‵Fuli ki Lalo a Manatu ‵se Katoa Kolā e ‵Teke ki te Poto o te Atua

1. Se a te faka‵pulaga ne fai atu ne te apositolo ko Paulo ki Kelisiano fakaekegina?

“FAKAGATA,” ko te faka‵pulaga a Paulo. Fakagata te a? “Fakagata te fakaakoako ki te olaga masani tenei.” (Loma 12:2) Ne fai ne Paulo a pati konā ki Kelisiano i te senitenali muamua. Kaia ne fai atu ei ne ia a te fakamalosiga tai ‵mafa tenā ki tāgata mo fāfine kolā ne tukugina atu ki te Atua kae fakaekegina ki te agaga tapu?—Loma 1:7.

2-3. Ne a taumafaiga a Satani e fai ke ‵fuli kea‵tea tatou mai i a Ieova, kae e mafai pefea o tapale kea‵tea ne tatou a mea kolā ko “leva ne ‵mau olotou aka” i ‵tou mafaufau?

² Ne manavase a Paulo me e isi ne Kelisiano ko kamata o pokotia i manatu sē ‵lei mo poto o tāgata kolā e fakamalosi aka ne te lalolagi a Satani. (Efe. 4:17-19) E mafai o tupu te mea tenā ki so se tino i a tatou. I ana taumafaiga ke ‵fuli tatou kea‵tea mai i a Ieova, e fakaaoga ne Satani, te atua o te olaga tenei a togafiti kese‵kese. E tasi mai ei ko te fakaaogaga ne ia te manakoga i a tatou ke maua se tulaga maluga io me fia takutakua. E mafai foki o fakaaoga ne ia te auala ne ‵tupu aka ei tatou, ‵tou tuu mo aganuu, io me ko ‵tou akoakoga ke fai tatou ke mafau‵fau pelā mo ia.

³ E mata, e mafai o tapale kea‵tea a mea kolā “ko leva ne ‵mau olotou aka” i ‵tou mafaufau? (2 Koli. 10:4) Onoono ki te tali a Paulo: “Ko ‵fuli ne matou ki lalo a manatu ‵se mo mea ma‵luga katoa kolā e ‵teke atu ki te poto o te Atua, kae e fakatakavale ne matou a manatu katoa ko te mea ke faka‵logo ki te Keliso.” (2 Koli. 10:5) Ao, mai te fesoasoani o Ieova e mafai eiloa o pule atu tatou ki manatu sē ‵tonu. E pelā mo te malosi o te vailakau ke tapale ne ia te poisini, e mafai ne te Muna a te Atua o fesoasoani mai ke tapale kea‵tea a mea poisini a te lalolagi a Satani.

“KE ‵FULI OTOU MAFAUFAU”

4. Ne a fakama‵fuliga ne fai ne te tokoukega o tatou i te taimi muamua ne talia ei ne tatou te munatonu?

⁴ Toe mafaufau ki fakama‵fuliga kolā ne ‵tau o fai ne koe i te taimi muamua ne talia ei ne koe te munatonu mai te Muna a te Atua kae fakaiku aka ke tavini atu ki a Ieova. Te tokoukega o tatou ne ‵tau o fakagata te faiga o nisi amioga ma‵sei. (1 Koli. 6:9-11) E loto fakafetai eiloa tatou ki te fesoasoani o Ieova ke mafai o manumalo i vaegā faifaiga agasala penei!

5. Ne a mea e lua e fakaasi mai i te Loma 12:2 e ‵tau o fai ne tatou?

⁵ Kae ke mo a ma mafau‵fau me ko se ‵tau o toe fai ne tatou ne fakama‵fuliga. E ui loa ko se toe fai ne tatou a agasala matagā kolā ne fai muamua ne tatou a koi tuai ei o papatiso, e ‵tau o ga‵lue malosi tatou ke ‵kalo kea‵tea mai so se mea telā e tofotofogina ei tatou ke toe ‵foki o fai a mea mua konā. E fai pefea ne tatou te mea tenā? Ne tali mai a Paulo: “Fakagata te fakaakoako ki te olaga masani tenei, kae ke ‵fuli otou mafaufau.” (Loma 12:2) Tela la, e lua a mea e ‵tau o fai. Muamua la, e ‵tau o “fakagata te fakaakoako,” io me fulifuli tatou ne te lalolagi tenei. Te lua, e ‵tau o ‘‵fuli ‵tou mafaufau.’

