“Ne Takalia‵lia Mai ki a au a Tino e Tokouke”

TOKU OLAGA MUA:

Ne tupu aka au i Santiago, te laumua o Chile, i se fa‵kai telā e lauiloa i ei a vailakau tapu, potukau ma‵sei, mo amioga solitulafono. I te taimi ko lima ei oku tausaga, kae tamate toku tamana ne se tino. Mai tua ifo i ei, ne ‵nofo fakatasi toku mātua mo se tagata telā ne amio fakasaua. Ne ta faeloa ne ia māua. Talu mai tausaga konā, koi tauave eiloa ne au oku lagonaga ita.

I te taimi ne tupu aka ei au, ne pokotia au i fakamalosiga sē aoga telā ne kamata foki ei au o uiga fakasaua. Ne fakalogologo au ki pese ma‵sei, inu malosi, kae fakaaoga sāle foki ne au a vailakau tapu i nisi taimi. Ne aofia faeloa au i fusuga i auala mo tino aveave vailakau tapu, kolā ne taumafai i taimi e uke o tamate au. I te taimi e tasi, ne ‵togi ne se potukau masei se tino fusu sē lauiloa ke tamate ne ia au, kae ne sao amate atu eiloa au mo se tamā pakiaga i te naifi. I te suā taimi, ne fakatu mai ne se potukau aveave vailakau tapu se fana ki toku ulu kae ne taumafai ke noua ne latou au.

I te 1996, ne fiafai au ki se fafine e igoa ki a Carolina, kae i te 1998, ne avaga ei māua. Mai tua o te fanauga o te ma tama muamua, ne kamata au o mataku ona ko toku uiga kaitaua mo te fakasaua, i te mea ma fai au pelā mo toku tamana fai kae fakasaua ne au toku kāiga. Tela la, ne ‵sala atu ei au ki se fesoasoani mai i se ofisa telā e panaki mo vaegā mea penei. Ne maua ne au a togafiti fakatokita, kae ne seki mafai o fesoasoani mai. Ne tumau eiloa toku mata kaitaua ki tamā mea fo‵liki fua; ne seki mafai o pule faka‵lei atu au ki ei. Ona ko toku sē manako ke fakalogo‵mae atu ki toku kāiga, ne taumafai ei au o fakamate. Fakafetai, me ne seki iku manuia te taumafaiga tenā.

Ko oti ne fai au mo fai se tino sē talitonu ki te Atua i te fia o tausaga, kae ne fia talitonu au me e isi eiloa se Atua. Tela la, ne kau atu au ki te lotu evagelia mō se vaitaimi. I te vaitaimi foki tenā, ne sukesuke taku avaga ki te Tusi Tapu mo Molimau a Ieova. Ne takalialia au ki Molimau, kae ne pakalaga kae pati masei sāle atu au ki a latou. Kae ne tali mai faeloa latou mo te filemu, se mea telā e seki fakamoemoe au ki ei.

I te aso e tasi, ne fai mai a Carolina ke onoono aka eiloa au ki te Salamo 83:18 i taku Tusi Tapu. E fakaasi manino mai eiloa i te fuaiupu tenā me i te igoa o te Atua ko Ieova. Ne poi masei au i te iloa atu me ne tauloto au i taku lotu e uiga ki se atua, kae e se ko Ieova. I te kamataga o te 2000, ne kamata foki au o sukesuke ki te Tusi Tapu fakatasi mo Molimau.

TE AUALA NE ‵FULI EI TOKU OLAGA NE TE TUSI TAPU:

I te taimi ne gasolo atu ei au ki mua, ne maua ne au se fakamafanafanaga i te iloa atu me i a Ieova se Atua alofa atafai kae loto fakamagalo. E pelā mo te Esoto 34:6, 7, e fakamatala mai i te Tusi Tapu a Ieova e pelā me se “Atua telā e ‵fonu i te alofa mo te kaimalie, e tuai o ita kae lasi tena alofa mo tena fakamaoni. E tausi ne [ia tena] feagaiga i afe o tupulaga, e fakamagalo fua ne [ia] agasala mo amioga ma‵sei katoa.”

Kae e se faigofie foki eiloa ke fakagalue aka a mea kolā e tauloto ne au. Ne talitonu au me e se mafai eiloa o pule faka‵lei atu au ki toku uiga kaitaua ‵ki. I taimi takitasi ne takavale ei au, ne fakamalosi mai eiloa a Carolina mo te alofa ki a au. Ne fakamasaua mai ne ia me e fakatāua eiloa ne Ieova aku taumafaiga. Ne maua ne au te malosi mai i tena fesoasoani ke tumau au i te taumafai o fakafiafia atu ki a Ieova, faitalia me e mafaufau faeloa au me ko seai soku fakamoemoega.

I te aso e tasi, ne fai mai toku faiakoga, ko Alejandro, ke faitau aka au ki te Kalatia 5:22, 23. E fai mai a fuaiupu konā me i fuataga o te agaga o te Atua ko te “alofa, te fiafia, te filemu, te kufaki, te atafai, te aga‵lei, te fakatuanaki, te agamalu, te loto pulea.” Ne fakamatala mai ne Alejandro me i te atiakaga o uiga konā e se fakalagolago ki toku malosi, kae ki te agaga tapu o te Atua. Ne ‵fuli katoatoa eiloa ne te munatonu tenā taku kilokiloga!

Fakamuli ifo, ne kau atu au ki se fono lasi a Molimau a Ieova. A te fanofano ‵lei o fakatokaga, te ‵ma, mo te ‵kau fakatasi o taina mo tuagane ne fakatalitonu mai i ei me ko oti ne maua ne au te lotu tonu. (Ioane 13:34, 35) Ne papatiso au i a Fepuali 2001.

TE AUALA NE MAUA EI NE AU A MEA AOGA:

Ko oti eiloa ne ‵fuli ne Ieova au mai i se tagata uiga fakasaua ki se tino uiga filemu. E mafaufau au me ne sau aka ne ia au mai i te pela telā ne ‵lave au i ei. Ne takalia‵lia mai ki a au a tino e tokouke, kae ne seki faka‵se ne au a latou. Kae nei la, ko mafai ne au o tavini atu mo te filemu ki a Ieova fakatasi mo taku avaga mo aku tama tagata e tokolua.

E se mafai o tali‵tonu oku kāiga mo oku taugasoa mua ki te ‵fuliga lasi ne fai ne au. Ne iku atu i ei ki te fia‵fia o nai tino i a latou o tauloto ki te munatonu i te Tusi Tapu. Ne maua foki ne au a te tauliaga ke fesoasoani atu ki nisi tino ke iloa ne latou a Ieova. Ko oko eiloa i te gali ke lavea atu te ‵fuliga foki ne te munatonu i te Tusi Tapu olotou olaga!