E Kamata te Tufaatuga o Pepa ‵Kami mō te Fakamanatuga i te Po 2 o Apelila
1. Ka kamata māfea a te tufaatuga o pepa ‵kami mō te Fakamanatuga i te tausaga tenei, kae se a te tāua o te galuega fakapito tenei i te tausaga?
1 Mai i te po 2 ki te po 17 o Apelila, ka tufa atu eiloa ne tatou a pepa ‵kami ki te ‵toe mea tāua eiloa i te tausaga—ko te Fakamanatuga o te mate o Keliso. I aso ko ‵teka, ko oti eiloa ne ‵saga atu a tino fia‵fia e tokouke ki te galuega fakapito tenei i te tausaga. E pelā mo te aso o te Fakamanatuga, ne telefoni atu se fafine ki te ofisa lagolago kae fai atu: “Ne fatoa foki mai au ki te fale, kae ne maua atu se pepa ‵kami mai lalo i toku mataloa. Au e fia fano, kae e se iloa ne au a te taimi.” Ne fakamatala atu ne te taina a te koga e mafai ei o maua a te fakamatalaga tenei i te pepa ‵kami. Ne fakaoti eiloa ne te fafine te sau‵talaga mai i te tauto atu, “Au e fano eiloa ki te otou mea tenā ma po nei!”
2. Ne a pati e mafai o fai atu ne tatou māfai ko fakamatala atu a te pepa ‵kami?
2 Te Auala ka Fai ei ne Tatou: Ona ko te mea e toetoe fua te taimi ke fakaoti ei ‵tou koga talai, se mea tafasili i te ‵lei ke fakatoe‵toe fua ‵tou fakamatalaga. E mafai o fai atu tatou: “Talofa. E fia tuku atu ne māua ki tou kāiga a te ‵kamiga tenei ki se fakamanatuga tāua i te tausaga telā ka fai i te lalolagi kātoa i te Aso Sa, po 17 o Apelila. [Tuku atu te pepa ‵kami ki te tino i te fale.] A te po o te masina ko te taimi ne mate ei a Iesu. Ka fai se lauga faka-te-Tusi Tapu sē ‵togi telā e fakamatala mai i ei a te auala e mafai o maua ne tatou a mea aoga mai i te ‵togiola a Keliso. E fakaasi mai i te pepa ‵kami tenei a te koga mo te taimi ka fai ei te fakatasiga tenei i te ‵tou fenua nei.”
3. E mafai pefea o ‵kami ne tatou a tino e tokouke ‵ki?
3 Kafai e lasi te koga talai a te fakapotopotoga, e mafai o fakatonu atu a te kau toeaina ke tuku atu a pepa ‵kami i fale kolā e seai ne tino i ei māfai e isi se koga ‵lei telā e se lavea ne tino. Ke masaua o ‵kami mai au toe asiga, kāiga, tino ga‵lue tasi koutou, tamaliki e a‵koga tasi koutou, mo nisi taugasoa. Kafai ko kau atu koe ki te tufaatuga o pepa ‵kami i fakaotiga o vaiaso, ke ofo atu foki a mekesini i so se taimi ‵lei. E mata, e mafai o paenia lagolago koe i a Apelila kae ke uke au mea e fai i te galuega fakapito kae fakafiafia tenei?
4. Kaia e ma‵nako ei tatou ke ‵kau mai a tino fia‵fia ki te Fakamanatuga?
4 Ko oko eiloa i te lasi o te molimau ka maua ne tino fia‵fia kolā e ‵kau mai! Ka lagona ne latou a te alofa sili o Ieova i te tukumaiga o te togiola. (Ioane 3:16) Ka tauloto ne latou a te auala ka maua ei ne tino a mea aoga mai i te Malo o te Atua. (Isa. 65:21-23) Ka ‵kami atu foki latou ke fai‵pati ki tino fesoasoani kae fakamolemole atu mō se akoga faka-te-Tusi Tapu ke tauloto latou ki mea e uke atu. E ‵talo eiloa tatou ke ‵saga mai a tino loto fakamaoni e tokouke ki te galuega fakapito tenei kae ‵kau fakatasi mo tatou i te Fakamanatuga!