Ke Fakatoka mo te Loto Fiafia ki te Fakamanatuga
1. Se a te avanoaga tāua e maua ne tatou i te vaitaimi fakapito o te Fakamanatuga?
1 E tuku mai ne te Fakamanatuga i te Aso Lua, Mati 26, se avanoaga gali ke fia‵fia ki te fakatokaga a te Atua mō te fakaolataga. (Isa. 61:10) Ke oko foki eiloa ki te vaitaimi mai mua o te fakamanatuga, ka fesoasoani mai a te loto fiafia ke fakatoka faka‵lei tatou. E pefea la?
2. Se a te mea e fakamalosi aka ei tatou ke fai a fakatokatokaga mō te Fakamanatuga?
2 Te Fakatokatokaga mō te Fakamanatuga: A te ‵Kaiga a te Aliki i te Afiafi se fakamanatuga tāua kae faigofie. Kae koi manakogina eiloa ke fakatokatoka faka‵lei ki ei mai mua ko te mea ke se puli a tamā mea tāua. (Faata. 21:5) E ‵tau o filifili aka a te taimi mo te koga ‵lei ke fai i ei. E ‵tau o na fakatoka a te falaoa mo te uaina kolā e manakogina ke fakaaoga. E ‵tau o ‵ma kae toka a te koga e fai ei te fakatasiga tenei. E ‵tau o fakatoka faka‵lei a te failauga telā ne ‵tofi aka, e penā foki a tino kolā e fakasoa ne latou te falaoa mo te uaina mo tino fesoasoani. E mautinoa eiloa me e fakatoka faka‵lei a te ukega o mea konei mai mua o te aso tenā. E fakamalosi aka tatou ke fakatoka faka‵lei ki te fakamanatuga tenei ona ko ‵tou fia‵fia ki te malosi o te togiola ke fakaola ei a tino.—1 Pe 1:8, 9.
3. E mafai pefea o fakatoka ‵tou loto ki te ‵Kaiga a te Aliki i te Afiafi?
3 Ke Fakatoka te Loto: E tāua foki ke fakatoka ‵tou loto ko te mea ke malamalama faka‵lei tatou i te uiga kātoa o te Fakamanatuga. (Esela 7:10) Ke fai penā, e ‵tau o fakatoka faka‵lei ne tatou a te taimi ke mafau‵fau fakatasi ki tusi fai‵tau mai te Tusi Tapu mō te Fakamanatuga fakapito kae ke mafau‵fau ‵loto foki ki toe aso fakaoti o te olaga o Iesu i te lalolagi. A te mafaufau ki te alofa sē fakapito o Iesu e fakamalosi aka ei tatou ke fakaakoako atu ki tou tagata.—Kala. 2:20.
4. Se a te mea aoga ne maua ne koe mai te togiola telā ne fai ei ke fiafia malosi koe?
4 E fakamaluga aka ne te mate o Keliso a te pulega sili a Ieova. E fakasaoloto ei tatou mai te agasala mo te mate. (1 Ioa. 2:2) E ‵tala mai i ei a te auala ke maua ne tatou se fesokotakiga filemu mo te Atua e penā foki mo te auala ki te ola se-gata-mai. (Kol. 1:21, 22) E fesoasoani mai foki ke fakamalosi aka ‵tou fakaikuga ke ola e ‵tusa mo ‵tou tukuatuga ki a Ieova kae ‵mautakitaki e pelā me ne soko o Keliso. (Mata. 16:24) I te taimi e fakatokatoka kae kau atu ei koe ki te Fakamanatuga, talosia ke momea aka eiloa tou fiafia!