Te Faigata ke Alofa ki te Atua

Ko oko eiloa i te faigata ki nisi tino ke a‵lofa ki te Atua. E foliga atu ki a latou a te Atua e pelā me se tino faigata, tō ‵mao, io me e uiga fakasaua. Mafaufau ki lagonaga konei o nisi tino:

• “Ne ‵talo au ki te Atua mō se fesoasoani, kae i te taimi foki eiloa tenā ne mafaufau au me ko tō ‵mao a ia, toeitiiti ko se mafai o oko atu ki ei. E fai eiloa te Atua ki a au, e pelā me se tino atamai e aunoa mo ne lagonaga.”​—Marco, mai i Italia.

• “E tiga eiloa ne manako tonu au ke tavini atu ki te Atua, e foliga mai me ko tō ‵mao a ia. Ne mafaufau au me i a ia se Atua uiga fakasaua, telā e manako fua o fakasala tatou. Ne seki talitonu au me e maua ne ia a lagonaga alofa.”​—Rosa, mai Kuatemala.

• “I te taimi koi foliki ei au, ne talitonu au me e ‵sala faeloa te Atua ki ‵tou mea ‵se, e toka o fakasala tatou māfai ko ‵tau o fai penā. Fakamuli ifo, ne kilo atu au e pelā me e seai ne ana lagonaga alofa. Ne fai te Atua e pelā me ko te ulu o te malo telā e tausi atu ki tino kolā e takitaki ne ia​—kae e se fiafia tonu a ia ki a latou.”​—Raymonde, mai Kanata.

Se a tau faka‵tau? E se alofa mai te Atua? Ne fakasae aka ne Kelisiano a te fesili tenā i te fia o senitenali ko ‵teka atu. A te ‵tonuga loa, i te Vaitaimi o te Pouliga, ne seki ‵talo atu a te tokoukega o tino i Lotu Kelisiano lauiloa ki te Atua Malosi Katoatoa. Kaia e seki fai ei latou penā? Ne pole‵pole a tino i te ma‵taku ki a ia. Ne fakamatala mai penei ne te tino tusitala ko Will Durant: “E mafai pefea ne se tino agasala o ‵talo atu ki se Atua fakamataku kae ‵mao?”

Kaia ne ‵kilo atu ei ki te Atua e pelā me se Atua “fakamataku kae ‵mao”? Se a te mea e akoako tonu mai i te Tusi Tapu e uiga ki te Atua? E mata, e mafai o fesoasoani atu a te tauloto ki te munatonu e uiga ki te Atua ke alofa koe ki a ia?