Te Faiga o Filifiliga ‵Poto a Koi Talavou Koe

1. Ne a avanoaga fakafiafia e maua ne talavou Kelisiano e tokouke?

E OLA nei tatou i toe taimi tāua. E lau i miliona a tino ko ‵fuli mai ki te tapuakiga tonu, se mea telā e seki tupu aka eiloa i tala fakasolopito mai mua. (Faka. 7:9, 10) Ne maua eiloa ne talavou e tokouke a tulaga fakafiafia i te taimi ne fesoasoani atu ei latou ki nisi tino ke malamalama i muna‵tonu mai te Tusi Tapu. (Faka. 22:17) E fai ne nisi talavou a akoga faka-te-Tusi Tapu, e fesoasoani atu ei ki nisi tino ke maua se olaga e tai ‵lei atu. E ave ne nisi tino a te tala ‵lei ki nisi koga kolā e fai‵pati ki ‵gana fakaa‵tea. (Sala. 110:3; Isa. 52:7) E mafai pefea o fiafia malosi koe ki te galuega fakamalie loto telā e fai ne tino o Ieova?

2. E fakaasi mai pefea i te fakaakoakoga a Timoteo i a Ieova e loto fiafia o tuku atu a tiute ki talavou? (Ke onoono ki te ata i te kamataga.)

² E pelā me se talavou, e mafai ne koe o fai a filifiliga kolā ka maua fakamuli ne koe i ei avanoaga i te taviniga ki te Atua. Pelā me se fakaakoakoga, e manino ‵lei me ne fai ne Timoteo mai Lusa a filifiliga ‵poto kolā ne iku atu ki te mauaga ne ia se tofiga fakamisionale i te taimi koi talavou ei a ia io me ko 20 tupu ana tausaga. (Galu. 16:1-3) E foliga mai me ne nāi masina fua fakamuli ifo, ne tiakina ei ne Paulo a te fakapotopotoga fou telā ne fatoa fakatu aka i Tesalonia ona ko fakasauaga ‵teke, kae ne tuku atu ki a Timoteo a te galuega ke toe foki ki Tesalonia o fakamalosi aka a taina. (Galu. 17:5-15; 1 Tesa. 3:1, 2, 6) E mata, e mafai ne koe o fakaataata a lagonaga o Timoteo i te mauaga ne ia te tofiga tenā?

TE ‵TOE FILIFILIGA TĀUA A KOE

3. Se a te ‵toe filifiliga tāua e mafai o fai ne koe i te olaga, kae ko te taimi fea e mafai ei ne koe o fai te mea tenā?

³ A te tulaga talavou ko te taimi e fai ei a filifiliga tāua. Kae tasi eiloa te filifiliga telā e tāua atu i lō nisi filifiliga katoa​—ko tau fakaikuga ke tavini atu ki a Ieova. Se a te ‵toe taimi ‵lei ke fai a te filifiliga tenā? Muna a Ieova: “Masaua . . . te Atua telā ne faite ne ia koutou, i aso konei koi ‵tupu ake ei koutou.” (Fai. 12:1) A te auala fua e tasi ke “masaua” a Ieova ko te tavini katoatoa atu ki a ia. (Teu. 10:12) A tau fakaikuga ke tavini atu ki te Atua mo tou loto kātoa ko te ‵toe filifiliga tāua ka fai ne koe. Ka aoga eiloa ki tou olaga kātoa.​—Sala. 71:5.

4. I tafa o te filifiliga ke tavini atu ki a Ieova, ne a nisi filifiliga tāua o te olaga ka pokotia i ei tau taviniga ki te Atua?

⁴ E tonu, a tau filifiliga ke tavini atu ki a Ieova e se ko te filifiliga fua telā e pokotia i ei tou olaga i aso mai mua. Pelā me se fakaakoakoga, kāti ka mafaufau foki koe me ko koe e avaga, ko oi ka avaga koe ki ei, kae ka tausi atu pefea koe ki tou olaga. E tāua a fakaikuga konei, kae ka poto eiloa koe māfai e filifili muamua koe o tavini katoatoa atu ki a Ieova. (Teu. 30:19, 20) Kaia? Me i filifiliga konei e ‵soko tasi. A tau fakaikuga e uiga ki te avaga mo te galuega ‵togi ka pokotia i ei a tau taviniga ki te Atua. (Faka‵tusa ki te Luka 14:16-20.) I te suā feitu, a tou manako o tavini atu ki te Atua ka pokotia i ei au filifiliga e uiga ki te avaga mo te galuega ‵togi. Tela la, ke fakaiku aka me se a te ‵toe mea tāua.​—Fili. 1:10.