6. Se a te mea e tauloto ne tatou mai te uiga o pati a Iesu ne tusi i te Mataio 12:43-45?

⁶ A te ‵fuliga telā ne fakauiga a Paulo ki ei e se ko te ‵fuliga fua o foliga i tua. E aofia i ei a vaega katoa o tatou. (Onoono ki te pokisi “Ke ‵Fuli io me Fulifuli?”) E ‵tau o ‵fuli ‵tou mafaufau—‵tou uiga, lagonaga, mo manakoga i ‵tou loto. Tela la, e ‵tau mo tatou taki tokotasi o fesili ifo, ‘A ‵fuliga e fai ne au ke fai au pelā me se Kelisiano, e mata, se mea fua e fai ke lavea mai ne tino, io me ‵goto tonu eiloa ki toku loto?’ E tāua ke iloa ne tatou te ‵kese. I ana pati ne tusi i te Mataio 12:43-45, ne fakaasi mai ne Iesu a te mea e ‵tau o fai. (Faitau.) E isi se akoakoga tāua e maua mai i pati konā: E se ‵tau fua o tapale kea‵tea a mafaufauga sē ‵lei; e ‵tau o faka‵fonu ne tatou a ‵tou mafaufau ki mafaufauga o te Atua.

“TUMAU KOUTOU I TE FAKA‵FOUGA O OTOU MAFAUFAU”

7. E ‵fuli pefea ne tatou a mea i loto i ‵tou loto?

⁷ E mata, e mafai o ‵fuli a ‵tou manakoga masani io me ko mea i loto i ‵tou loto? Tenei te tali i te Muna a te Atua: “E ‵tau o tumau koutou i te faka‵fouga o otou mafaufau, kae e ‵tau o ‵pei ki uiga ‵fou kolā ne faite e ‵tusa mo te loto o te Atua i te tinā amiotonu mo te fakamaoni.” (Efe. 4:23, 24) Ao, e mafai eiloa o ‵fuli a mea i loto i ‵tou loto, kae e se faigofie te mea tenā. E uke a mea e ‵tau o fai i tafa o te ‵teke atu fua ki manakoga mo faifaiga ma‵sei. E ‵tau o ‵fuli ne tatou ‵tou “mafaufau.” E aofia i ei te ‵fuli ne tatou a mea e fia‵fai ki ei, ‵tou manakoga, mo mea e fakamalosi aka i ei a manakoga konā. Se faifaiga telā e ‵tau o fakatumau faeloa.

8-9. Ne fakaasi mai pefea ne te tala o se taina a te manakoga ke ‵fuli katoatoa a mea i ‵tou loto?

⁸ Ke onoono nei tatou ki se tala o se taina telā ne amio fakasaua i te taimi ne tupu aka ei. I te otiga ne fakagata ne ia tena inu malosi mo te fusu sāle, ne toka a ia ke papatiso, kae tuku atu i ei se molimau gali ki tino i te fakai foliki ne nofo a ia i ei. Kae i te afiafi e tasi, mai tua malie o tena papatisoga, ne oko mai ki a ia se tofotofoga seki fakamoemoegina. Ne vau se tagata vale ki tena fale o fia fusu ki a ia. Muamua la, ne seki fia saga atu te ‵tou taina tenei ki te tino vale tenā. Kae i te taimi eiloa ne fai ne te tagata tenei a pati sē ‵tau ki te igoa o Ieova, ne seki mafai ne te ‵tou taina fou tenei o taofi tena kaitaua. Ne vau a ia ki tua, tā ei ne ia te tagata tenā. Se a te fakalavelave? E ui loa ko oti ne fakagata aka ne ia tena uiga kaitaua e auala i tena akoga faka-te-Tusi Tapu, ne seki mafai ne ia o ‵fuli katoatoa tena mafaufau. I nisi tugapati, ne seki ‵fuli ne ia a mea i loto i tena loto.

⁹ Kae ne seki ‵fiu te taina tenei. (Faata. 24:16) Mai te fesoasoani o toeaina ne gasolo eiloa a ia ki mua. Ne fetaui ‵lei ei a ia ke fai pelā me se toeaina. Kae i te suā afiafi, i tua eiloa o te Fale Tapuaki, ne toe fepaki a ia mo se tofotofoga telā e tai ‵pau mo te tofotofoga telā ne fepaki mo ia i te fia tausaga mai mua atu. E isi se tagata vale e fia fusu ki se toeaina e tokotasi. Se a te mea ne fai ne te ‵tou taina? I se auala filemu, kae loto maulalo, ne fakasakosako a ia mo te tagata vale, faka‵noga aka tena kaitaua, kae ‵taki atu te tagata vale ki tena fale. Se a te mea ne tupu? Ko oti ne ‵fuli katoatoa te mafaufau o te ‵tou taina. Ko oti ne ‵fuli katoatoa a tena loto, ke fai pelā me se tino filemu, kae loto maulalo—ke avatu fua i ei a vikiga ki a Ieova!

