māfai au e faitau ki faifaiga a Ieova ki a Tavita i taimi o fakalavelave,” ko pati a te taina fakamaoni ko Reed. “Ke oko foki ki te taimi ne tele ei a Tavita o nofo i loto i ana, ne tausi faeloa a ia ne Ieova. Ko oko eiloa i te fakamalosi mai o te mea tenā ki a au! E fakamasaua mai i ei ki a au me faitalia te tulaga e oko au ki ei, faitalia me e fakafanoanoa, e toka eiloa a Ieova o fesoasoani mai ki a au māfai e tumau au i te alofa fakamaoni ki a ia.” E seai se fakalotolotolua me e penā foki ou lagonaga.—Lo. 8:38, 39.

6. Ne a nisi auala e fakaasi mai ei ne Ieova a te alofa fakamaoni, kae aoga pefea ki ana tino tapuaki?

⁶ Ne a nisi auala e fakaasi mai i ei ne Ieova a te alofa fakamaoni? E tumau eiloa a ia i te tautali i ana tulaga totino. “Au ko te otou Atua . . . ke oko ki te taimi ko ma‵tua ei koutou.” (Isa. 46:4) E fakavae faeloa ana fakaikuga ki ana tulaga kolā e se mafuli‵fuli e uiga ki te mea tonu mo te mea ‵se. (Mala. 3:6) E se gata i ei, e fakaasi mai ne Ieova a te alofa fakamaoni mai te tumau i te fakamaoni ki ana tautoga. (Isa. 55:11) Tela la, a te alofa fakamaoni o Ieova e aoga ki ana tino tapuaki fakamaoni katoa. E pefea la? Kafai e fai ne tatou a te ‵toe mea e mafai ne tatou o tau‵tali i tulaga o Ieova, e tali‵tonu tatou me ka tausi eiloa a ia ki tena tautoga o fakamanuia tatou.—Isa. 48:17, 18.

FAKAAKOAKO KI TE ALOFA FAKAMAONI O IEOVA

7. Se a te auala e tasi e mafai ne tatou o fakaakoako ki te alofa fakamaoni o te Atua?

⁷ E mafai pefea o fakaakoako tatou ki te alofa fakamaoni o Ieova? E tasi te auala ko te faiga o se mea mō latou kolā e fe‵paki mo fakanofonofoga faiga‵ta. (Faata. 3:27) Pelā me se fakaakoakoga, e mata, e iloa ne koe se taina io me se tuagane ne loto vāivāi, kāti ona ko masaki o te foitino, ‵tekemaiga i te kāiga, io me ko vāivāiga totino? Kaia e se mua ei koe o tuku atu ki te tino tenā ne “pati ‵lei mo pati fakamafanafana”? (Saka. 1:13, Tusi Paia Samoa)a I te faiga penā, ko fakatalitonu atu ne koe i a koe se taugasoa tonu kae alofa fakamaoni, se tino telā “e sili atu te . . . fakamaoni i lō tautaina.”—Faata. 18:24.

8. E mafai pefea o fakaakoako tatou ki te alofa fakamaoni o Ieova māfai ko oti tatou ne a‵vaga?

⁸ E mafai foki o fakaakoako tatou ki te alofa fakamaoni o Ieova mai te tumau i te fakamaoni ki a latou kolā e a‵lofa tatou ki ei. Pelā me se fakaakoakoga, kafai tatou ko oti ne a‵vaga, e iloa ne tatou me ‵tau mo tatou o tumau i te fakamaoni ki ‵tou avaga. (Faata. 5:15-18) Tela la, e se ma‵nako tatou o fai se mea telā e mafai o ‵taki atu ei tatou ki te mulilua. (Mata. 5:28) I tafa i ei, e fakaasi atu ne tatou a te alofa fakamaoni ki ‵tou taina mo tuagane e auala i te ‵kalo kea‵tea mai te gutu fatufatu mo te faitala ‵loi, kae sē fia fakasalalau a tala fakamasei tino io me fakalogologo foki ki tala penā.—Faata. 12:18.

9, 10. (a) Ko oi e ma‵nako tatou o tumau i te a‵lofa fakamaoni ki ei? (e) Kaia e se faigofie faeloa a te fakalogo ki fakatonuga a Ieova?