SE A TAU MEA KA FAI A KOI TALAVOU KOE?

5, 6. Fakamatala mai te auala e mafai ei o iku atu a te faiga o filifiliga tonu ki tulaga fakafiafia fakamuli. (Ke onoono foki ki te mataupu “Te Mea ne Filifili ne au a Koi Tamaliki ei au” i te lōmiga tenei.)

⁵ Kafai ko oti ne filifili aka ne koe ke tavini atu ki te Atua, e mafai o fakaataata ne koe i tou mafaufau a te mea telā e manako mai a ia ke fai ne koe, ko fakaiku aka ei ne koe te auala ka tavini atu ei koe ki a ia. Ne tusi mai se taina Tiapani: “I te taimi ko 14 ei oku tausaga, ne fano au i te galuega talai fakatasi mo se toeaina i te fakapotopotoga telā ne matea mai ne ia i a au e se fiafia ki te galuega talai. Ne faipati malie mai tou tagata ki a au: ‘Yuichiro, fano ki te fale. Sagasaga ki lalo i tau tamā taipola kae mafaufau faka‵lei ki mea ne fai ne Ieova mō koe.’ Ne fano eiloa au e pelā mo ana pati. Ne mafaufau kae ‵talo faeloa au mō nāi aso. Ne fulifuli malielie eiloa taku kilokiloga. E seki leva, kae kamata au o fiafia i te taviniga ki a Ieova. Ne fiafia au o faitau e uiga ki misionale, kae ne kamata au o mafaufau ki te tavini katoatoa atu ki te Atua.”

⁶ “Ne fakaiku aka ne au ke kamata o fai a filifiliga kolā ka mafai ei au o tavini atu ki a Ieova i nisi fenua,” e fai mai a Yuichiro. “Pelā me se fakaakoakoga, ne filifili aka ne au ke akoga au ki te ‵gana Palagi. I te taimi ne tiakina ei ne au te akoga, ne filifili ne au te galuega sē tumau i te akoako atu o te ‵gana Palagi ko te mea ke mafai ne au o paenia. I te taimi ko 20 ei oku tausaga, ne kamata ei au o tauloto ki te ‵gana Mongolia kae ne maua ne au se avanoaga ke āsi atu ki se potukau o tino talai Mongolia. E lua tausaga mai tua ifo i te 2007, ne āsi ei au ki Mongolia. I te taimi ne olo ei matou mo nisi paenia o talai kae kilo atu ki te tokouke o tino e ‵sala ki te munatonu, ne manako ei au o fano ki konā o fesoasoani. Ne toe foki au ki Tiapani o fai aku palani. Ne galue fakapaenia au i Mongolia talu mai i a Apelila 2008. E se faigofie te olaga i konei, kae e ‵saga mai eiloa a tino ki te tala ‵lei, kae ne mafai ne au o fesoasoani atu ki a latou ke fakapili‵pili mai ki a Ieova. Ne mafaufau aka au i te filifiliga ne fai ne au ko te ‵toe auala ‵lei i te olaga.”

7. Ne a filifiliga e ‵tau o fai ne tatou, kae se a te fakaakoakoga ne fai ne Mose mō tatou?

⁷ E ‵tau mo tino taki tokotasi o fai a tena filifiliga totino ki te auala ka fakaaoga ei tena olaga e pelā me se Molimau a Ieova. (Iosu. 24:15) E se mafai o fai atu matou ke avaga koe, ko oi ke avaga ki ei, io me se a te galuega ‵togi e ‵tau o maua ne koe. E mata, ka filifili koe ki se galuega telā e mu‵tana fua akoakoga e manakogina? A nisi o koutou talavou Kelisiano e ola i fa‵kai ma‵tiva; ka ko nisi e ola i fa‵kai mau‵mea. I te lalolagi kātoa, e ‵kese ‵ki otou uiga totino, mea e mafai o fai, mea e iloa, mea e fia‵fia ki ei, mo te fakatuanaki. E se taumate e ‵kese ‵ki koutou e pelā mo talavou Epelu i Aikupito ne ‵kese mo te talavou ko Mose. Ne maua ne ia avanoaga katoa i te fale o te tupu, kae ko nisi tino Epelu ne fai mo pologa. (Eso. 1:13, 14; Galu. 7:21, 22) Ne ola latou i toe taimi tāua e pelā mo koutou. (Eso. 19:4-6) Ne ‵tau mo tino taki tokotasi o filifili me se a te mea ka fai ne ia ki tena olaga. Ne fai ne Mose a te filifiliga tonu.​—Faitau te Epelu 11:24-27.

