Ka Tauave ne Tatou te Igoa o Ieova ki te Se-gata-mai!

“Ka ko matou e tapuaki kae faka‵logo ki te Aliki te motou Atua ki te se gata mai.”​—⁠MIKA 4:⁠5.

E ISI se mea e fia fakaasi atu ne Ieova ki ana tino, kae ne fakaaogā ne ia a Mika e pelā me ko tena pelofeta. Ko te fuafuaga eiloa a te Atua ke fai se faiga ki tino agasala. Ka fakasala ne ia a Isalaelu ona ko ana faifaiga fakaaposetasi. Kae se mea fakafiafia me ka fakamanuia ne Ieova a tino kolā e tauave ne latou tena igoa. E fakaasi faka‵lei mai i te Mika mataupu e 3 ki te 5 a fekau konei o te valoaga a Mika.

² Ne fakatonu mai a te pelofeta a te Atua, penei: “Faka‵logo mai, koutou takitaki o Isalaelu! Koutou ne tino e ‵tau o ‵saga ki te faiga o mea ke ‵tonu.” Ao, tenā eiloa te mea ne ‵tau o fai ne latou, kae ne a olotou mea ne fai? Ne toe fai mai a Mika, penei: “Kae tela la, e fia‵fia koutou ki te mea masei kae sē fia‵fia ki te mea ‵lei. E ‵fole ola ne koutou a pakili o oku tino kae saesae ne koutou olotou ‵kano mai olotou ivi. E kai ne koutou oku tino. E ‵fole ne koutou olotou pakili, fatifati olotou ivi kae katikati ne koutou pelā me ne meafasi ka fao ki se ulo.”​—⁠Mika 3:​1-3.

³ Ma‵faga o mea masei, ko sē amanaia a takitaki ki tino ma‵tiva kae vāi‵vāi! A tugāpati fakatusa kolā e fakaaogā i konei, e faigofie fua ke malama‵lama i ei a tino kolā ne fakalogo‵logo ki pati a Mika. Kafai ko saka ki vai ‵vela se mamoe telā ko oti ne tamate, e muamua o ‵fole tena pakili ko katikati ei a sokogā ivi. I nisi taimi, e faii lua sāle te ivi ke tapale keatea a mea muko‵muko i loto i ei, ko saka fakatasi ei a ivi mo ‵kano i se ulo e pelā mo te mea ne fakaasi mai ne Mika. (Esekielu 24:​3-5, 10) Ko oko loa i te fetaui ‵lei a pati fakatusa konei mo faifaiga sē ‵lei ne maua ne tino i aso o Mika mai olotou takitaki ma‵sei!

E Manako Ieova ke Fai ne Tatou te Mea Tonu

⁴ E ‵kese ‵ki eiloa a te Tausi mamoe alofa, ko Ieova, mo takitaki o Isalaelu. Ona ko te lotou sē fakamaoni ne seki mafai ei ne latou o fakataunu te lotou tiute ke tausi faka‵lei te lafu mamoe. I lō te fai penā, ne fai fakamasei ne latou a olotou mamoe, ne akoako atu ki a latou a mea sē ‵tonu kae ne “tatino” foki latou e pelā mo te mea e fakaasi mai i te Mika 3:10. Ne a ‵tou mea e mafai o tauloto mai te mea tenei?

⁵ E manako a Ieova ke fai ne takitaki o ana tino a te mea tonu. Tenā eiloa te mea e maua atu ne tatou i tavini a Ieova i aso nei. E se gata i ei, e fetaui ‵tonu a te mea tenei mo pati i te Isaia 32:​1, telā e faitau penei, “Ka isi se tupu telā ka pule mo te fakamaoni, mo takitaki o te fenua kolā ka pulepule mo te fai mea tonu.” Kae ne a mea ne lavea atu ne tatou i aso o Mika? Ne tumau eiloa a tino kolā e ‘fia‵fia ki te mea masei kae sē fia‵fia ki te mea ‵lei’ i te faiga o mea sē ‵tonu.

