Se Galuega Tāua Telā ka Kamata i a Mati Po 1 ke Fakailoa Atu ei te Fakamanatuga
1. Ko te taimi fea ka kamata i ei te tufaatuga o te pepa ‵kami kae kaia ko leva te taimi e tufa atu ei te pepa ‵kami i te tausaga nei?
1 I te Aso Lima, i a Mati po 1, ka kamata ei te tufaatuga ki tino a te pepa ‵kami o te Fakamanatuga ko te mea ke mafai o ‵kau fakatasi tatou i te aso tenā. Ka fai te fakamanatuga i a Mati po 26, ko tena uiga ko tai leva atu te taimi e tufa i ei, māfai e fakatusa ki tausaga konei ko ‵teka. I te fakatokaga tenei e tuku mai ei se taimi e lava ke mafai o maua ne tino katoa olotou pepa ‵kami, maise i ei ko kogā koga kolā e uke kae ‵lasi i ei a koga talai a te fakapotopotoga.
2. Ne a fakatokaga ko oti ne fai ke maua a ‵kopi o pepa ‵kami mo te fakaotiga faka‵lei o koga talai?
2 Ke Fakatoka Faka‵lei: Ka tuku mai ne toeaina a auala ke fakaoti faka‵lei ei ‵tou koga talai, e aofia i ei te tukuatuga o pepa ‵kami i fale kolā e seai ne tino i ei. Kafai foki ko oti a te koga talai kae koi ‵toe a pepa ‵kami, e mafai o tufa atu a pepa konā i koga talai kola e tokouke a tino i ei. E ‵tau o fakamautinoa aka ne te ovasia o te galuega talai ke tuku ne pepa ‵kami i te koga telā e tuku ei a mekesini mo tusi ko te mea ke mafai o puke ne tino talai, kae ke mo a foki ma to uke a pepa ‵kami e tuku mai ki tua i te taimi e tasi. E ‵tau fua mo tatou o puke a pepa ‵kami kolā e manakogina mō te vaiaso.
3. Ne a mea e ‵tau o masaua ne tatou i te taimi e ofo atu ei te pepa ‵kami?
3 Ne a Pati ka Fai Atu ne Tatou? E gali atu ma fakatoetoe ‵tou pati ko te mea ke mafai o oko atu tatou ki tino e tokouke. I te itulau e 4 e isi se fakatokaga i te auala e ofo atu ei te pepa ‵kami telā e mafai o fesoasoani mai ke fai ne fakama‵fuliga i ‵tou koga talai. E se aofia i te mea tenei a te fanatu fakavave keatea māfai koi fia sau‵tala io me koi isi ne fesili a te tino i te fale. Kafai e ‵kau atu tatou ki te galuega talai i te fakaotiga o te vaiaso, e ‵tau o tufa atu foki a mekesini māfai e fetaui ‵lei. I a Mati po 2, ka ‵saga malosi atu loa tatou ki te tufaatuga o te pepa ‵kami i lō te kamataga o A‵koga Faka-te-Tusi Tapu.
4. Kaia e ‵tau ei o ‵kau atu tatou mo te loto finafinau ki te galuega tāua tenei?
4 E fakamoe‵moe tatou me ka tokouke a tino ka ‵kau mai ki te Fakamanatuga. Ka fakamatala mai i te lāuga me ko oi tonu eiloa a Iesu. (1 Koli. 11:26) Ka fakamatala mai foki ei me aoga pefea tena mate ki a tatou. (Loma 6:23) Kae ka fakamatala mai foki i ei a te pogai e tāua ei ke masaua ne tatou a ia. (Ioa 17:3) Ke na ‵kau atu tatou mo te loto finafinau ki te galuega tāua tenei!