8. Se a te fesoasoani e mafai o maua ne talavou kolā e mafaufau ‵loto ki olotou filifiliga i te olaga?

⁸ E fesoasoani atu a Ieova ke fai ne koe a filifiliga ‵poto a koi talavou koe. E tuku atu ne ia a pati fakatonutonu e auala i fakatakitakiga fakavae kolā e mafai o fakaaoga ne koe ki ou fakanofonofoga totino. (Sala. 32:8) E se gata i ei, e mafai ne ou mātua tali‵tonu mo toeaina i te fakapotopotoga o fesoasoani atu ki a koe i te fakagaluegaga o fakatakitakiga fakavae konei. (Faata. 1:8, 9) Ke mafau‵fau tatou ki fakatakitakiga fakavae e tolu mai te Tusi Tapu kolā e mafai o fesoasoani atu ki a koe ke fai a filifiliga ‵poto kolā ka aoga ki tou olaga i aso mai mua.

E TOLU FAKATAKITAKIGA FAKAVAE MAI TE TUSI TAPU E TAKITAKI EI KOE

9. (a) E faka‵malu pefea tatou ne Ieova mai te tukumaiga o te saolotoga ke filifili? (e) Ne a avanoaga e mafai o maua māfai koe e ‘sala muamua ki te Malo’?

⁹ ‵Sala muamua ki te Malo o te Atua mo tena amiotonu. (Faitau te Mataio 6:19-21, 24-26, 31-34.) E faka‵malu tatou ne Ieova mai te tukumaiga o te saolotoga ke fai a filifiliga. E seki fai mai ne ia me pefea te lasi o tou taimi e ‵tau o fakamāumāu ki te talaiga o te Malo e pelā me se talavou. Kae ne tuku mai ne Iesu te fakatakitakiga aoga ke ‵sala muamua ki te Malo. Kafai e fakagalue aka ne koe ana pati, ka maua ne koe i ei avanoaga ke fakaasi atu tou alofa ki te Atua, tou manavase ki ou tuakoi, mo tou loto fakafetai ki te fakamoemoega o te ola se-gata-mai. I te taimi e mafaufau ei koe ki te avaga mo te galuega ‵togi, mafaufau me ko au filifiliga ka fai ei koe ke manavase ki manakoga faka-te-foitino io me fakaasi atu i ei tou loto finafinau ki te Malo o te Atua mo tena amiotonu.

10. Se a te mea ne fai ei a Iesu ke fiafia, kae ne a filifiliga ka fai ei koe ke fiafia?

¹⁰ Ke maua a te fiafia i te tavini atu ki nisi tino. (Faitau te Galuega 20:20, 21, 24, 35.) Ne akoako mai ne Iesu a te fakatakitakiga fakavae o te olaga tenei ki a tatou. Ne fiafia ‵ki a ia me ne fai ne ia te loto o tena Tamana kae sē ko tena loto. Ne fiafia a Iesu i te laveaga ne ia a tino loto mau‵lalo e ‵saga tonu ki te tala ‵lei. (Luka 10:21; Ioa. 4:34) E se taumate ko oti ne oko ki a koe a te fiafia telā e maua mai i te fesoasoani atu ki nisi tino. Kafai e fakavae ne koe au fakaikuga ‵lasi e fai i te olaga ki fakatakitakiga fakavae kolā ne akoako mai ne Iesu, e mautinoa me ka fiafia eiloa koe e pelā foki mo Ieova.​—Faata. 27:11.

11. Kaia ne galo ei i a Paluka a tena fiafia, kae se a te polopolokiga ne tuku atu ne Ieova ki a ia?

¹¹ A ‵tou fiafia lasi e maua mai i te tavini atu ki a Ieova. (Faata. 16:20) E foliga mai me ne puli i te failautusi a Ielemia, ko Paluka, a te mea tenā. Ne oko a ia ki se tulaga telā ko sē fiafia i te taviniga ki a Ieova i te taimi e tasi. Ne fai atu a Ieova ki tou tagata: “E taumafai koe o salasala se togafiti ‵lei mō koe? Sa fai te mea tenā. Ka aumai ne au a te mala ki tino katoa, ka ko koe e fakasao tou ola i so se koga e fano koe ki ei.” (Iele. 45:3, 5) Se a tau faka‵tau? Se a te mea ne mafai o fakafiafia atu ki a Paluka​—ko te salasala ki mea e uke io me ko te sao atu e pelā me se tavini fakamaoni a te Atua i te fakamaofaga o Ielusalema?​—Iako. 1:12.