Ko oi e Maua ne Latou a Tali ki Olotou ‵Talo?

⁶ E mata, e ‵tau o fakamoe‵moe a tino ne ola i aso o Mika ke maua ne latou te taliaga a te Atua? Ikai! E fai mai te Mika 3:​4, penei: “Ka oko mai te taimi e ka‵laga ei koutou ki te Aliki kae ka sē tali mai ki a koutou. Ka sē fakalogo a ia ki otou talosaga, me ko oti ne fai ne koutou a amioga se ‵lei.” E faka‵mafa mai i konei se manatu tāua ‵ki.

⁷ Ka sē tali ne Ieova a ‵tou ‵talo māfai e fai faeloa ne tatou a agasala. E penā foki loa māfai e ola tatou i se olaga magalua, e ‵funa aka ‵tou agasala kae fakaloiloi o tavini fakamaoni atu ki te Atua. E ‵tusa mo te Salamo 26:​4, ne usu ne Tavita tena pese, penei: “Au sē fai takaga ki tino e seai ne aogā; au sē kau foki ki tino amio ‵pelo.” Kae ka sē tali eiloa ne Ieova a ‵talo a tino kolā e ‵teke fakamaoni atu ki tena Muna!

E Fakamalosi Aka ne te Agaga o te Atua

⁸ Ne fai sāle ne takitaki o Isalaelu a faifaiga matagā! Ona ko pelofeta ‵loi, ne fai ei ke takasēsē valevale a tino o te Atua i te feitu faka-te-agaga. Ne ka‵laga atu a takitaki kaima‵nako me ko oko mai te “filemu” kae tela la e faka‵tupu ne latou a taua mo tino kolā e sē tuku atu ne mea mo olotou ‵kai. Tela la, ne fai mai ei a Ieova, penei: “A koutou pelofeta, otou aso ko pili o palele. A te pouliga ka oko mai ki a koutou. Ka sē toe maua ne koutou ne fakaasiga fakapelofeta, sē toe maua foki ne koutou o ‵valo ki se mea, ona ko te takitakiga ne koutou oku tino ki te auala ‵se. A latou kolā e ‵valo ne latou a mea ka ‵tupu i aso fakamuli, ka masiasi latou [io me ka “sē fakaasi atu ne latou olotou talafa,” Tusi Paia, Samoa] me ka sē taunu olotou valoaga.”​—⁠Mika 3:​5-7a.

⁹ Kaia e ‵tau ei o “sē fakaasi atu ne latou olotou talafa”? A te mea tenei se faifaiga telā ne fai ne tino i aso o Mika ona ko te masiasi. E ‵tau eiloa mo tāgata ma‵sei konei o ‵mā me e iloa ne latou me “i te Atua ka sē tali mai ki a latou.” (Mika 3:7e) E se fia saga lele eiloa a Ieova ki ‵talo a so se tino fakamatamata kae amio masei.

¹⁰ E seai eiloa se pogai e ‵tau ei o ‘sē fakaasi atu te talafa’ o Mika. E se mā eiloa a ia. E tali atu Ieova ki ana ‵talo. Ke onoono ki pati a pelofeta fakamaoni i te Mika 3:​8, penei: “Ka ko au ko faka‵fonu ne te Aliki ki tena agaga mo tena ‵mana, kae tuku mai ne ia te fai mea tonu mo te loto toa”! Ko oko eiloa te lasi o te loto fakafetai o Mika me ne ‘‵fonu faeloa a ia i te ‵mana o Ieova’ i tena taviniga fakamaoni. Ne mafai ei ne ia o “taku atu ki tino Isalaelu a olotou agasala.”