⁹ Kae sili i mea katoa, e ma‵nako tatou o tumau i te a‵lofa fakamaoni ki a Ieova. E fai pefea ne tatou a te mea tenā? Mai te kilo atu ki mea i te auala telā e kilo atu ei a ia ki ei—a‵lofa ki mea kolā e alofa a ia ki ei kae takalia‵lia ki mea kolā e takalialia a ia ki ei—ka oti, ko ola ei tatou e ‵tusa mo te mea telā e fiafia a ia ki ei. (Faitau te Salamo 97:10.) Ko te lasi o te fakafetaui aka ne tatou a ‵tou mafaufauga mo lagonaga ki mafaufauga mo lagonaga o Ieova, ko te faigofie o tatou o faka‵logo ki ana fakatonuga.—Sala. 119:104.

¹⁰ E tonu, e se faigofie faeloa ke fakalogo ki fakatonuga a Ieova. Kāti e taumafai malosi eiloa tatou o tumau i te a‵lofa fakamaoni. E pelā mo te mea tenei, kāti e ma‵nako a nisi Kelisiano ‵taka o a‵vaga, kae e seki maua ne latou se tino e fetaui ‵lei i tino tapuaki o Ieova. (1 Koli. 7:39) Kāti e matea ne se tuagane taka i tino sē tali‵tonu e ga‵lue tasi mo ia e taumafai faeloa o ‵sala se tino ke avaga mo ia. Kāti e taua foki a te tuagane mo lagonaga o te nofo tokotasi. Kae koi taumafai malosi eiloa tou fafine o fakatumau a tena fakamaoni ki a Ieova. E mata, e se loto fakafetai tatou ki fakaakoakoga fakaofoofogia penā o te alofa fakamaoni? E mautinoa me ka tuku atu ne Ieova a te taui ki a latou katoa kolā e tumau i fakamaoni ki a ia faitalia a mea faiga‵ta.—Epe. 11:6.

A IEOVA E LOTO FAKAMAGALO

11. Se a te uiga ke loto fakamagalo?

¹¹ E aofia i toe uiga gali o Ieova ko tena loto fakamagalo. Se a te uiga ke loto fakamagalo? E aofia i ei a te fakamagaloga o se tino ne fai ne ia se mea ‵se māfai e isi se salamō tonu. E se fai pelā i te loto fakamagalo e talia ne ia a te mea ‵se io me fakafiti ne ia me e seai se mea ne tupu. I lō te fai penā, e fakaiku aka ne tou tagata ke sē kaitaua a ia. E akoako mai i Tusitusiga Tapu i a Ieova “e loto fakamagalo” ki a latou kolā e sala‵mo tonu.—Sala. 86:5.

12. (a) E fakaasi mai pefea ne Ieova a te loto fakamagalo? (e) Se a te uiga ke “‵solo keatea” agasala a se tino?

¹² E fakaasi mai pefea ne Ieova a te loto fakamagalo? Kafai a Ieova e loto fakamagalo, e fakamagalo ne ia “i se auala lasi”; e katoatoa kae tumau. (Isa. 55:7) E iloa pefea ne tatou me e katoatoa te loto fakamagalo o Ieova? Mafaufau ki te fakatalitonuga telā ne maua i te Galuega 3:19. (Faitau.) Ne fakamalosi atu a te apositolo ko Petelu ki ana tino fakalogo‵logo “ke sala‵mo . . . kae ‵fuli mai.” Kafai se tino agasala e salamō tonu, e fanoanoa ‵ki eiloa tou tagata ki ana mea ‵se ne fai. E fakaiku aka foki ne ia ke sē toe fai a te agasala. (2 Koli. 7:10, 11) E se gata i ei, a te salamō tonu e fai ei ke “‵fuli mai” a te tino agasala, tiakina ana mea ‵se ne fai kae kausaki atu i te auala telā e fakafiafia atu ki te Atua. Kafai e fakaasi mai ne tino kolā ne fakalogo‵logo ki a Petelu se salamō tonu, se a te ikuga ka maua mai i ei? Ne fai mai a Petelu me ka mafai o “‵solo keatea” olotou agasala. A te tugāpati tenā ne vau mai i se pati Eleni telā e fakauiga ki te “‵solo katoatoa, ‵solo ke ‵ma.” Tela la, kafai e fakamagalo ne Ieova se tino, e ‵solo faka‵ma ne ia a te ma tusitusi. E fakamagalo katoatoa ne ia.—Epe. 10:22; 1 Ioa. 1:7.