10. Ne a ‵tou mea e ‵tau o fai ke fai a ‵fuliga konei?

¹⁰ A ‵fuliga konei e se ‵tupu fua i se po e tasi; io me ‵tupu fakafuasei fua. E manakogina ke ‘fakapalele ‵tou mafi’ i loto i se fia tausaga. (2 Pe. 1:5) E se fakauiga i ei me kafai ko leva koe “i te munatonu” ko lava loa i ei. E ‵tau o fai ne tatou te ‵toe mea e mafai ke ‵fuli a mea i ‵tou loto. E isi ne mea kolā e ‵tau o fai ke fai a ‵fuliga konei. Ke onoono tatou ki nai mea.

TE AUALA KE ‵FULI EI ‵TOU MAFAUFAU

11. E fesoasoani mai pefea a ‵talo ke ‵fuli ‵tou mafaufau?

¹¹ ‵Talo ko te auala tāua muamua. E ‵tau o ‵talo tatou pelā mo te faisalamo: “Faite i loto i a au se loto ‵ma, e te Atua, kae tuku ki loto i a au se agaga fou, telā e ‵mautakitaki.” (Sala. 51:10) E ‵tau o talia ne tatou te manakoga ke fai ne ‵fuliga ki ‵tou mafaufau kae akai atu ki a Ieova mō se fesoasoani. E fakamautinoa aka pefea ne tatou me ka fesoasoani mai a Ieova ki te faiga o te ‵fuliga tenā? E maua eiloa ne tatou se fakamalosiga e auala i te folafolaga a Ieova e uiga ki tino Isalaelu loto ma‵keke i aso o Esekielu: “Ka tuku atu ne au ki a latou te loto ‵kau fakatasi, kae tuku ne au se agaga fou ki loto i a latou . . . kae tuku atu ki a latou se loto malū, [telā e toka o tautali i te takitakiga a te Atua].” (Eseki. 11:19) Ne loto fiafia a Ieova o fesoasoani ki tino Isalaelu konā ke ‵fuli, kae e toka foki a ia o fesoasoani mai ki a tatou.

12-13. (a) E ‵tusa mo te Salamo 119:59, ne a mea e ‵tau o mafaufau ‵loto tatou ki ei? (e) Ne a fesili e ‵tau o ‵sili ifo ne koe?

¹² Te mafaufau ‵loto ko te lua o auala tāua. I te taimi e fai‵tau ei tatou ki te Muna a te Atua i aso takitasi, e ‵tau o fakaavanoa a taimi ke mafaufau ‵loto, io me ke mafaufau faka‵lei, ki vaegā mafaufauga mo lagonaga kolā e ‵tau o ‵fuli ne tatou. (Faitau te Salamo 119:59; Epe. 4:12; Iako. 1:25) E ‵tau o iloa ne tatou māfai ko isi se manakoga i a tatou ke ‵saga atu ki poto o tāgata. E ‵tau o fakaasi ‵tonu atu ne tatou a ‵tou vāivāiga, ko ga‵lue malosi ei o tapale kea‵tea a vāivāiga konā.

¹³ E pelā me se fakaakoakoga, fesili ifo ki a koe: ‘E mata, e isi se tamā uiga loto masei io me kaisanosano i toku loto?’ (1 Pe. 2:1) ‘E mata, e isi se tamā uiga fakamatamata i a au ona ko toku fenua, aku akoakoga, io me ko toku tulaga i mea tau tupe?’ (Faata. 16:5) ‘E mata, e kilo fatauva au ki tino kolā e se maua ne latou a mea e maua ne au io me kolā ne ‵mai i se fenua fakaa‵tea?’ (Iako. 2:2-4) ‘E mata, e ‵gali ki a au a mea e ofo mai ne te lalolagi a Satani?’ (1 Ioa. 2:15-17) ‘E mata, e fiafia au ki ata kolā e isi ne amioga fakatauavaga sē ‵tau i ei kae fakasaua?’ (Sala. 97:10; 101:3; Amo. 5:15) A tali ki fesili totino konei ka fakaasi mai ei a feitu kolā e ‵tau o galue koe ki ei. Kafai e manumalo tatou i manatu kolā ko “leva ne ‵mau olotou aka” i loto i ‵tou loto, ko fakafiafia eiloa ne tatou te ‵tou Tamana i te lagi.—Sala. 19:14.