¹¹ E manako a Mika ki se malosi e siliga atu i te malosi masani ko te mea ke mafai ne ia o folafola atu a te fekau o te fakamasinoga fakamataku a te Atua. E tāua ‵ki te agaga tapu o Ieova. Kae pefea la tatou? E mafai fua ne tatou o fakataunu ‵tou galuega talai māfai e fakamalosi ne Ieova tatou e auala i tena agaga tapu. Ka seai eiloa se aogā o ‵tou taumafaiga ke talai atu māfai e fai faeloa ne tatou a agasala mo te iloa tonu. Ona ko te mea tenā, ka sē tali mai ne Ieova a ‵tou ‵talo ke maua te malosi ke fai ei tena galuega. E se mafai eiloa o folafola atu ne tatou a te fekau o te fakamasinoga a te ‵tou Tamana i te lagi seiloga ke maua ne tatou te “agaga” o Ieova. E mafai o faipati atu ne tatou a te muna a te Atua mo te loto toa e pelā mo Mika mai ‵tou ‵talo kolā e lagona ne ia fakatasi mo te fesoasoani o te agaga tapu.

¹² Kāti e masaua ne koe te tala i te Galuega 4:​23-31. Ke mafaufau i a koe se tokotasi o soko o Iesu i aso o te kau apositolo. E taumafai malosi a tino ‵teke o taofi aka ne latou a soko o Iesu ke moā e talai atu. Kae ne ‵talo atu a tino fakamaoni konei ki te lotou Aliki Sili, kae fakamolemole atu, penei: “E te Aliki, sa saga ki te lotou pulepulega masei, kae fesoasoani mai ki a matou, ko au tavini, ko te mea ke fai‵pati ne matou tau muna mo te loto toa.” Se a te mea ne iku mai i ei? I te taimi ne ‵talo atu ei latou, ne galulu a te koga ne maopoopo ei latou, kae ne ‵fonu katoa latou i te agaga tapu kae fai‵pati atu ne latou te muna a te Atua mo te loto toa. Tela la, ke na ‵sala atu foki tatou ki a Ieova kae fakalago‵lago ki tena agaga tapu i te taimi e fai ei ne tatou te ‵tou galuega talai.

¹³ Ke toe mafau‵fau ki aso o Mika. E ‵tusa mo te Mika 3:​9-12, e fai ne takitaki tatino a fono fakamasino ki meaalofa fakakolekole, e akoako atu a faitaulaga ke maua ne latou se ‵togi kae ma‵nako a pelofeta ke ‵togi tupe latou māfai e fai olotou valoaga. E se tioa eiloa o fakatonu atu a te Atua me ka “maofaofa valevale”a te laumua o Iuta ko Ielusalema! Ona ko te salalau valevale foki o tapuakiga ‵se mo amioga ma‵sei i Isalaelu, ne fakamalosigina a Mika ke fakailoa atu ki tino i te Atua ka fai ne ia a Samalia e pelā me se “faka‵tūga kaiga.” (Mika 1:⁠6) E tonu, ne ola eiloa te pelofeta ke lavea ne ia te fakamaseiga o Samalia ne te kautau Asulia i te 740 T.L.M. (2 Tupu 17:​5, 6; 25:​1-​21) E mautinoa eiloa me e mafai fua o fakataunu a fekau konei e uiga ki a Ielusalema mo Samalia i te malosi o Ieova.

¹⁴ Ka sē sao eiloa a Iuta mai te fakasalaga a Ieova. I te fakataunuga o te valoaga i te Mika 3:​12, “a Siona ka fakamalū pelā me se fatoaga.” E iloa ‵lei ne tatou i te 21 senitenali tenei me ne ‵tupu eiloa a mea konā i te taimi ne fakamasei ei a Iuta mo Ielusalema i te 607 T.L.M. Ne ‵tupu a mea konā i te fia selau tausaga mai tua o te valoaga a Mika, kae ne mautinoa i a ia me e oko mai eiloa te lotou fakataunuga. E tonu, e ‵tau foki o maua ne tatou te loto talitonu tenā me ka fakaseai atu te olaga masei tenei i te ‘Aso o Ieova’ telā ne ‵valo mai.​—⁠2 Petelu 3:​11, 12.

