Ke Talai Atu ki “Vaegā Tino Kese‵kese”
1. E fai pefea a tino talai ma‵goi e pelā mo tagata fakatū‵tu atamai?
1 A te tagata fakatūtū atamai e isi ne ana vaegā mea faigaluega kese‵kese, kae e iloa ne ia te taimi mo te auala ke fakaaoga ei a mea takitasi konā. E penā foki loa tatou, e maua ne tatou a mea faigaluega kese‵kese ke fesoasoani mai ke fakataunu ‵tou galuega e pelā me ne tino talai. E pelā mo polosiua kese‵kese kolā ko oti ne ‵lomi ke fesoasoani mai ke talai atu tatou ki “vaegā tino kese‵kese.” (1 Koli. 9:22) A te pepa fakaopoopo ka fakasolo mai i ei a nisi polosiua konei, ka fakamatala mai i ei a tino kolā ne fakatoka fakapito ki ei, mo manatu fesoasoani ki te auala e mafai o ofo atu ei.
2. Ko taimi fea e mafai ei o fakaaoga ne tatou a polosiua i te galuega talai?
2 Te Taimi ke Fakaaoga ei a Polosiua: Ka fakaaoga ne se tagata fakatūtū se mea faigaluega i so se taimi ko ‵tau ei. E penā foki eiloa māfai e ofo atu ne tatou se polosiua i so se taimi e mafau‵fau tatou me ka aoga ki se tino, kae e se ko masina fua kolā e ofo atu ei a tusi. E pelā mo te taimi e ‵tau ei o ofo atu ne tatou a te tusi ko te Akoakoga a te Tusi Tapu kae e talai atu tatou i fenua sē Kelisiano kolā e se fia‵fia malosi a tino i ei ki te Tusi Tapu, kāti e ‵lei atu ke ofo atu se polosiua telā e fetaui ‵lei kae ka oti, ko fakamatala atu ei a te tusi ko te Akoakoga a te Tusi Tapu māfai ko oti ne fakamalosi aka ne tatou a te fiafia o te tino.
3. Kaia e ‵tau ei o apo tatou i te fakaaogaga o ‵tou mea faigaluega i te galuega talai?
3 E tavae ne te Tusi Tapu a latou kolā e apo i olotou galuega. (Faata. 22:29) E mautinoa eiloa me e seai aka foki eiloa se galuega e sili atu i te tāua i aso nei i lō “te galuega tapu o te tala ‵lei.” (Loma 15:16) Ko te mea ke fai tatou e pelā me “se tino galue e aunoa mo te mā,” ka taumafai eiloa tatou ke apo i te fakaaogaga o ‵tou mea faigaluega.—2 Timo. 2:15.