14. Kaia e tāua ‵ki ei te filifiliga o taugasoa ‵lei?

¹⁴ Filifiliga o taugasoa ‵lei ko te tolu o auala aoga. Faitalia me iloa ne tatou io me ikai, e ma‵losi ‵ki a fakamalosiga e maua mai i tino kolā e fai taugasoa tatou ki ei. (Faata. 13:20) E ‵nofo tasi faeloa tatou mo tino kolā e se fakamalosi aka ne latou a mafaufauga o te Atua i te galuega io me i te akoga. Kae e mafai o maua ne tatou a toe taugasoa ‵lei i taimi o fakatasiga Kelisiano. Tenā te koga e fakamalosi aka ei tatou ke “fakatau a‵lofa kae fai a mea ‵lei.”—Epe. 10:24, 25.

KE “TUMAU I TE FAKATUANAKI”

15-16. Ne a taumafaiga a Satani e fai ke ‵fuli ei ‵tou mafaufau?

¹⁵ Ke masaua, me galue malosi a Satani ke ‵fuli foki ne ia ‵tou mafaufau. E fakaaoga ne ia so se vaegā manatu ke fakaseaoga ne ia te malosi o te munatonu mai te Muna a te Atua.

¹⁶ Koi fakafesili mai eiloa ne Satani a te fesili telā ne fai ne ia ki a Eva i te fatoaga o Etena: “E tonu eiloa i te Atua ne fai atu . . . ?” (Kene. 3:1) I te lalolagi tenei e pule ki ei a Satani, e lagona sāle ne tatou a vaegā fesili kolā e mafai o fai ei a tino ke fakalotolotolua, pelā mo fesili konei: ‘E mata, e se talia eiloa ne te Atua ke avaga a te tagata ki te tagata mo te fafine ki te fafine? E mata, e manako eiloa te Atua ke se fakamanatu ne koe te Kilisimasi mo aso fanau? E mata, e manako tonu eiloa tou Atua ke se fagai koe ki te toto? E mata, e manako eiloa se Atua alofa ke se ‵kau fakatasi koe mo ou tino pele kolā ko oti ne faka‵tea?’

17. Ne a mea e ‵tau o fai ne tatou māfai ko isi ne fesili e fakalotolotolua tatou ki ei e uiga ki ‵tou talitonuga, kae se a te ikuga ka maua ne tatou e pelā mo te mea e fai mai i te Kolose 2:6, 7?

¹⁷ E ‵tau mo tatou o tali‵tonu katoatoa ki ‵tou talitonuga. Kafai e se tali aka ne tatou a fesili kolā e fakalotolotolua tatou i ei, e mafai o se mautinoa i a tatou me ko mea e tali‵tonu tatou ki ei ne mea ‵tonu io me ikai. A manatu fakalotolotolua konā e mafai o ‵fuli fakamuli ne ia ‵tou mafaufau kae fakamasei mai ki ‵tou fakatuanaki. Ne a la mea e ‵tau o fai ne tatou? E fai mai te Muna a te Atua ke ‵fuli ‵tou mafaufau, ko te mea ke fakatalitonu aka ne tatou me “se a te loto o te Atua telā e gali, e logomalie, kae e ‵lei katoatoa.” (Loma 12:2) Mai te faiga faeloa o sukesukega, e mafai o fakatalitonu aka ne tatou a muna‵tonu ne tauloto ne tatou mai te Tusi Tapu. E mafai o tali‵tonu katoatoa tatou me e ‵tonu eiloa a tulaga o Ieova. Kae e pelā me se lakau telā e ‵mau ana aka, ka ‵mautakitaki eiloa tatou, kae “tumau i te fakatuanaki.”—Faitau te Kolose 2:6, 7.

18. Ne a mea ka fesoasoani mai ke ‵teke atu ki mea poisini a te lalolagi a Satani?

¹⁸ E seai aka foki se suā tino e mafai o fai ne ia ke tumau tou fakatuanaki, tela la, ke tumau faeloa i te ‵fuli o tou mafaufau. ‵Talo faeloa; akai atu ki te fesoasoani o te agaga o Ieova. Mafaufau ‵loto; tumau i te iloilo aka ou mafaufauga mo lagonaga. ‵Sala ki taugasoa ‵lei; ke ‵kau fakatasi faeloa mo tino kolā ka fesoasoani atu ki a koe ke ‵fuli tou mafaufau. Mai te fai penā, ka ‵teke atu eiloa koe ki mea poisini a te lalolagi a Satani kae ka manuia eiloa koe i te ‘‵fuliga ki lalo a manatu ‵se mo mea ma‵luga katoa kolā e ‵teke atu ki te poto o te Atua.’—2 Koli. 10:5.