E Faka‵lei ne Ieova a Mea

¹⁵ Kafai e toe mafau‵fau tatou ki aso mua, e iloa ne tatou me e isi se fekau fakamafanafana ne fai fakamuli mai ne Mika. Ko oko loa i te fakamafanafana loto a pati i te Mika 4:​1-4! E fai mai penei a nisi pati a Mika: “I aso mai mua nei, te mauga telā e tu ei te Faletapu ka maluga atu i mauga katoa. Ka uke a malo e o‵mai ki ei, . . . Ka faka‵lei ne ia a kinauga i va o malo, malo ‵pili mai mo malo ‵mao. Ka tuki olotou pelu ke fai mo mea fakamalū laukele. Ka ko olotou tao ke fai mo naifi ‵vele vao. A malo ka sē toe fai taua; Se toe fakatokatoka foki mō se taua. A tino katoa ka ‵nofo filemu i olotou togāvine mo togāmati, kae ka seai se tino e toe fai ne ia ke ma‵taku latou. Ko te Aliki Malosi ne tauto ke maua ne tino a te filemu penā.”

¹⁶ Ko oi e fakauiga ki ei a “tino” mo “malo”? E se fakauiga ki fenua mo malo i te lalolagi nei. E fakauiga a te valoaga tenā ki tino taki tokotasi mai fenua katoa kolā ko ‵kau fakatasi nei i te mauga o te tapuakiga tonu ki a Ieova.

¹⁷ E ‵tusa mo te valoaga a Mika, ko pili fua nei o tapuaki atu a tino i te lalolagi kātoa i te tapuakiga ‵ma pakipaki ki a Ieova. I aso nei, ko akoakogina a tino kolā “ko oti ne filifilia mō te ola se gata mai” ki auala o Ieova. (Galuega 13:48) Ka fai ne Ieova ana fakamasinoga kae ka faka‵lei ne ia a mea i te feitu faka-te-agaga mō tino kolā e ‵lago katoatoa atu ki te Malo. Ka ‵sao latou i te “fakasauāga lasi” e pelā me ne vaega o te “vaitino tokouke.” (Fakaasiga 7:​9, 14) Me ko oti ne tuki olotou pelu ke fai mo naifi ‵vele vao, e ola latou mo te filemu fakatasi mo olotou taina Molimau e pelā foki mo nisi tino. Ma‵faga o mea fakafiafia ke aofia tatou i a latou!

Ke na Tauave Nei te Igoa o Ieova

¹⁸ I ‵tou aso nei, ko te taimi telā e ma‵taku valevale ei a tino i te lalolagi, e fia‵fia eiloa tatou me e tokouke a tino ko suke‵suke nei ki auala o Ieova. E olioli eiloa tatou ki te taimi telā ko seai ei ne taua kae ka ‵nofo atu a tino kolā e a‵lofa ki a Ieova mai lalo i olotou togāvine mo togāmati. E masani sāle o ‵toki ne tino a mati i togāvine. (Luka 13:⁠6) E fakauiga a te ‵nofo filemu mai lalo o se togāvine io me se togāmati ki se tulaga tokagamalie, fiafia e aunoa mo ne fakalavelave. Ke oko eiloa ki aso nei, e tuku mai ne Ieova ki a tatou te filemu o te mafaufau mo te puipuiga i te feitu faka-te-agaga. Kafai ko oko mai a fakanofonofoga penā mai lalo i te pulega a te Malo, ka sē ma‵taku eiloa tatou kae ka maua ne tatou te tokagamalie katoatoa.

