Se Fesili Ke Mafaufau ‵Loto Ki Ei

◼ E mata, e ‵tau o fakaaoga malosi ne tino talai a te itaneti ke talai kae fai akoga faka-te-Tusi Tapu mo tino kolā e se iloa ne latou kae ‵nofo i nisi fenua?

E fakaaoga ne nisi tino talai a te itaneti ke mafai o maua ne akoga faka-te-Tusi Tapu a latou i fenua kolā e fakatapu i ei te galuega talai kae e mu‵tana foki a tino talai i ei. E isi ne nisi tala ne maua aka me e isi ne ikuga ‵lei ne maua mai ei. Kae se mea fakamataku eiloa māfai e fakaaoga ne tino talai a fakatuatusi fakapito mō sau‵talaga ke mafai o fesokotaki atu ki tino kolā e seiloa ne latou. (Ke onoono ki te ‵Tou Galuega Talai i a Iulai 2007, itu. 3.) A te fakamoemoega o latou ko te fakaoko atu o te fekau o te Malo ki tino loto ‵lei, kae e mafai eiloa o iku atu a vaegā sau‵talaga penā ki te fesokotaki atu o se tuagane io me se taina ki se taugasoa masei, e aofia i ei aposetate. (1 Koli. 1:19-25; Ko. 2:8) Kae i fenua foki kolā e fakatapu te galuega talai i ei, e onoono faka‵lei a tino pulepule ki vaegā fesokotakiga penā kae e mafai i ei o pokotia a ‵tou taina mo tuagane i kogā koga penā. Tela la, e se ‵tau eiloa mo tino talai o olo atu ki luga i te itaneti o ‵sala ki tino mai nisi fenua kolā e seiloa ne latou ke fakaoko atu te tala ‵lei ki a latou.

Kafai ne talai tatou ki se tino mai i se isi fenua, e se ‵tau o ati aka ne tatou tena fiafia ke oko ki te taimi e foki atu ei a ia ki tena fenua, vagana ke fakatonu mai ne te ofisa lagolago ke fai penā. I lō te fai penā, e mafai ne tatou o fakaasi atu ki a ia a te auala e mafai ei o fakaaoga ne ia a te jw.org ke maua a nisi fakamatalaga fakaopoopo io me e mafai o fesokotaki atu a ia ki te ‵tou ofisa lagolago i te koga tenā. E mafai o fakamalosi ne tatou a ia ke fanatu ki se Fale Tapuaki a tatou telā e pili atu ki tena fale. E tonu me e seai foki ne ‵tou Fale Tapuaki i nisi fenua. Kafai e loto fiafia a ia ke asi atu se Molimau i te koga tenā, e ‵tau o faka‵fonu ne tatou a te tamā pepa ko te Please Follow Up (S-43) kae tuku atu ki te failautusi ke lafo atu ne ia mai te fakaaoga o te fakatuatusi ko te jw.org. E mafai ne te ofisa lagolago i te koga tenā e nofo ei te tino fiafia o fakatoka se tino telā e fetaui ‵lei ke asi atu ki a ia o tuku atu se fesoasoani i te feitu faka-te-agaga.—Ke onoono ki Te ‵Tou Galuega Talai i a Iuni 2014, itu. 7, mo Te ‵Tou Galuega Talai i a Novema 2011, itu. 2.

Kafai ko fano te tino telā e masani o asi tatou ki ei ki te suā fenua io me e fai ne tatou se akoga mo se tino i te suā fenua telā ne iloa ne tatou e auala fua i te itaneti, e ‵tau eiloa mo tatou o tau‵tali faka‵lei i fakatakitakiga konā e tuku atu mai luga. E ‵tau eiloa mo tatou o tumau i te fakamalosi aka o tena loto fiafia ke oko ki te taimi e oko atu ei te tino talai telā e ‵tau o asi atu ki a ia. Kae kafai se tino e nofo atu i fenua kolā e fakatapu ei te galuega talai, e ‵tau eiloa mo tatou o fakaeteete malosi i te sau‵tala mo latou ki mea faka-te-Tusi Tapu e auala i tusi, telefoni mo nisi vaega o fesokotakiga.—Mata. 10:16.