Ne Lavea ne Elisaia a Kaliota Afi E LAVEA NE KOE?

Ne salasala a te tupu o Sulia ki te pelofeta a te Atua ko Elisaia ke oko eiloa ki te fa‵kai maugā kae ‵pui o Totana. I te po, ne uga atu ne te pule o Sulia a solofanua, kaliota taua, mo te kautau ki Totana. I te taimi ko ao ei, a tena kautau ko pili ‵ki eiloa ki te fa‵kai.​—2 Tupu 6:13, 14.

I te taimi ne tu aka ei a te tavini a Elisaia kae fano ki tua, lavea ei ne ia a te fili o te pelofeta mo tena kautau. “Tou ‵malu, tatou ko malaia! Se a nei te ‵tou mea ka fai?” ko te tagi a tou tagata. “Sa mataku,” ko muna a Elisaia, “e tokouke atu o‵tou kau i lō te lotou kau.” Tenā ne ‵talo atu ei te pelofeta: “Te Aliki [Ieova], faka‵pula aka ona mata ke lavea ne ia!” E fai mai te tala: “Tenā la, i te kiloakega o te tavini a Elisaia, lavea ei ne ia a te feitu o te koga maluga e ‵tu ei a solofanua mo kaliota afi e fakatamilo i a Elisaia.” (2 Tupu 6:15-17) Ne a mea e mafai o tauloto ne tatou mai te mea tenei mo nisi mea ne ‵tupu i te olaga o Elisaia?

Ne tokagamalie a Elisaia i te taimi ne nikoi ei ne te kautau a Sulia me ne talitonu fakamaoni tou tagata ki a Ieova kae ne lavea ne ia te malosi puipui o te Atua. E se fakamoe‵moe tatou ke fai ne vavega i aso nei, kae e malama‵lama tatou i a Ieova e puipui ne ia ana tino e pelā me se potukau. I se auala fakatusa, e sikomia foki tatou ne solofanua mo kaliota afi. Kafai e “lavea” ne tatou ki ‵tou mata o te fakatuanaki kae fakalagolago faeloa ki te Atua, ka ‘moe eiloa tatou mo te filemu’ kae ka maua ne tatou a te fakamanuiaga a Ieova. (Sala. 4:8) Ke mafau‵fau tatou ki te auala e maua ei ne tatou a mea aoga mai i nisi mea ne ‵tupu i te olaga o Elisaia.

KO KAMATA A ELISAIA O TAVINI KI A ELIA

I te taimi e tasi ne galue ei a Elisaia i te malae fatoaga, ne vau te pelofeta ko Elia ki tou tagata kae ‵pei atu ki luga i a ia a tena gatu ‵loa. Ne iloa ne Elisaia a te uiga o te mea tenā. Ne fai ne tou tagata se ‵kaiga, fakatofa atu ki tena tamana mo tena mātua, kae fano o tavini ki a Elia. (1 Tupu 19:16, 19-21) Ona ko Elisaia ko leva ne fakaavanoa a ia eiloa ke tavini katoatoa atu ki te Atua, ne fakaaoga malosi a ia ne Ieova kae tavini fakamuli e pelā me se pelofeta e sui ei a Elia.

E se taumate e ono tausaga ne tavini ei a Elisaia ki a Elia. I te vaitaimi tenā, ko Elisaia te tino telā ne ‘ligi ne ia a vai ki luga i lima o Elia.’ (2 Tupu 3:11) I aso konā, a tino ne masani o ‵kai ki lima, e se fakaaoga a foka, naifi, io me ko nisi mea aka. Kafai ko oti te ‵kaiga, e ‵ligi ne se tavini a vai ki luga i lima o tena matai ke ‵fulu ana lima. Tela la, a nisi galuega a Elisaia ne foliga mai pelā me ne galuega fatauva. E ui i ei, ne kilo atu tou tagata ki ei e pelā me se tauliaga ke tavini ki a Elia.

I aso nei, e tokouke a Kelisiano e ga‵lue i vaega kese‵kese o te taviniga tumau. E fai penā me e fakama‵losi aka latou ne te lotou fakatuanaki mo se manakoga ke fakaaoga katoatoa olotou malosi i te taviniga ki a Ieova. A nisi tofiga e manakogina ke tiakina olotou fale kae ga‵lue i Peteli, i galuega fakatu‵tu, mo nisi galuega aka kolā e ma‵natu aka a te tokoukega o tino me ne galuega fatauva. E seai se Kelisiano e ‵tau o mafaufau i galuega e se tāua io me e fatauva, i a Ieova e fakatāua malosi ne ia.​—Epe. 6:10.

