‘Ke Tapu te Igoa o te Atua’

1. Se a te matua o te polokalame mō te fono i te fenua i te tausaga faka-te-taviniga ko te 2012, kae se a te mea e fakavae ki ei?

¹ Ko oko eiloa i te ‵tou taulia ke tauave ne tatou a te igoa o te Pule Tafasili i te Maluga, ko Ieova! Ko te Atua eiloa ne tuku mai ne ia tena igoa ki a tatou, kae maise eiloa talu mai te tausaga ko te 1931, e pelā me ne Molimau a Ieova, ne fakamailoga ei tatou ki te igoa tu ‵kese o Ieova. (Isa. 43:10) Ne fakatāua malosi ne te Tama fagasele eiloa e tokotasi a te Atua a te igoa o te Atua; mai i te fakatulaga muamua ne ia a te igoa tenā i tena ‵talo fakaakoako. (Mata. 6:9) E fakavae eiloa a te matua o te polokalame o te ‵tou fono i te fenua i te tausaga faka-te-taviniga ko te 2012 ki pati a Iesu. Ko te ‘Ke Tapu te Igoa o te Atua.’

2. Ne a fakamatalaga e olioli tatou ke lagona atu i ei?

² Mea Kolā ka Lagona Atu ne Tatou i ei: E isi se lauga e fai i te Aso Ono, telā e fai penei tena matua “Ke Fakailoa Atu a te Igoa o te Atua e Pelā me ne Tavini Ga‵lue Tumau” ka fakamatala mai i ei a te pogai e fai ei a te taviniga tumau mo fai se galuega fakafiafia i te olaga. Ka lagona foki ne tatou a Lauga Fakasolo “Ke Fakaeteete i te Avatuga o Fakamaseiga ki te Igoa o Ieova,” telā ka fesoasoani mai ke ‵kalo keatea tatou mai i malei e fa kolā e mafai o fe‵paki mo tatou. Konei la a fesili, Ne a mea ka fesoasoani mai ke talai atu tatou mo te loto finafinau māfai ko se fia‵fia malosi mai a tino? mo te, Ne a mea ka fesoasoani mai ke magoi te faiga o te ‵tou galuega talai?, ka tali mai i te lauga, “Te Pogai e ‵Tau ei o Fakatapu a te Igoa o te Atua.” I te Aso Sa, ka fia‵fia eiloa tatou o fakalogo‵logo ki vaega e fa o Lauga Fakasolo ki te auala e mafai ei ne tatou o fakatapu a te igoa o te Atua i ‵tou mafaufauga, pati, fakaikuga, mo amioga. Ka fia‵fia malosi eiloa a tino ‵fou ki te lauga mō tino katoa, “Ka Faka‵malu ne Ieova Tena Igoa Sili i Amaketo.”

3. Se a te tauliaga e maua ne tatou, kae ka fesoasoani mai pefea a te polokalame ki a tatou?

³ Ko pili eiloa o gasuesue a Ieova o faka‵malu tena igoa. (Eseki. 36:23) I te vaitaimi tenei, e maua eiloa ne tatou a te tauliaga tafasili i te gali ke faka‵malu a mea katoa kolā e aofia i te igoa tapu o Ieova. E tali‵tonu matou me ka fesoasoani mai a te polokalame o te fono ke fakataunu ne tatou taki tokotasi a te ‵tou tiute tāua e pelā me ne tino kolā e tauave ne latou a te igoa o te Atua.