TALI KI FESILI MAI TE TUSI TAPU

Se a te pogai e toe foki mai ei a Keliso?

A koi tuai o fanaka a Iesu Keliso ki te lagi i te 33 T.A., ne folafola atu ne ia me ka toe foki mai a ia. Ne fakatusa ne ia a ia eiloa ki se tagata maluga telā ne fanatu keatea mō se taimi leva ‵ki kae toe foki mai mo te malosi ke pule e pelā me se tupu. A te pogai o te ‵toe foki mai o Iesu ko te mea ke fakafoki mai ne ia ki tino se pulega ‵lei.​—Faitau te Luka 19:11, 12.

Se a te foitino e toe foki mai ei a Keliso? Ne toe fakatu aka a ia e pelā me se tino faka-te-agaga. (1 Petelu 3:18) Oti aka, fanatu ei a ia ki te lagi kae sagasaga i te feitu fakaatamai o te Atua. (Salamo 110:1) Mai tua ifo o se taimi leva ‵ki, ne avatu ei a Iesu ki mua o Ieova te Atua, ko “ia telā e ola ki te se gata mai,” ke tuku atu ki a Iesu te malosi ke pule ki luga i tino. Tela la, e toe foki mai a Iesu, e se pelā me se tino, kae e pelā me se Tupu sē matea. ​—Faitau te Tanielu 7:13, 14.

Ne a mea ka fai ne Iesu māfai ko oko mai a la?

I te taimi e oko mai ei a Iesu i se feitu sē matea, ka fakamasino ne ia a tino. Ka fakaseai atu ne ia a tino amio ma‵sei, kae tuku mai ne ia te ola se-gata-mai ki tino kolā e talia ne latou a ia e pelā me ko te Tupu.​—Faitau te Mataio 25:31-33, 46.

A te pulega a Iesu e pelā me ko te Tupu ka ‵fuli i ei a te lalolagi ki se palataiso. Ka faka‵tu aka ne ia a tino ‵mate ko te mea ke mafai o ola i te lalolagi Palataiso.​—Faitau te Luka 23:42, 43.