NE PUKE ‵MAU A ELISAIA KI TENA TOFIGA

A koi tuai o ‘ave ne te Atua a Elia ki lagi i te vaeosio,’ ne uga ne ia te pelofeta mai i Kilikala ke fano ki Peteli. Ne mafaufau a Elia ke sē olo tasi lāua mo tena taugasoa, kae ne tali atu a Elisaia: “E se mafai ne au o tiaki koe.” A koi fano te malaga, ne fakamalosi fakalua atu a Elia ki a Elisaia ke nofo kae ne seki aoga te taumafaiga. (2 Tupu 2:1-6) E pelā mo te ‵piki ‵mau o Luta ki a Naomi, e penā foki te ‵piki ‵mau o Elisaia ki a Elia. (Luta 1:8, 16, 17) Kaia? Ona ko te loto fakafetai o Elisaia ki tena tauliaga ne tuku mai i te Atua ke tavini atu a ia ki a Elia.

Ne fai ne Elisaia se fakaakoakoga ‵lei mō tatou. Kafai e maua ne tatou ne tauliaga ke ga‵lue i te fakapotopotoga a te Atua, ka fakatāua malosi eiloa ne tatou māfai e masaua ne tatou i a tatou e tavini atu ki a Ieova. E seai se tauliaga e sili atu i te mea tenā.​—Sala. 65:4; 84:10.

“TAKU MAI TE MEA E MANAKO KOE KE FAI NE AU MŌ KOE”

A koi ma‵laga atu a tāgata e tokolua konei, kae fai atu a Elia ki a Elisaia: “Taku mai te mea e manako koe ke fai ne au mō koe, koi tuai au o fano.” E pelā mo te fakamolemole a Solomona ne fai i tausaga mai mua atu, ne fakamolemole atu a Elisaia ki se mea faka-te-agaga. Ne fakamolemole atu tou tagata ‘ke tuku mai ki a ia a vaega e lua o te mana o Elia.’ (1 Tupu 3:5, 9; 2 Tupu 2:9) I Isalaelu, e ‵tau o maua ne te toekimua tagata a se tagata a vaega e lua o se tofi. (Teu. 21:15-17) Tela la, ne fakamolemole atu a Elisaia ke fai a ia mo sui o Elia. E se gata i ei, ne manako a Elisaia ke maua foki ne ia a te loto malosi telā ne maua ne Elia, telā “ne tavini sāle faeloa” ki a Ieova.​—1 Tupu 19:13, 14.

Ne tali atu pefea a Elia ki te fakamolemole a tena tavini? “A tou manako ko oko eiloa i te faigata,” ko muna a te pelofeta. “Kae e ‵lei, ka maua ne koe manafai e lavea ne koe a au i te taimi telā e ave ei au; kafai e se lavea ne koe a au i te taimi tenā, e se maua foki ne koe a te mea ne manako mai koe ki ei.” (2 Tupu 2:10) E manino ‵lei me e lua a feitu tāua o te tali a Elia. Te mea muamua, ko te Atua fua e mafai o fakaiku aka ne ia me ka maua ne Elisaia a te mea ne fakamolemole a ia ki ei io me ikai. Te lua o mea, kafai e manako a Elisaia ki ei, e ‵tau o ‵piki ‵mau a ia ki a Elia faitalia me se a te mea e tupu.

TE MEA NE LAVEA NE ELISAIA

Ne kilo atu pefea te Atua ki te fakamolemole a Elisaia ki vaega e lua o te ‵mana o Elia? E fai mai te tala: “Ne sau‵tala atu eiloa lāua i te auala, tenā, ko te kaliota afi eiloa e toso ne solofanua afi ko vau i te va o lāua, ko Elia foki eiloa ko ave ola ki te lagi i te vaeosio. Ne lavea ne Elisaia a te mea tenā ne tupu.”a Tenā te tali a Ieova ki te fakamolemole a Elisaia. Ne lavea ne Elisaia a Elia ko ave kea‵tea mai i a ia, maua ei ne ia a vaega e lua o te ‵mana o Elia, kae fai mo sui o te pelofeta.​—2 Tupu 2:11-14.