12. Se a te filifiliga a Ramilo ko ala ei o maua se olaga fiafia?

¹² A te taina e tokotasi telā ne fiafia i te tavini atu ki nisi tino ko Ramiro. E fai mai tou tagata: “Au ne vau i se kāiga ma‵tiva e ‵nofo i se fa‵kai i te Andes Mountains. Tela la, i te ofomaiga toku taina matua ke ‵togi ne ia au i te akoga maluga, se avanoaga lasi ‵ki tenā. Kae ko au ne fatoa papatiso fua mo fai se Molimau a Ieova, kae ne maua ne au a te suā avanoaga​—se ‵kamiga mai i se paenia ke talai fakatasi mo ia i se fa‵kai foliki. Ne fano au ki konā, tauloto ki te ‵kamu ulu, kae kamata se pisinisi ‵kamu ulu mo oku tausi. I te taimi ne akoako atu ne māua ki tino a Tusitusiga Tapu, e tokouke a tino ne talia ne latou mo te loto fia‵fia. Fakamuli ifo, ne kau atu au ki se fakapotopotoga ne fatoa fakatu kae fakaaoga a te ‵gana o te fenua tenā. Ko sefulu nei oku tausaga i te taviniga tumau. E seai aka se isi galuega e maua ei ne au a te fiafia e pelā mo te fiafia telā e maua ne au mai te fesoasoani atu ki tino ke tauloto ki te tala ‵lei i olotou ‵gana tonu.”

13. Kaia e fai ei a te tulaga talavou mo fai se taimi ‵lei ke tavini katoatoa atu ki a Ieova?

¹³ Ke fiafia o tavini atu ki a Ieova a koi talavou koe. (Faitau te Failauga 12:1.) E se ‵tau koe o mafaufau ke maua muamua se galuega ‵lei ko te mea ke mafai koe o tavini fakamuli atu ki a Ieova. A te tulaga talavou ko te taimi ‵lei ke kamata koe o tavini katoatoa atu ki a Ieova. E tokouke a talavou e se uke olotou tiute e fai i te kāiga kae maua ne latou te malosi mo te ola ‵lei ke fakafesagai atu ki tofiga faiga‵ta. Se a te mea e manako koe o fai mō Ieova a koi talavou koe? E se taumate e fakamoemoe koe ke paenia. Kāti ka manako koe o galue i se koga e fai‵pati ki se ‵gana fakaa‵tea. Io me e lavea ne koe auala ke tavini katoatoa atu koe i te fakapotopotoga tenā e nofo koe i ei. Faitalia me se a tou fakamoemoega i te taviniga ki te Atua, ka manako eiloa koe ki se auala e tausi ei tou olaga. E pefea te uke o akoakoga e manakogina ne koe? Se a tau filifiliga ka fai?

TE FAKAAOGAGA O FAKATAKITAKIGA FAKAVAE MAI TE TUSI TAPU KE FAI A FILIFILIGA ‵POTO

14. Se a te mea e ‵tau o fakaeteete i ei se tino māfai e palani mō te taimi mai mua?

¹⁴ A fakatakitakiga fakavae e tolu mai te Tusi Tapu kolā ne mafau‵fau faka‵lei tatou ki ei e mafai o fesoasoani atu ki a koe ke filifili aka me tefea te galuega e ‵lei ki a koe. E se taumate e iloa ne ou tino fakatonutonu i te akoga a galuega kolā e mafai o maua i te koga tenā e nofo koe i ei. Io me fai atu se tino o te malo ki a koe ki te galuega telā e manakogina ne tino i konā io me ko te koga telā e manako koe o galue i ei. A fakamatalaga kolā e maua mai tino o te malo e mafai o fesoasoani mai​—kae ke fakaeteete i ei. E taumafai a tino kolā e se a‵lofa ki a Ieova o ‵toki a te alofa ki te lalolagi i tou loto. (1 Ioa. 2:15-17) I te taimi e kilo ei koe ki mea kolā e ofo mai ne te lalolagi, e faigofie o faka‵se koe ne tou loto.​—Faitau te Faataoto 14:15; Iele. 17:9.

15, 16. Ko oi a toe tino ‵lei ke fesoasoani atu ki a koe i te filifiliga o se galuega ‵togi?

