Fesoasoani ki Tino ke Faka‵logo ki te Atua
1. Ne a polosiua ne ‵tala mai i te Fono o te Atufenua ko te “Ke na Oko Mai te Malo o te Atua!,” kae se a te mea e fai ei mo fai ne mea faigaluega aoga?
1 I te Fono o te Atufenua ko te “Ke na Oko Mai te Malo o te Atua!” ne ‵tala mai i ei a polosiua ‵fou e lua, ko te Fakalogo ki te Atua ke Ola ei Koe ki te Se-Gata-Mai mo te lōmiga i te ‵gana Palagi faigofie, Fakalogo ki te Atua. Ona ko te mea e mu‵tana a pati i ei, e mafai ei o vave kae faigofie a te ‵fuliga. A te ‵tonuga loa, a te Fakalogo ki te Atua ke Ola ei Koe ki te Se-Gata-Mai ne taliagina ke ‵fuli i ‵gana e 431 i te taimi ne ‵tala mai ei.
2. Ko oi ka maua ne latou a mea aoga mai polosiua konei?
2 Ko oi ka aoga malosi ki a latou a polosiua konei? Mafaufau ki tulaga kolā e ‵soko mai kae e ‵sae aka faeloa i te lalolagi kātoa:
• E sau‵tala se tino talai mo se tino i te fale, i se āsiga muamua io me se toe āsiga, e lavea ne ia me e se iloa io me e iloa malie fua ne te tino i te fale o faitau.
• E talai atu se tino talai ki tino kolā e fai‵pati i se ‵gana telā ko isi ne nai tusi ko oti ne ‵fuli ne tatou ki ei io me e seai eiloa. Io me ko te tokoukega o tino i te koga talai e se iloa o fai‵tau i te ‵gana eiloa a latou.
• E fakaaoga ne se tino talai a te ‵gana fai tāga ke talai atu ki tino ‵tuli i tena koga talai.
• Se mātua telā e manako ke akoako atu te munatonu ki tena tamaliki telā e seki iloa o faitau.
3. Ne fakatoka pefea a te Fakalogo ki te Atua?
3 Te Auala ne Fakatoka ei: E mu‵tana fua a fakamatalaga i te Fakalogo ki te Atua—e maua fua se tamā fuaiupu faigofie mo se tusi faitau i te fakaotiga o itulau takitasi kolā e faka‵mafa mai i ei a manatu tāua. Kaia? Mafaufau la me ko ofo atu ne se tino a te polosiua telā e tusi i se ‵gana telā e se iloa ne koe o faitau, kāti mo fakailoga kolā e se iloa ne koe. E mata, ka fiafia malosi koe ki ei, ke oko foki eiloa māfai e ‵gali a ata i ei? Kāti e se fiafia koe ki ei. E penā foki loa a tino kolā e se iloa o fai‵tau, e ‵tuka vave olotou loto i tusi kolā e maua i ei a fakamatalaga. Tela la, ne fakatoka faka‵lei eiloa a ata tāua konā i itulau takitasi, fakatasi mo fakailoga ke takitaki atu te sau‵talaga mai te ata e tasi ki te suā ata.
4. Ne fakatoka pefea a te Fakalogo ki te Atua ke Ola ei Koe ki te Se-Gata-Mai?
4 E ‵pau eiloa a ata i te Fakalogo ki te Atua ke Ola ei Koe ki te Se-Gata-Mai mo te Fakalogo ki te Atua. Ne fakatoka eiloa ke suke‵suke fakatasi ki ei mo tino kolā e se iloa ‵lei o fai‵tau io me koi fakaakoako ke fai‵tau. E mafai foki o fakaaoga a te polosiua tenei e pelā me se ‵kopi a te faiakoga i te taimi e suke‵suke mo se tino ki te polosiua ko te Fakalogo ki te Atua. E isi faeloa se fesili i te feitu fakamaui ki luga i te kamataga o mataupu takitasi. I tafa o ata, ko fakamatalaga mo tusi fai‵tau. I te ukega o itulau i te fakaotiga o itulau e uke, e maua atu i ei se pokisi mo nisi manatu fakaopoopo mo tusi fai‵tau mai te Tusi Tapu kolā e mafai o fakamatala atu, e ‵tusa mo te atamai o te tino akoga.
5. Se a te taimi mo te auala e mafai ei o ofo atu ne tatou a polosiua konei?
5 Te Auala ke Fakaaoga ei: E mafai o ofo atu ne koe so se polosiua i te galuega talai mai fale ki fale māfai e mafaufau koe me e aoga ke fai penā, faitalia foki eiloa me e se fai a polosiua mo fai te tusi telā e ofo atu mō te masina. (Ke onoono ki te pokisi “Te Auala ke Ofo Atu.”) E mafai o ofo atu ne koe i te ‵toe āsiga mai i te fai atu fua ki te tino fiafia me e isi se mea e fia fakaasi atu ne koe ki a ia, ko tuku atu ei te polosiua.