13. Se a te mea e fakatalitonu mai ki a tatou i pati konei, “ka sē toe manatua olotou mea ‵se ne fai”?

¹³ E iloa pefea ne tatou me e tumau eiloa a te fakamagaloga a Ieova? Mafaufau ki te valoaga a Ielemia e uiga ki te feagaiga fou ne fai mo Kelisiano fakaekegina, telā ne mafai ei o maua a te fakamagaloga tonu mō latou kolā e fakatuanaki ki te togiola. (Faitau te Ielemia 31:34.) Muna a Ieova: “Ka fakamagalo ne au olotou agasala, kae sē toe manatua olotou mea ‵se ne fai.” Tela la, e fakatalitonu mai a Ieova ki a tatou me i te taimi eiloa e fakamagalo ei ne ia agasala, ka sē toe fakaaoga eiloa ne ia i te taimi mai mua ke ‵teke mai ki a tatou. E se toe faka‵sae aka ne ia a ‵tou agasala ko te mea ke fakasala faeloa io me ‵losi mai ki a tatou. I lō te fai penā, e fakamagalo faeloa ne Ieova a ‵tou agasala kae fakapuli foki ne ia.—Lo. 4:7, 8.

14. E mafai pefea o maua ne tatou a te fakamafanafanaga mai te mafaufau ‵loto ki te loto fakamagalo o Ieova? Tuku mai se fakaakoakoga.

¹⁴ E maua ne tatou a te fakamafanafanaga māfai e mafaufau ‵loto tatou ki te loto fakamagalo o Ieova. Mafaufau ki se fakaakoakoga. I tausaga e uke ko ‵teka, ne fakatea se tuagane telā ka fakaigoa ne tatou ki a Elaine. I tausaga fakamuli ifo, ne toe foki mai tou fafine ki loto i te fakapotopotoga. “E ui eiloa ne fai atu au ki nisi tino i a au e talitonu i a au ne fakamagalo ne Ieova,” ko pati a Elaine, “ne mafaufau faeloa au i a ia e ‵mao io me ‵pili atu a nisi tino ki a ia i lō au, kae ne fai a ia mo tino tonu ki a latou.” E ui i ei, ne maua ne Elaine se fakamafanafanaga mai te faitau kae mafaufau ‵loto ki nisi tala fakatusa kolā e fakaaoga i te Tusi Tapu ke fakamatala mai i ei a te loto fakamagalo o Ieova. “Ne lagona ne au a te alofa mo te atafai o Ieova ki a au i se auala telā ne seki lavea aka eiloa ne au i te taimi muamua,” ko pati a Elaine. Ne otia malosi te loto o tou fafine i te manatu tenei: “Kafai e fakamagalo ne Ieova a ‵tou agasala, e se ‵tau o mafau‵fau tatou me i lailaiga o agasala konā ka tauave faeloa ne tatou i ‵tou olaga kātoa.”b Muna a Elaine: “Ko lavea ne au me ne seki talitonu au me e mafai o fakamagalo katoatoa au ne Ieova, kae ne manatu aka au me ka tauave ne au a te amoga tenei i toku olaga kātoa. E iloa ne au me e manakogina se taimi e lava, kae ko lagona ne au te māmā o toku mafaufau me ko kamata au o fakapilipili atu ki a Ieova.” Mafāga o Atua alofa kae loto fakamagalo tenei e tavini tatou ki ei!—Sala. 103:9.

FAKAAKOAKO KI TE LOTO FAKAMAGALO O IEOVA

15. E mafai pefea o fakaakoako tatou ki te loto fakamagalo o Ieova?

¹⁵ E mafai o fakaakoako tatou ki te loto fakamagalo o Ieova mai te filifili ke loto fakamagalo tatou ki nisi tino māfai e isi se salamō tonu. (Faitau te Luka 17:3, 4.) Masaua me kafai e fakamagalo tatou ne Ieova, e fakapuli ne ia ‵tou agasala mai te sē toe mafaufau ki ei. Kafai foki e fakamagalo ne tatou a nisi tino, e mafai o fakapuli ne tatou olotou mea ‵se mai te sē toe faka‵sae aka i se taimi fakamuli.

16. (a) E mata, a te fakamagaloga o nisi tino e fakauiga i ei me talia ne tatou a agasala io me ko nisi tino ke fai masei mai ki a tatou? Fakamatala mai. (e) Ko te mea ke fakamagalo tatou ne te Atua, se a te mea e ‵tau o fai ne tatou?