¹⁹ Ke maua ne tatou te taliaga a te Atua mo ana fakamanuiaga, e ‵tau o tauave ne tatou te igoa o Ieova. E fakaasi faka‵lei mai te mea tenā i te Mika 4:5 telā e folafola mai ei te pelofeta, penei: “A malo katoa e tapuaki kae faka‵logo ki olotou atua, ka ko matou e tapuaki kae faka‵logo ki te Aliki te motou Atua ki te se gata mai.” Kafai e tauave ne tatou te igoa o te Atua, e se fakauiga i ei me e fai atu fua tatou me i a ia ko te ‵tou Atua. E se fakauiga foki i ei ki te ‵tou kau atu fua ki fakatasiga Kelisiano mo te talaiatuga o te Malo, faitalia me ne galuega tāua a mea konā. Kafai e tauave ne tatou te igoa o Ieova, ko tukugina katoatoa atu tatou ki a ia kae e kausaki foki ke tavini atu mo te fakamaoni ona ko ‵tou a‵lofa katoatoa ki a ia. (Mataio 22:37) Kae e pelā me ne ana tino tapuaki, e ma‵nako eiloa tatou o tauave te igoa o Ieova te ‵tou Atua ki te se-gata-mai.

²⁰ Ke mafau‵fau nei ki pati fakapelofeta i te Mika 4:​6-13. Ka puke fakapagota a “tino Ielusalema” kae “ka olo ki Papelonia.” Tenā eiloa te mea ne tupu ki Ielusalema i te fitu senitenali T.L.M. E se gata i ei, e fai mai te valoaga a Mika me ka ‵foki atu se toega ki Iuta, kae kafai ko ‵toe fakafou aka a Ielusalema, ka fakamautinoa eiloa ne Ieova me ka fakaseai atu ana fili.

²¹ E isi foki ne nisi mea ne ‵valo mai i te Mika mataupu e 5. E pelā mo pati i te Mika 5:​2-4. Ne ‵valo mai ne Mika i ei me i te Tupu filifilia a te Atua​—⁠telā e ‘vau tena gafa mai aso mua eiloa’​—⁠ka sae mai i Peteleema. Ka pule a ia e pelā me se tausi mamoe i te “malosi mo te ‵malu o te Aliki te Atua.” E se gata i ei, ka maluga atu a te Tupu tenei, e se i Isalaelu fua, kae “i te lalolagi kātoa.” Ka ‵numi valevale a tino i te lalolagi kātoa me ko oi te tupu tenei, kae e se se mea ‵funa te mea tenā ki a tatou katoa.

²² Ko oi te toe tino tāua eiloa telā ne fanau i Peteleema? Kae ko oi foki te toe tino ‵malu “i te lalolagi kātoa”? E seai aka foki i tafa o te Mesia, ko Iesu Keliso! I te taimi ne fesili atu ei a te Tupu ko Helota ki faitaulaga sili mo faiakoga o te tulafono me e fanau i fea te Mesia, ne tali atu latou: “I Peteleema i Iutaia.” Ne siki atu foki ne latou a pati i te Mika 5:⁠2. (Mataio 2:​3-6) Ne iloa foki ne nisi tino a te mea tenei, me ne fai mai i te Ioane 7:42 a olotou pati, penei: “E a, ne seki fai mai te Tusi i te Keliso e tupu mai i te gafa o Tavita, kae fanau mai foki i Peteleema, i te fa‵kai ne nofo i ei Tavita?”

Se Fakamalosiga Tonu mō Tino

²³ E faipati a te Mika 5:​5-15 ki te kautau Asulia kolā ne maua fua ne latou te manumalo mō se taimi toetoe kae fakaasi mai i ei me ka fakaoko atu ne te Atua tena fakasalaga ki malo sē faka‵logo. E folafola mai i te Mika 5:7 a te faka‵fokiatuga o te toega o te kau Iutaia ki te lotou fenua, kae e fakauiga foki a pati konā ki a tatou i aso nei. Ne folafola mai a Mika, penei: “A tino Isalaelu kolā koi ola ka fai pela me se ‵sau fou telā ne aumai ne te Aliki ki malo e uke. E pelā me ne motiga ua ki lakau koi ola ake.” Ne fakaaogā a pati fakatusa konei ke ‵valo mai ei me i te toega o te Isalaelu faka-te-agaga ka fai pelā me ne fakamanuiaga mai te Atua ki tino. E fia‵fia malosi a ‘nisi mamoe’ a Iesu kolā e fakamoe‵moe ke ola i te lalolagi ke tavini fakatasi atu mo te toega o te “Isalaelu a te Atua” i aso nei, mai te fesoasoani atu o fakamalosi a nisi tino i te feitu faka-te-agaga. (Ioane 10:16; Kalatia 6:16; Sefanaia 3:⁠9) Kae e isi se manatu tāua i konei e ‵tau o mafau‵fau ki ei. E pelā me ne tino talai o te Malo, e ‵tau o fakatāua ne tatou a te tiute o tatou ke fakamalosi atu a nisi tino.

