E Mata, e Uke Aku Mea e Fai?
1. Se a te mea e mafai o manavase ki ei se Kelisiano fakamaoni?
1 Kai fesili ifo eiloa ne koe te fesili tenā? Kāti ko se kau malosi atu nei koe ki te galuega talai ona ko te olaga matua, masaki, io me ko te uke o tiute faka-te-kāiga, telā ko fai ei koe ke loto vāivāi. E tokotasi te tuagane mo ana tamaliki e tokotolu ne tusi mai me i nisi taimi e ma‵sei ana lagonaga ona ko te taimi mo te malosi e manakogina ke tausi atu ki tena kāiga e fakatapula ei a mea e mafai o fai ne ia i te galuega talai. Se a te mea ka fesoasoani mai ke maua ne tatou se kilokiloga paleni?
2. Ne a mea e fakamoemoe a Ieova ki ei mai i a tatou?
2 Mea Kolā e Fakamoe‵moe ki ei a Ieova Mai i a Tatou: E mautinoa eiloa me e ma‵nako tatou katoa ke uke atu ‵tou mea e fai i te galuega talai. Kae e isi faeloa se ‵kesega i te va o mea e fia fai ne tatou mo mea e mafai eiloa o fai ne tatou. A te manatu me e fia fai ne tatou a mea e uke atu e fakaasi mai i ei me e se lotoma‵lie tatou ki mea e fai ne tatou. E ‵tau o masaua ne tatou me e iloa ‵lei ne Ieova ‵tou tapula kae e se manako a ia ki mea e uke atu i mea e mafai ne tatou o fai. (Sala. 103:13, 14) Ne a mea e fakamoemoe a ia ki ei mai i a tatou? E manako a ia ke tavini atu tatou ki a ia mo ‵tou loto kātoa, kae ke tuku atu foki a toe mea ‵lei a tatou.—Kolose 3:23.
3. E mafai pefea o iloilo aka ne tatou ‵tou taumafaiga i te galuega talai?
3 Se a te mea ka fesoasoani mai ki a tatou ke fakaiku aka a mea kolā e mafai eiloa ne tatou o fai? E mafai o akai atu tatou ki a Ieova ke fesoasoani mai ke maua ne tatou se kilokiloga ‵lei ki ‵tou tulaga. (Sala. 26:2) E mafai eiloa o fesoasoani mai se taugasoa Kelisiano matua ‵lei kae fakatalitonugina telā e iloa ‵lei ne ia a tatou kae e se mataku foki ke taku mai ne ia a mea e ‵tau o momea aka te ‵lei o tatou i ei. (Faata. 27:9) Masaua foki la, me e mafuli‵fuli faeloa a fakanofonofoga, kae se mea ‵lei ke iloilo aka faeloa ‵tou tulaga.—Efe. 5:10.
4. E ‵tau o pefea ‵tou kilokiloga ki fakamasauaga kolā e fakavae ki te Tusi Tapu e uiga ki te galuega talai?
4 ‵Tou Kilokiloga ki Fakamasauaga: I te taimi e fai ei se fakatau‵telega, a tino maimoa e masani sāle o fakamalosi atu. A te pogai ke fesoasoani atu ki tino ‵tele, ko te mea ke oko atu ki te lotou fakamoemoega, kae e se ko te fakavāivāi atu. E penā foki loa, a fakamalosiga mo fakamasauaga faka-te-Tusi Tapu kolā e tuku mai i taimi o ‵tou fakatasiga mo ‵tou tusi ke “folafola atu” fakavave “te muna” e aoga ki a tatou kae e se fakauiga i ei me e se lava ‵tou taumafaiga i nisi feitu. (2 Timo. 4:2) E mafai eiloa o tali‵tonu tatou me kafai e tumau tatou i te taumafai ke fai te ‵toe mea e mafai o fai, ka masaua ne Ieova ‵tou ‘a‵lofa mo galuega’ mō ia.—Epe. 6:10.