Ke Momea Aka Faeloa ‵Tou Atamai i te Galuega Talai—Mai te Fai mo Fai se ‵Pea Telā e Fesoasoani Atu

Te Pogai e Tāua ei: Ne iloa ne Iesu a te tāua o te talai fakatasi mo se ‵pea. I taimi ne uga atu ei ne ia ana soko e toko 70 ke mua atu i a ia o talai atu, ne uga atu ne ia latou taki tokolua. (Luka 10:1) E mafai o tuku mai ne se ‵pea a te fesoasoani telā e manakogina māfai ko fepaki tena ‵pea talai mo se tulaga faigata io me ko se mautinoa i a ia a te auala ke tali atu ki te tino i te fale. (Fai. 4:9, 10) E mafai o fakaasi atu ne ia ana manatu kae tuku atu foki i nisi taimi se manatu fesoasoani telā e mafai o fesoasoani atu ki te tino telā e ga‵lue fakatasi lāua ke momea aka te magoi o tena faiva e pelā me se tino talai. (Faata. 27:17) E mafai foki o fakamalosi atu a ia e auala i sau‵talaga i vasia o fale.—Fili. 4:8.

Te Auala e Fai i ei:

Ke saga tonu atu i te taimi e talai atu ei tou ‵pea. (Ia. 1:19) Kafai ko faitau atu se tusi siki, ke tautali atu i tau ‵kopi o te Tusi Tapu. Ka mafai ei o fesoasoani atu koe māfai ko manakogina ke fai penā.
Ke fakaaoga a faka‵tauga ‵lei ke fakaiku aka me e ‵tau io me ko te taimi fea foki e ‵tau ei o faipati atu koe. (Faata. 25:11) Kafai e kau atu koe ki se isi tino talai i se akoga faka-te-Tusi Tapu, ka fakatāua eiloa māfai e fai atu o ou manatu i nai taimi. Kae i te taimi e talai atu ei mai fale ki fale, ka sili atu te fiafia o tou ‵pea māfai e tuku loa ke faipati a ia māfai ko oko ki tena taimi. E tonu, kafai se tino talai fou io me e se mautinoa i a ia a te auala ke tali atu ei ki se fesili io me se manatu ‵teke, kāti ka fiafia eiloa a ia ki tou fesoasoani. Kae faitalia me e kau atu se tino talai ki te galuega talai mai fale ki fale, toe asiga, io me se akoga faka-te-Tusi Tapu, ke mo a ma fakalavelave atu, sa oso atu foki ke takitaki ne koe te sau‵talaga, io me e fakaaoga se isi mataupu.
Ke fakaasi atu ou manatu. Kafai e mafai o tuku atu ne koe, i nisi taimi, se manatu fesoasoani ki se tino talai telā e ga‵lue mo koe ke momea aka tena magoi i te galuega talai, ke na fai eiloa penā. (Faata. 3:27) I se taimi ‵lei, e mafai o fai atu muamua koe penei: “Se a tau faka‵tau ki te sau‵talaga tenā?” io me “E mafai o tuku atu ne au se manatu fesoasoani?” io me “Tenei te mea ne taumafai au o fai.” Masaua me e tiga eiloa e fakatāua ne nisi tino a manatu fesoasoani i nisi taimi, ka fakavāivāi atu eiloa ki a latou māfai ko faka‵sae aka a mea ‵se katoa e fai ne latou.

Tofotofo Aka ki te Mea Tenei i te Masina Kātoa:

Mai tua o te ga‵lue fakatasi mo tou ‵pea i te galuega talai, ke taku atu ana pati io me ko ana mea ne fai kolā ne fai ei a ia mo fai se ‵pea telā e fesoasoani atu.