¹⁵ Kafai ko iloa ne koe a galuega kolā e mafai o maua, e manakogina ne koe a pati fakatonutonu aoga. (Faata. 1:5) Ko oi e mafai o fesoasoani atu ki a koe i te filifiliga o te galuega telā e ‵lei ki a koe e ‵tusa mo fakatakitakiga fakavae mai te Tusi Tapu? Fakalogo ki tino kolā e a‵lofa ki a Ieova, e a‵lofa atu ki a koe, kae iloa ‵lei ne latou a koe mo ou fakanofonofoga. Ka fesoasoani atu latou ki a koe i te iloiloga o mea e mafai ne koe o fai mo mea e manako koe o fai. E se taumate ka fesoasoani atu olotou pati ki a koe ke toe mafaufau ki ou fakamoemoega. Se fakamanuiaga eiloa ki a koe māfai ou mātua e a‵lofa ki a Ieova! A toeaina foki i tau fakapotopotoga ne tāgata faka-te-agaga kolā e mafai o fesoasoani atu ki a koe. E se gata i ei, ke faipati atu foki ki paenia mo ovasia faima‵laga. Kaia ne filifili ei latou ke ga‵lue i te taviniga tumau? Ne kamata pefea latou o paenia, kae ne tausi atu pefea latou ki a latou eiloa? Ne a ikuga fakamalie loto ne maua mai i te lotou galuega talai?​—Faata. 15:22.

¹⁶ E mafai ne tino kolā e iloa ‵lei ne latou a koe o tuku atu a fakatakitakiga ‵poto. Pelā me se fakaakoakoga, mafaufau i a koe ko manako o tiakina te akoga maluga kae kamata o paenia ona fua ko koe e se fiafia ki te galuega ‵mafa telā e manako mai te akoga ki ei. A te tino telā e alofa ki a koe e mafai o malamalama i ou lagonaga kae fesoasoani atu ke iloa ne koe me e mafai ne te akoga o fesoasoani atu ke tauloto koe ki te uiga ko te sē ‵fiu vave, telā e tāua ‵ki māfai e manako koe o tavini katoatoa atu ki a Ieova.​—Sala. 141:5; Faata. 6:6-10.

17. Ne a fakaikuga e ‵tau mo tatou o ‵kalo kea‵tea mai i ei?

¹⁷ Ka fe‵paki a tino taki tokotasi kolā e tavini atu ki a Ieova mo tulaga fakama‵taku i te feitu faka-te-agaga​—ko fakamalosiga kolā e mafai o ‵futi ei a ia kea‵tea mai i a Ieova. (1 Koli. 15:33; Ko. 2:8) Kae mafai o fakamataku atu a nisi galuega ki te feitu faka-te-agaga i lō nisi galuega. E mata, e isi ne tino i te koga e nofo koe i ei ko oti ne fakama‵sei “olotou fakatuanaki e pelā me se vaka kasa” mai tua o te filifiliga se galuega ‵togi? (1 Timo. 1:19) Se mea poto eiloa māfai koe e ‵kalo kea‵tea mai i te faiga o fakaikuga kolā e fakamasei ei a tou fesokotakiga mo te Atua.​—Faata. 22:3.

KE FIAFIA A KOI FAI KOE PELĀ ME SE TALAVOU KELISIANO

18, 19. Kafai se tino e seki ai sena lagonaga ke tavini atu ki a Ieova, se a te mea e ‵tau o fai ne ia?

¹⁸ Kafai ko oti ne ati aka ne koe i tou loto se manakoga ke tavini atu ki a Ieova, ke fiafia koe ki avanoaga kolā e tuku mai a koi fai koe pelā me se tavini talavou a te Atua. Ke fai a filifiliga kolā ka mafai ei koe o tavini atu mo te fiafia ki a Ieova i taimi fia‵fia konei.​—Sala. 148:12, 13.

¹⁹ I te suā feitu, se a tau mea e ‵tau o fai māfai e seki ai sou lagonaga ke tavini atu ki a Ieova? Sa ‵fiu i te taumafai o fakamalosi aka a tou fakatuanaki. I te otiga ne fakamatala mai ne te apositolo ko Paulo ana taumafaiga ne fai ke kausaki atu ki te vaegā olaga telā e mafai o fakamanuia ne te Atua, ne tusi mai tou tagata: “Kafai e se maua ne koutou a te mea tenā i so se feitu, ka fakaasi atu eiloa ne te Atua a te kilokiloga tonu ki a koutou. E ui i ei, ke na sa‵sale faka‵lei tatou e ‵tusa mo te ‵tou ga‵solo ki mua i te auala eiloa tenei.” (Fili. 3:15, 16) Ke tumau eiloa i te mafau‵fau ki te alofa o te Atua mo ana fakatakitakiga ‵poto. A Ieova, telā e ‵lei atu i so se tino, e mafai o fesoasoani atu ki a koe ke fai a filifiliga ‵poto a koi talavou koe.