¹⁶ A te fakamagaloga o nisi tino e se fakauiga i ei me talia ne tatou a agasala ne fai io me fia‵fia tatou ke fai masei tatou ne nisi tino. Ikai. E fakauiga i ei me ko oti ne filifili tatou ke sē kaitāua. Kae se mea tāua, me kafai e ma‵nako tatou ke fakamagalogina ne te Atua, e ‵tau mo tatou o fakaakoako ki te loto fakamagalo o Ieova mai te fakamagaloga o nisi tino. (Mata. 6:14, 15) I te fakaotiga loa, ona ko te loto malamalama, e masaua ne Ieova i a “tatou ne ‵pefu.” (Sala. 103:14) Ona ko te loto malamalama, e mata, e se ‵tau o masaua ne tatou me fai ne nisi tino a mea ‵se ona ko te tulaga sē ‵lei katoatoa, kae fakamagalo atu latou mai te loto?—Efe. 4:32; Ko. 3:13.

17. Se a te mea e mafai o fesoasoani mai māfai ne logo‵mae tatou i mea ne fai ne se taina io me se tuagane?

¹⁷ E tonu, e se faigofie faeloa ke fakamagalo a nisi tino. Ne faigata ki nisi Kelisiano fakaekegina i te senitenali muamua ke fakatoka a kese‵kesega i va o latou. (Fili. 4:2) Kafai ne faka‵mae mai ki a tatou a mea ne fai ne se taina io me se tuagane, se a te mea e mafai o fesoasoani mai ki a tatou? Mafaufau ki a Iopu. Ne logo‵mae ‵ki a ia i te taimi ne fai atu ei ne ana “taugasoa” ko Elifasa, Pilitati, mo Sofala a ‵losiga ‵se ki a ia. (Iopu 10:1; 19:2) I te fakaotiga, ne polopoloki ‵mafa ne Ieova a latou konei. Ne fakatonu atu te Atua ki a latou ke olo ki a Iopu o ofo atu se taulaga mō olotou agasala. (Iopu 42:7-9) Kae ne manako foki a Ieova ke fai ne Iopu se mea. Se a la te mea tenā? Ne fakatonu atu a Ieova ki a Iopu ke ‵talo mō ana taugasoa. Ne fai eiloa ne Iopu a te mea telā ne fai atu ne Ieova, kae ne fakamanuia tou tagata ne Ieova ona ko tena loto fakamagalo. (Faitau te Iopu 42:10, 12, 16, 17.) Se a te akoakoga mō tatou? A te ‵talo atu mo te loto fakamaoni mō se tino telā ne ‵se mai ki a tatou e mafai o fesoasoani mai ke sē kaitāua tatou.

TUMAU I TE TAULOTO KAE FAKAAKOAKO KATOATOA KI UIGA O IEOVA

18, 19. E fakatumau pefea ne tatou a te fakamalosiga o ‵tou loto fakafetai ki uiga ‵gali o Ieova?

¹⁸ Ne fia‵fia eiloa tatou i te taulotoga ki vaega kese‵kese o uiga totino o Ieova. Ne lavea ne tatou i a ia e uiga faigofie, e se fakailoga tino, e kaimalie, e loto malamalama, e alofa fakamaoni, kae loto fakamagalo. E tonu, ne sukesuke fua tatou ki nāi mea. Ka fia‵fia eiloa tatou o tauloto ki mea e uke atu e uiga ki a Ieova ke oko eiloa ki te se-gata-mai. (Fai. 3:11) E lotoma‵lie tatou ki te apositolo ko Paulo telā ne tusi mai, penei: “Ko tafaga la te ‵poko o te maumea mo te poto mo te iloa o te Atua”—kae tuku la i ei a te alofa mo uiga e ono kolā ne mafau‵fau tatou ki ei.—Lo. 11:33.

¹⁹ Ke na tumau tatou katoa i te fakamalosi o ‵tou loto fakafetai ki uiga ‵gali o Ieova. E mafai o fai ne tatou a te mea tenā mai te fakamasani ki ana uiga, mafaufau ‵loto ki ei, kae fakaakoako ki ei i ‵tou olaga totino. (Efe. 5:1) Kafai e fai tatou penā, e seai se fakalotolotolua me ka lotoma‵lie faeloa tatou ki te faisalamo telā ne usu mai, penei: “Kae ki a au, se mea tafasili i te gali te pili ki te Atua.”—Sala. 73:28.