Se Fesili Ke Mafaufau ‵Loto Ki Ei

◼ E mata, e ‵tau o fai se ‵talo i se akoga faka-te-Tusi Tapu telā e fai i so se fakanofonofoga?

E uke ‵ki eiloa a mea aoga e maua māfai e kamata kae fakaoti a te akoga faka-te-Tusi Tapu ki se ‵talo. E auala i ‵talo, e akai atu tatou ki a Ieova mō te fesoasoani o tena agaga tapu ki luga i ‵tou sau‵talaga. (Luka 11:13) A te faiga o ‵talo e faka‵mafa atu foki i ei ki ‵tou akoga a te tāua o tena akoga faka-te-Tusi Tapu kae akoako atu foki i ei ke iloa ne ia o ‵talo. (Luka 6:40) Tela la, se mea ‵lei ke kamata fakavave o ‵talo fakatasi mo te akoga faka-te-Tusi Tapu. Kae ona ko te mea e kese‵kese a fakanofonofoga, e ‵tau o fakaaoga ne te faiakoga a te loto malamalama i te fakaikuga ke fai se ‵talo i se akoga faka-te-Tusi Tapu telā e fai i so se fakanofonofoga.

E tasi te manatu tāua ke mafaufau ki ei ko te koga e fai ei a te akoga. Kafai e se tokouke a tino e oloolo i ei, e mafai o fai atu se tamā ‵talo i se auala poto i te kamataga mo te fakaotiga o se akoga. Kae kafai e tokouke a tino e oloolo i te koga tenā io me kāti e mā a te tino akoga, kāti e ‵lei atu ke faka‵tali ke oko ki te taimi e fai ei a te akoga i se koga telā e se tokouke malosi a tino i ei. Faitalia me tefea te koga e fai ei a te akoga, e ‵tau o fakaaoga faka‵lei ne tatou a faka‵tauga ‵lei ke iloa aka a te taimi ‵lei ke kamata te akoga ki se ‵talo.—Ke onoono ki Te ‵Tou Galuega Talai i a Mati 2005, te itulau e 6.