Ke Tauloto Mai te Kau Pelofeta—Amosa
1. Kaia e mafai ei o fai a te fakaakoakoga a Amosa mo fai se fakamalosiga ki a tatou?
1 Kai maua aka eiloa ne koe se lagonaga me e se ‵tau o talai atu koe ona ko tou tupuakaga? Kafai e penā loa, e mafai o maua ne koe te loto malosi mai i te fakaakoakoga a Amosa. A ia se tino tausi mamoe kae galue i nisi taimi o te tausaga, kae ne tuku atu ne Ieova te malosi ki a ia ke folafola atu ne ia se fekau tāua ‵ki. (Amo. 1:1; 7:14, 15) E penā foki loa, i ‵tou aso nei, e fakaaoga ne Ieova a tino loto maulalo kae ma‵lalo. (1 Koli. 1:27-29) Ne a nisi akoakoga mō te ‵tou galuega e mafai o tauloto ne tatou mai i te pelofeta ko Amosa?
2. Kaia e mafai ei o ‵tu ‵mautakitaki tatou i taimi o ‵tekemaiga i te galuega talai?
2 Ke ‵Tu ‵Mautakitaki i Taimi o ‵Tekemaiga: I te taimi ne lagona ei ne Amasia, se faitaulaga tapuaki ki se pulumakau i matakāiga e sefulu o Isalaelu ki mātū, a te valoaga a Amosa, ne fai pelā me ne tali kaitaua atu a ia penei: ‘Fano ki te fale! Tuku malie eiloa matou! E isi eiloa se motou lotu!’ (Amo. 7:12, 13) I te taimi ne fakamolemole atu ei a ia ki te tupu ko Ielopoamo ke fakagata te galuega a Amosa, ne ‵fuli fakakotua ne Amasia a pati a te pelofeta. (Amo. 7:7-11) Kae ne seki mataku a Amosa. I aso nei, e taumafai a nisi faifeau ke ‵lago atu a malo fakapolitiki ki olotou taumafaiga ke fakasaua atu ki tino o Ieova. Kae e fakatalitonu mai ne Ieova ki a tatou me e seai se meatau e mafai o fakapakia ne ia a tatou i se auala tumau.—Isa. 54:17.
3. Ne a vaega e lua o te fekau telā e folafola atu ne tatou i aso nei?
3 Ke Folafola Atu a Fakamasinoga a te Atua mo Fakamanuiaga i Aso Mai Mua: E tiga eiloa ne ‵valo atu ne Amosa a fakamasinoga ki luga i matakāiga e sefulu o Isalaelu, ne fakaoti ne ia te tusi i te Tusi Tapu telā e fakaigoa ki tena igoa ki te folafolaga a Ieova ki te ‵toe fakafouga mo fakamanuiaga e uke. (Amo. 9:13-15) E fai‵pati atu foki tatou e uiga ki te “aso o te fakamasinoga” a te Atua telā ko pili mai, kae e fai fua te mea tenei mo fai se vaega o te ‘tala ‵lei o te Malo’ telā e ‵tau o folafola atu ne tatou. (2 Pe. 3:7; Mata.24:14) A te fakaseaiatuga ne Ieova o tino ma‵sei i Amaketo ka ‵tala mai i ei a te auala mō se lalolagi palataiso.—Sala. 37:34.
4. Se a te fakatalitonuga me e mafai eiloa ne tatou o fai te loto o Ieova?
4 A te talaiatuga o te fekau o te Malo i se lalolagi telā e tokouke a tino ‵teke ki ei, e tofotofo aka ei a te ‵tou fakaikuga ke ola e ‵tusa mo ‵tou tukuatuga kae fai te loto o Ieova. (Ioa. 15:19) E tiga eiloa te feitu tenā, e mautinoa eiloa me ka fai faeloa ne Ieova ke fetaui ‵lei tatou o fai tena loto, e pelā mo ana mea ne fai ki a Amosa.—2 Koli. 3:5.