Mea Faigaluega e Fakaaoga mo Fai a Akoakoga
1. E fakatusa pefea a Kelisiano loto finafinau ki te tino faite mea?
1 E fakaaoga eiloa ne se tino faite mea a mea faigaluega kese‵kese. E isi ne nisi mea faigaluega e fakaaoga eiloa mō galuega fakapito kae ko nisi mea faigaluega e fakaaoga ki galuega masani. E masani o tauave faeloa ne tagata ata‵mai a olotou pokisi mea faigaluega kolā e apo malosi ei latou i te fakaaogaga. E fakamalosi mai i te Tusi Tapu ki Kelisiano taki tokotasi ke saga tonu ki te faiga o tena galuega talai kae ke fai pelā me “se tino galue e aunoa mo te mā i so se mea.” (2 Timo. 2:15) Se a te ‵toe mea faigaluega tāua ki a tatou? Ko te Muna a te Atua—te mea faigaluega tāua e fakaaoga ne tatou ke “fai a soko.” (Mata. 28:19, 20) Tela la, e ‵tau mo tatou o taumafai ke “akoako ‵tonu atu eiloa ne [tatou] te munatonu.” E se gata i ei, e isi foki ne nisi mea faigaluega e ‵tau mo Kelisiano o fakamasani ke iloa ne latou o fakaaoga i se auala atamai ke akoako atu ei a tino ki te munatonu.—Faata. 22:29.
2. Ne a mea faigaluega tāua e mafai o fakaaoga ne tatou mo fai akoakoga?
2 Mea Faigaluega Tāua mo Fai Akoakoga: Mai tafa o te Tusi Tapu, ne a nisi mea faigaluega e ‵tau o fakaaoga ne tatou? A te mea faigaluega muamua ke akoako atu a muna‵tonu mai te Tusi Tapu ko te tusi Ne a Mea e Akoako ‵Tonu Mai i te Tusi Tapu? Kafai ko oti te tino akoga i te tusi tenā, ko faka‵soko ei ki te tusi ko te “Ke Tumau i te Alofa o te Atua” ke akoako atu ei ke fakagalue ne ia a fakatakitakiga mai te Tusi Tapu i tena olaga. Tela la, e ‵tau mo tatou o apo i te fakaaogaga o te avā tusi konei e lua. E isi foki ne nisi polosiua e ‵tau o aofia i ‵tou mea faigaluega. Ko te Tala ‵Lei Mai te Atua! telā se mea faigaluega tāua ‵ki ke kamata ki ei a akoga faka-te-Tusi Tapu. Kafai e isi ne tino i te ‵tou koga talai e seiloa ne latou o fai‵tau io me e fai‵pati ki se ‵gana telā e seai ne ‵tou tusi i ei, e mafai foki ne tatou o fakaaoga a polosiua konei ko te Fakalogo ki te Atua mo te Fakalogo ki te Atua ke Ola ei Koe ki te Se-Gata-Mai. A te mea faigaluega tāua mo fai a akoakoga ke ‵taki mai ei a tino a‵koga ki te fakapotopotoga, ko te polosiua Ko oi e Fai ne Latou te Loto o Ieova i Aso Nei? A vitio kolā e fesoasoani malosi atu ki te faiga o soko ko te Ne a Mea e Fai i se Akoga Faka-te-Tusi Tapu?, Ne a Mea e Fai i se Kingdom Hall? mo te Does God Have a Name? E ‵tau o tauloto tatou ke iloa o fakaaoga faka‵lei a mea faigaluega konā.
3. Ka fesoasoani mai pefea a lomiga o te ‵Tou Galuega Talai i aso mai mua ki a tatou?
3 Ka fesoasoani mai a lomiga o te ‵Tou Galuega Talai i aso mai mua ke fai tatou mo tino apo i te fakaaogaga o ‵tou tusi e pelā me ne mea faigaluega ke fai ei a akoakoga. Kafai e taumafai tatou o fakaaoga ‵tou mea faigaluega i se auala apo, ko tau‵tali eiloa tatou i pati fakamalosi loto konei: “Saga faka‵lei faeloa ki a koe mo au akoakoga. Tumau i mea konei, me kafai e fai ne koe a mea konei ka fakasao ne koe a koe eiloa mo latou kolā e faka‵logo atu ki a koe.”—1 Timo. 4:16.