Se Fesili Ke Mafaufau ‵Loto Ki Ei
◼ Ko oi e ‵tau o faka‵fonu ne latou a tamā pokisi mō igoa mo fakatuatusi mai tua o ‵tou tusi, penā foki loa mo fakamolemole mō akoga i te Itaneti?
E masani o aofia i ‵tou tusi a tamā pokisi mō igoa mo fakatuatusi kolā e mafai o faka‵fonu kae lafo atu ki te ofisa lagolago ke fakamolemole atu mō tusi io me se āsiga mai i Molimau a Ieova. E se gata i ei, a te ‵tou fakatuatusi i te Itaneti ko te www.watchtower.org e mafai o fakaaoga ke fakamolemole atu mō se akoga faka-te-Tusi Tapu. E fesoasoani atu a fakatokaga konei ki tino e tokouke ke tauloto ki te munatonu. Kae ne ‵sae aka a fakalavelave i te taimi e fakaaoga ei ne tino talai a mea faigaluega konei ke fai a fakatokaga mō olotou kāiga io me ko nisi tino ke maua ne latou a te fesoasoani i te feitu faka-te-agaga.
Ko oti eiloa ne fameo a nisi tino kolā ne lafo atu ki ei a tusi mai i te ofisa lagolago, kae mafau‵fau me ko oko eiloa i te fakafi‵ta atu o ‵tou fakapotopotoga ki a latou kae ko aofia latou i se fakasologa masani o tino kolā e lafo atu faeloa ki ei a meli. A tino talai kolā e maua ne latou a fakailoaga konei ke āsi atu ki se tino telā e seki fakamolemole tonu mai ki se āsiga, ko oko eiloa i te ‵ma i te taimi ne fakaasi atu ei ne tino konei a te lotou sē fia‵fia. Tela la, e ‵tau eiloa o fakamolemole ‵tonu atu a tino fia‵fia kae e se ko tino talai kolā e ma‵nako ke maua ne olotou taugasoa mo kāiga a tusi io me asi atu ki ei. Kafai e lavea atu se vaegā fakamolemole penā mai i tino talai mō nisi tino, e fakaseaoga fua te mea tenā.
E mafai la pefea ne tatou o fesoasoani atu ki se kāiga io me se taugasoa i te feitu faka-te-agaga? Kafai e manako koe ke maua ne ia a tusi, kaia e se lafo atu ei ne koe e pelā me se meaalofa ki a ia? Kafai e fiafia tonu a ia kae e manako ke āsi atu se Molimau kae e se iloa ne koe o fesokotaki atu ki toeaina o te fakapotopotoga i te koga tenā, e ‵tau o faka‵fonu ne koe a te pepa ko te Please Follow Up (S-43) kae tuku atu ki te failautusi o tau fakapotopotoga, telā ka onoono ki ei kae lafo atu ki te ofisa lagolago. Kae kafai e nofo atu a te tino fiafia tenā i te falepuipui, se fale telā e faigata te olo atu ki ei, io me se fa‵kaimasaki, e se ‵tau o fesokotaki atu koe ki te ofisa lagolago e uiga mo te tino tenā. I lō te fai penā e mafai ne koe o fakamalosi atu ki a ia ke fesokotaki atu ki taina kolā e āsi sāle atu ki te koga tenā io me e tusi atu eiloa a ia ki te ofisa lagolago.