Ke Momea Aka Faeloa ‵Tou Atamai i te Galuega Talai—Ke Kamata se Akoga Faka-te-Tusi Tapu Mai te Fakaaogaga o te Tusi ko te Akoakoga a te Tusi Tapu

Te Pogai e Tāua ei: E tokouke a tino e mafai o se malamalama māfai e fai atu tatou me e fai ne tatou a akoga faka-te-Tusi Tapu e aunoa mo se ‵togi. E mafai o mafau‵fau latou me e ‵tau o ‵kau atu latou ki se potukau suke‵suke io me ko te faiga o akoakoga e auala i te meli io me ko te itaneti. I lō te ofoatuga fua o se akoga, kaia e se fakaasi atu ei ne koe te faiga o se akoga? Ke fakaaoga ne nāi minute faitalia me tu atu koe i te mataloa, ke mafai o fakaasi atu ne koe ki te tino a te auala faigofie kae fakafiafia ke mafai o sukesuke ki te Tusi Tapu.

Te Auala e Fai i ei:

Kafai ko oti ne fakatalofa atu koe, ke ‵sili atu ki te tino i te fale me e manavase sale a ia e uiga ki aso mai mua.
Fakasae aka te manatu me e tokouke a tino e manava‵se foki penā, ko fakaasi atu ei ki a ia a te fakasologa o mataupu i te tusi ko te Akoakoga a te Tusi Tapu. Fakamatala atu ki ei me e maua i te tusi tenā a mataupu faigofie kolā e akoako mai i te Tusi Tapu e uiga ki aso mai mua pelā foki mo nisi mataupu aka, kae ‵sili atu me tefea te mataupu e fiafia a ia ki ei.
Tuku atu ki ei se ‵kopi o te tusi kae fakasino atu ki ei te mataupu telā ne filifili ne ia. Fakamatala atu ki ei me i tali o fesili kolā i te kamataga o te mataupu e maua i palakalafa konā.
Fakamolemole atu ki te tino ke faitau mai ne ia te palakalafa muamua māfai e ‵lei ki a ia. Ko ‵sili atu ei te fesili mō te palakalafa tenā, kae sau‵tala fakatasi ki te tali. Ke onoono kae sau‵tala ki tusi siki kolā e ‵lago atu ki te tali. Ko fakaasi atu ei a te auala ne māka ei ne koe a tali i tau tusi.
Ke onoono ki te suā palakalafa, kae fai atu ki te tino ke taumafai o tali a fesili i ana pati eiloa.
Fakamālō atu ki a ia, kae fai a fakatokaga ke toe foki atu ke fakaoti te mataupu.
Kafai e ‵lei loa, ke fakasino atu te vitio i te web site ko te jw.org telā e fakaulutala penei, Ne a Mea e Fai i se Akoga Faka-te-Tusi Tapu?

Ke Tofotofo Aka ki te Mea Tenei i te Masina Kātoa:

‵Talo atu ki a Ieova ke fakamanuia mai au taumafaiga ke kamata se akoga faka-te-Tusi Tapu.—Fili. 2:13.
Taumafai ke kamata se akoga faka-te-Tusi Tapu mai te fakaaogaga o te tusi ko te Akoakoga a te Tusi Tapu, io me fakaasi atu te vitio tenei, Ne a Mea e Fai i se Akoga Faka-te-Tusi Tapu? i so se taimi i te galuega talai.