Te ‵Tou Galuega Talai—E ‵Tau o Fakaasi Atu i ei a te Loto Pulea
1. Ne fakaasi atu pefea ne Ieova a te loto pulea ki tino?
1 E lasi ‵ki eiloa a te loto pulea o te Atua i ana faifaiga ki tino. (Eso. 34:6; Sala. 106:41-45; 2 Pe. 3:9) A te ‵toe fakaakoakoga sili e tasi o tena loto pulea mo te alofa e mafai o lavea atu i te galuega talai o te Malo telā e fai i te lalolagi kātoa. Toeitiiti ko kātoa te 2,000 tausaga ne ga‵lue fakatasi ei a Ieova mo tino, kae koi tumau eiloa nei a ia i te faiga o tino loto fakamaoni ke maua se fesokotakiga ‵lei mo ia. (Ioane 6:44) E mafai pefea o fakaakoako atu tatou ki te loto pulea o Ieova i te ‵tou galuega talai?
2. E mafai pefea o fakaasi atu ne tatou a te loto pulea i te taimi e ga‵lue ei tatou i ‵tou koga talai?
2 Te Galuega Talai Mai Fale-ki-Fale: E fakaakoako atu tatou ki te loto pulea o Ieova me “e se mafai eiloa o gata” te ‵tou talai atu i koga kolā e seki fakaasi mai i ei ne tino a te fiafia. (Galu. 5:42) E fakaasi atu ne tatou a te kufaki mo te loto pulea ki te sē fia‵fia, fakatauemuga, mo ‵tekemaiga o tino ki te ‵tou galuega talai. (Male. 13:12, 13) E fakaasi atu foki ne tatou a te loto pulea mai i te tumau i te taumafai ke fakasiusiu a fuaga o te munatonu ke oko foki eiloa ki taimi e faigata ei ke maua a tino i fale.
3. Kaia e manakogina ei a te loto pulea i te taimi e fai ei a toe āsiga mo te faiga o a‵koga faka-te-Tusi Tapu?
3 A‵koga Faka-te-Tusi Tapu: A te fakaolaga o se lakau e manakogina i ei a te loto pulea. E mafai o tausi faka‵lei ne tatou, kae e se mafai ne tatou o fakavave a tena tupuakaga. (Iako 5:7) E penā foki loa a te ‵tupuakaga i te feitu faka-te-agaga, e faifai malie kae tupu aka foki i tulaga kese‵kese. (Male. 4:28) A tino kolā e fai ne tatou olotou akoga faka-te-Tusi Tapu e mafai o faigata ki a latou ke tiakina a talitonuga ‵se fakalotu io me ko tuu kolā e se ‵lago ki ei te Tusi Tapu. E se ‵tau o fakavave ne tatou a te ‵tupuakaga mai i te faimālō atu ki te akoga faka-te-Tusi Tapu ke na fai a ‵fuliga. E manakogina a te loto pulea ke talia se taimi ‵lei tai leva ke galue a te agaga o te Atua i te loto o te akoga faka-te-Tusi Tapu.—1 Koli. 3:6, 7.
4. E mafai pefea o fesoasoani mai a te loto pulea ke molimau atu tatou i se auala magoi ki ‵tou kāiga sē tali‵tonu?
4 Kāiga sē Tali‵tonu: E tiga eiloa e ma‵nako malosi tatou ke iloa ne ‵tou kāiga sē tali‵tonu a te munatonu, e fakaasi atu ne tatou a te loto pulea mai i te faka‵tali ki te taimi tonu ke fakaasi atu ‵tou talitonuga ki a latou, kae e fakaeteete ke mo a ma faka‵numi ne tatou a latou ki fakamatalaga e uke ‵ki. (Fai. 3:1, 7) I te vaitaimi tenei, e talai atu tatou ki a latou e auala i ‵tou faifaiga ‵lei, kae e tumau eiloa tatou i te ‵toka ke fakaasi atu ‵tou talitonuga i te loto maulalo mo te āva. (1 Pe. 3:1, 15) A te ‵tonuga loa, ka sili atu te magoi o te ‵tou galuega talai māfai e fakaasi atu a te loto pulea, kae ka fakafiafia foki i ei ne tatou a te ‵tou Tamana faka-te-lagi.