AUALA KE MANUMALO I LAGONAGA TAKALIALIA

4 | Ke Manumalo i Lagonaga Takalialia Fakatasi mo te Fesoasoani o te Atua

Akoakoga i te Tusi Tapu:

“A fuataga o te agaga ko te alofa, te fiafia, te filemu, te kufaki, te atafai, te aga‵lei, te fakatuanaki, te agamalu, te loto pulea.”—KALATIA 5:22, 23.

Tena Uiga:

E mafai eiloa o manumalo i lagonaga takalialia fakatasi mo te fesoasoani o te Atua. A tena agaga tapu e mafai o fesoasoani mai ke ati aka ne tatou a uiga kolā e se maua ne tatou i a tatou eiloa. Tela la, i lō te taumafai ke ‵teke atu ki lagonaga takalialia i ‵tou malosi totino, se mea ‵lei ke fakalago‵lago tatou ki te fesoasoani mai te Atua. Kafai e fai tatou penā, ka ‵pau eiloa ‵tou lagonaga mo te apositolo ko Paulo telā ne tusi mai penei: “Me e maua ne au a te malosi i mea katoa e auala i a ia telā ne tuku mai ne ia te ‵mana ki a au.” (Filipi 4:13) Kae ka mafai eiloa o fai atu tatou: “A toku fesoasoani e maua mai i a Ieova.”—Salamo 121:2.

Mea e Mafai o Fai ne Koe:

“Ne ‵fuli ne Ieova au mai i se tagata uiga fakasaua ki se tino uiga filemu.”—WALDO

‵Talo ki a Ieova, akai atu mo te fakamaoni ki a ia ke tuku mai tena agaga tapu. (Luka 11:13) Fakamolemole atu ke fesoasoani mai ki a koe ke fakaasi atu a uiga ‵lei i tou olaga. Sukesuke ki pati mai i te Tusi Tapu ki uiga kolā ka fesoasoani mai ke fakagata a te takalialia, pelā mo te alofa, te filemu, te kufaki, mo te loto pulea. ‵Sala ki auala ke fakagalue ne koe a uiga konā i tou olaga. Kae ‵kau fakatasi mo tino kolā e fakamalosi aka foki ne latou a uiga konā. E mafai o fesoasoani atu a tino konā ke fakaasi atu ne koe a te “alofa kae fai a mea ‵lei.”—Epelu 10:24.

Tala Tonu—WALDO

Ne Manumalo i Ana Uiga Fakasaua mo te Takalialia

Ne faigata te olaga o Waldo i tena tupuakaga kae ne fai ei ke maua ne ia a lagonaga takalialia. Ana muna: “Ne aofia faeloa au i fusuga i auala mo tino aveave vailakau tapu . . . I te taimi e tasi, ne ‵togi ne se potukau masei se tino fusu sē lauiloa ke tamate ne ia au, kae ne sao amate atu eiloa au mo se tamā pakiaga i te naifi.”

Ne seki fiafia a Waldo i te taimi ne kamata tena avaga o sukesuke ki te Tusi Tapu mo Molimau a Ieova. Ne fai mai a ia: “Ne takalialia au ki Molimau, kae ne pakalaga kae pati masei sāle atu au ki a latou. Kae ne tali mai faeloa latou mo te filemu.”

Fakamuli ifo, ne manako foki a Waldo ke sukesuke ki te Tusi Tapu. Ana muna: “E se faigofie foki eiloa ke fakagalue aka a mea kolā e tauloto ne au. Ne talitonu au me e se mafai eiloa o pule faka‵lei atu au ki toku uiga kaitaua ‵ki.” Kae isi se mea ne tauloto ne ia i te Tusi Tapu telā ne fai ei ke ‵fuli a ia.

Ne fai mai a Waldo: “I te aso e tasi, ne fai mai toku faiakoga, ko Alejandro, ke faitau aka au ki te Kalatia 5:22, 23. . . . Ne fakamatala mai ne Alejandro me i te atiakaga o uiga konā e se fakalagolago ki toku malosi, kae ki te agaga tapu o te Atua. Ne ‵fuli katoatoa eiloa ne te munatonu tenā taku kilokiloga!”

Mai te fakalagolago ki te fesoasoani o te Atua, ne manumalo eiloa a Waldo i ana lagonaga takalialia i tena olaga. Ana muna: “E se mafai o tali‵tonu oku kāiga mo oku taugasoa mua ki te ‵fuliga lasi ne fai ne au.” Ne toe fai mai a ia: “Ne ‵fuli ne Ieova au mai i se tagata uiga fakasaua ki se tino uiga filemu.”