E Mata, ko Oti ne Fakaasi Atu ne Koe a te Faiga o se Akoga i te Asiga Muamua Eiloa?
Kafai e ofo atu ke fai se akoga faka-te-Tusi Tapu, e fai mai a nisi tino me i a latou e se fia‵fia io me e isi eiloa ne olotou akoga faka-te-Tusi Tapu e fai i te lotou lotu. E se iloa ne latou a te gali mo te fakamalie loto a te faiga o se akoga faka-te-Tusi Tapu, ona ko te mea e faka‵pau fua ne latou a te faiga o se akoga mo mea kolā e masani o fai sāle ne latou. Tela la, i lō te ofo atu fua o se akoga, kaia e se fakaaoga ei ne nāi minute ke fakaasi atu a te faiga o se akoga faka-te-Tusi Tapu i te asiga muamua eiloa? Ke fai se fakaakoakoga: Sa fai atu fua ki a latou me i a koe se tino poto i te kuka kae ka toe foki fakamuli mai koe mo ne meakai; na fai eiloa ke tami latou ki ei! Tenei te auala ke fai ei ne koe a te mea tenā i ne nāi minute:
“Se a tau faka‵tau, e mata, ka oko mai eiloa te aso telā ka fakataunu ei a pati konei? [Faitau te Isaia 33:24, kae faka‵tali ki se tali.] Ke fakaasi atu aka ne au se mea gali e uiga ki te mataupu tenei.” Tuku atu ki te tino i te fale a te tusi ko te Akoakoga Mai te Tusi Tapu, kae fakasino atu ki te palakalafa e 22 i te itulau e 36. Faitau atu te fesili mai lalo i te itulau tenā, kae fesili atu ki te tino ke ‵sala ki te tali i te taimi e faitau ei ne koe te palakalafa. Ka oti ko toe fai atu ei ne koe a te fesili, ko fakalogologo ei koe ki te manatu o te tino i te fale. Ke faitau fakatasi ki nisi tusi siki. Ko fakasae aka ei ne koe se fesili ke tali aka i te suā taimi e āsi mai ei koe, kae ke fakamautinoa aka me ka toe foki atu eiloa koe. Ko oti eiloa ne kamata ne koe se akoga faka-te-Tusi Tapu!