6. Ka fai pefea ne tatou se akoga faka-te-Tusi Tapu mai te fakaaogaga o polosiua konei?
6 Ona ko te mea e seai ne fesili i te Fakalogo ki te Atua, ka se aofia eiloa i te sau‵talaga a te faiga o fesili mo tali e pelā mo te mea e masani koe ki ei i te taimi e sukesuke ei ki te tusi ko te Akoakoga a te Tusi Tapu. I tuu katoa, e fia fakalogo‵logo sāle a tino ki tala. Tela la, ke fakaaoga a ata ke fakamatala atu a tala mai te Atua i te Tusi Tapu. Ke fakamatala atu a mea kolā e fakaasi mai i ata. Ke loto finafinau i te faiga o te tala. ‵Kami atu te tino akoga ke taku mai ne ia ana manatu ki ata. Ke faitau atu a tusi fai‵tau i te fakaotiga o te itulau, kae ke mafau‵fau faka‵lei ki mea e fai mai ne latou. ‵Sili atu ne fesili ke aofia a ia i te sau‵talaga kae ke fakamautinoa aka me e malamalama a ia. Kafai e fakaaoga ne ia a te Fakalogo ki te Atua ke Ola ei Koe ki te Se-Gata-Mai, ke fai‵tau fakatasi ki fakamatalaga o ata mo tusi fai‵tau māfai ko sau‵tala ki ata takitasi.
7. E mafai pefea o fesoasoani atu tatou ki ‵tou akoga faka-te-Tusi Tapu ke gasolo atu ki mua?
7 Fesoasoani Atu ki te Akoga Faka-te-Tusi Tapu ke Gasolo ki Mua: E fakamoemoe eiloa me ka fakamalosi aka a te manakoga o te akoga faka-te-Tusi Tapu ne te lū sau‵talaga ke taumafai ke iloa ne ia o faitau ko te mea ke kausaki atu i a ia eiloa ke maua te malamalama e uiga ki a Ieova. (Mata. 5:3; Ioane 17:3) Tela la, kafai e sau‵tala ki te Fakalogo ki te Atua, kāti e mafai ne koe o akoako atu fakamuli a ia ke iloa o faitau, ko mafai ei o fakaaoga a te Fakalogo ki te Atua ke Ola ei Koe ki te Se-Gata-Mai ke suke‵suke ki ei. Faitalia me se a te polosiua e fakaaoga ne koe, ka se mafai o toka a te akoga faka-te-Tusi Tapu mō te papatisoga māfai ko oti te polosiua ne sukesuke ki ei. E ‵tau o toe faka‵soko atu te akoga faka-te-Tusi Tapu ki te tusi ko te Akoakoga a te Tusi Tapu io me se isi tusi telā ka fesoasoani atu ke maua ne ia a te malamalama kātoa i te Tusi Tapu.
8. Kaia e loto fakafetai ei tatou ki mea faigaluega ‵fou konei mō te ‵tou galuega talai?
8 E ‵tau o faka‵logo a tino ki te Pule Tafasili i te Maluga i te iunivesi māfai e fia ola latou ki te se-gata-mai. (Isa. 55:3) Kae e loto a Ieova ke “faka‵sao a tino katoa,” e aofia i ei a latou kolā e se iloa o fai‵tau, ke iloa ne latou o faka‵logo ki a ia. (1 Timo. 2:3, 4) Ko oko eiloa i te ‵tou fakafetai mō mea faigaluega ‵fou konei kolā e mafai ne tatou o fakaaoga ke akoako a tino ke faka‵logo ki te Atua!
[Ata i te itulau e 3]
Te Auala ke Ofo Atu
Ke fakaasi atu a te itulau e 2-3 ki te tino i te fale, kae fai atu: “E mata, e fia ola koe i se lalolagi telā e foliga penei? [Faka‵tali ki se tali.] E folafola mai te Tusi Tapu [io me, e folafola mai te tusi tapu tenei] me ko pili o fai ne te Atua a te lalolagi tenei mo fai se koga gali kae filemu telā e seai se tino e mativa io me masaki i ei. Onoono la ki mea e ‵tau o fai ne tatou ko te mea ke ‵nofo atu tatou i ei. [Faitau te Isaia 55:3, telā e lavea atu i te kamataga o te itulau e 3.] E fai mai i ei ke ‘o‵mai ki’ te Atua kae ‘faka‵logo’ ki a ia. Kae e mafai pefea o faka‵logo tatou ki te Atua?” ‵Suke ki te itulau e 4-5 kae sau‵tala fakatasi mo ia ki te tali. Kafai e fakalavelave, ke tuku atu te polosiua kae fai a fakatokaga ke toe foki atu o sau‵tala ki te tali.