Ne puke ne Elisaia a te gatu ‵loa o Elia telā ne to kae pei ki ei. Ko fakamailoga nei ne te gatu tenā a Elisaia e pelā me se pelofeta a te Atua. Ne toe fakatalitonu mai a tena filifiliga mo fai se pelofeta i te taimi ne fai ei ne ia se vavega fakamuli ifo i te ‵vaeluaga o vai o te Iolitana.

E seai se fakalotolotolua me ka masaua faeloa ne Elisaia a te mea telā ne lavea ne ia i te fanakaga o Elia i te vaeosio. Kae e se lavea faeloa ne se tino a kaliota afi mo solofanua afi i aso katoa! E tuku mai fua i ei a fakamaoniga o te tali a Ieova ki te fakamolemole a Elisaia. Kafai e tali mai a Ieova ki ‵tou ‵talo, e se fakaasi mai ki a tatou se fakaasiga o se kaliota ‵ka mo solofanua afi. Kae e malamalama tatou me e fakaaoga ne te Atua se malosi lasi ke fakamautinoa mai i ei me ne fai eiloa a tena loto. Kae kafai e lavea ne tatou i a Ieova e fakamanuia ne ia a te vaega faka-te-lalolagi o tena fakapotopotoga, ko “lavea” tonu ei ne tatou a tena kaliota malapulapu ko gasue ki mua.​—Eseki. 10:9-13.

E uke a mea ne oko ki a Elisaia e fakatalitonu atu ei ki tou tagata e uiga ki te malosi fakaofoofogia o Ieova. Ne fai ne te agaga tapu o te Atua ke mafai ne te pelofeta o fai a vavega e 16​—e fakalua taimi te uke i mea kolā ne fai ne Elia.b A te lua o taimi ne lavea ei ne Elisaia a solofanua mo kaliota taua e ‵ka pelā me se afi ko te taimi ne nofo ei i Totana, telā ne fakamatala mai i te kamataga o te mataupu tenei.

NE TALITONU FAKAMAONI A ELISAIA KI A IEOVA

Faitalia me ne sikomia a ia ne te fili i Totana, ne tumau eiloa a Elisaia i te tokagamalie. Kaia? Me ne ati aka ne ia se fakatuanaki malosi ki a Ieova. E manakogina foki ne tatou se fakatuanaki penā. Tela la, ke ‵talo tatou mō te agaga tapu o te Atua ko te mea ke mafai o fakaasi atu ne tatou a te fakatuanaki mo nisi vaega o fuataga o te agaga.​—Luka 11:13; Kala. 5:22, 23.

Ne fesoasoani atu a te mea ne tupu i Totana ke maua ne Elisaia a pogai e uke e ‵tau ei o talitonu fakamaoni a ia ki a Ieova mo tena kautau kolā e se lavea ki mata. Ne matea ne te pelofeta me ne uga mai ne te Atua a te kau agelu o fakatamilo a te fa‵kai kae puipui a ia mai te fili. Ne faka‵sao fakavavega ne te Atua a Elisaia mo tena tavini mai te faiga ke ‵kivi a mata o te fili. (2 Tupu 6:17-23) I te taimi fakamataku tenā, e pelā foki mo nisi taimi aka, ne fakatuanaki malosi a Elisaia kae talitonu katoatoa ki a Ieova.

Ke na tali‵tonu fakamaoni tatou ki a Ieova te Atua e pelā mo Elisaia. (Faata. 3:5, 6) Kafai e fai tatou penā, “ka fakaasi mai eiloa ne te Atua a tena fiafia kae fakamanuia mai tatou.” (Sala. 67:1, NW) E tonu, e se sikomia tatou ne kaliota mo solofanua afi tonu. I te taimi o te “fakalavelave lasi” telā ko pili mai, ka puipui tatou ne Ieova e pelā me se kautaina i te lalolagi kātoa. (Mata. 24:21; Faka. 7:9, 14) Ke oko atu ki te taimi tenā, ke masaua faeloa ne tatou i te Atua “ko te ‵tou lafiga.”​—Sala. 62:8.