Ke Tauloto Mai te Kau Pelofeta—Mika
1. Se a te fesili ne mafaufau ‵mafa ki ei a Mika, kae kaia ne aoga ‵ki eiloa tena galuega talai?
1 ‘Ko te taimi fea ka oko mai ei te gataga o te olaga masei tenei?’ Kāti ne tai ‵pau eiloa mo te fesili ne mafaufau ‵mafa ki ei a te pelofeta ko Mika i te taimi ne folafola atu ei ne ia a fekau o fakamasinoga a Ieova ki te malo o Isalaelu mo Iuta. Kae ne aoga ‵ki eiloa tena galuega talai. I te 740 T.L.M., i te taimi ne ola ei a Mika, ne fakataunu ei a pati ‵teke a Ieova ki te fenua o Samalia. (Mika 1:6, 7) Fakamuli ifo, ne fakaseai atu ei a Ielusalema i te tausaga ko te 607 T.L.M. (Mika 3:12) E fakaakoako pefea tatou ki a Mika i te taimi e faka‵tali ei tatou ki te fakaokomaiga o te fakamasinoga a Ieova i ‵tou aso nei?
2. E fakaasi atu pefea ne tatou a te kufaki i te taimi e faka‵tali ei tatou ki te aso o Ieova, kae kaia?
2 Ke Kufaki: Ne tusi mai a Mika: “Ka ko au e fakatalitali ki te Aliki; ka fakatalitali au mo te loto talitonu ki te Atua, telā ka fakasao ne ia au.” (Mika 7:7) E tonu, ne seki faka‵tali fua a Mika ki te gataga ke oko mai. Ne tumau a ia i te fakalavelave i te fakataunuga o tena tiute e pelā me se pelofeta a Ieova. I te taimi e faka‵tali ei tatou ki te aso o Ieova, e ‵tau foki mo tatou “o fai [‵tou] amioga ke ‵ma kae fakamaoni ki te Atua.” (2 Pe. 3:11, 12) E tuku mai ne te kufaki o Ieova a taimi e lava mō tino ke sala‵mo. (2 Pe. 3:9) Tela la, e ‵tau o fakatāua malosi ne tatou a te polopolokiga a te Atua ke fakaakoako atu ki pelofeta i te fakaasiatuga o te kufaki.—Iako. 5:10.
3. Kaia e ‵tau ei o fakatagi atu tatou ki a Ieova mō tena agaga tapu?
3 Ke Fakalagolago ki te Malosi o Ieova: E tiga eiloa ne maua ne Mika se galuega faigata, ne kilo atu eiloa a ia ki a Ieova mō te malosi ke fai ei ne ia te galuega. (Mika 3:8) E seai se mea tupu fakafuasei me e fakamalosi eiloa tatou ne te Muna a te Atua ke fakalagolago ki te Atua mō te malosi. E tuku mai ne ia mo te kaimalie a te ‵mana ki tino vāi‵vai ko te mea ke mafai o fakataunu ne latou olotou tiute mai te Atua. (Sala. 84:5, 7; Isa. 40:28-31) Kai lagona aka eiloa ne koe te mea tenei i tou olaga i te taviniga tapu? E mata, e fakamolemole ‵soko atu koe ki a Ieova mō te fesoasoani o te ‵mana o tena agaga tapu?—Luka 11:13.
4. Se a te fakaakoakoga tafasili i te ‵lei ne tuku mai ne te vaegā olaga o Mika ki a tatou i aso nei?
4 I tena olaga kātoa, ne fakamuamua faeloa ne Mika a te faiga o te loto o te Atua. Ne fakaiku aka ne ia ke tumau i te fakamaoni faitalia a amioga ma‵sei kolā ne fai i ana tafa. E penā foki loa, e tofotofogina ‵tou fakamaoni i aso katoa. Tela la, ke na fakamalosi aka ne tatou ‵tou fakaikuga ke “tapuaki kae faka‵logo ki te Aliki [Ieova] te motou Atua ki te se gata mai.”—Mika 4:5.