²⁴ Ne a mea ko iloa ne koe mai mataupu e 3 ke oko ki te 5 o te valoaga a Mika? Kāti ko manatu konei: (1) E manako te Atua ke fai ne takitaki o ana tino a te mea tonu. (2) Ka sē tali ne Ieova ‵tou ‵talo mafai e fai ne tatou a agasala mo te iloa tonu. (3) E mafai fua o fakataunu ne tatou ‵tou galuega talai māfai e fakamalosi ne te Atua tatou e auala i te agaga tapu. (4) E ‵tau o tauave ne tatou te igoa o Ieova ko te mea ke maua te taliaga a te Atua. (5) E pelā me ne tino talai o te Malo, e ‵tau o fakatāua ne tatou ‵tou tauliaga ke tuku atu a fakamalosiga ‵tonu ki nisi tino. Kāti e isi ne nisi manatu ‵gali ne maua ne koe. Ne a nisi mea e mafai o iloa ne tatou mai valoaga i te tusi o te Tusi Tapu tenei? Ka fesoasoani mai a te suā mataupu ke maua ne tatou a nisi fakaakoakoga aogā mai te avā mataupu fakaoti o valoaga fakamalosi loto a Mika.

Ka Tali Mai Pefea ne Koe?

• Ne a mea e manako te Atua ke fai ne takitaki o ana tino?

• Kaia e tāua ei a ‵talo mo te agaga tapu ki ‵tou taviniga ki a Ieova?

• E tauave pefea ne tino a te igoa o Ieova?

[Fesili mo te Sukesukega]

1. Ne a fekau e maua atu i te Mika mataupu e 3 ki te 5?

2, 3. (a) Ne a uiga ne ‵tau o fakaasi atu ne takitaki o Isalaelu, kae ne a mea ne fai ne latou? (e) E fakamatala mai pefea ne koe a tugāpati fakatusa kolā ne fakaaogā i te Mika 3:​2, 3?

4. Se a te ‵kese i te va o Ieova mo takitaki o Isalaelu?

5. Ne a mea ne manako Ieova ke fai ne takitaki o ana tino?

6, 7. Se a te manatu tāua e faka‵mafa mai i te Mika 3:⁠4?

8. Se a te mea ne fakailoa atu ki pelofeta ‵loi i aso o Mika?

9, 10. Se a te uiga ke ‘sē fakaasi atu olotou talafa,’ kae kaia e se ‵tau ei o fai ne Mika te mea tenā?

11. E maua pefea ne tino a te malosi ke folafola atu te fekau a te Atua?

12. Kaia ne mafai ei o tumau a soko o Iesu i te “fai‵pati atu ne latou a te muna a te Atua mo te loto toa”?

13. Ne a mea ne folafola mai me ka ‵tupu ki Ielusalema mo Samalia, kae kaia?

14. Ne fakataunu pefea te valoaga i te Mika 3:​12, kae e aofia pefea tatou i ei?

15. Ke fakamatala mai i au pati eiloa a te valoaga i te Mika 4:​1-4?

16, 17. Ne fakataunu pefea a te Mika 4:​1-4 i aso nei?

18. Se a te mea e fakauiga ki ei a te ‘‵nofo filemu mai lalo i togāvine mo togāmati’?

19. Se a te uiga o te tauave ne tatou a te igoa o Ieova?

20. Se a te mea ne ‵valo mai i te Mika 4:​6-13?

21, 22. Ne fakataunu pefea a pati i te Mika 5:⁠2?

23. Se a te mea e tupu nei ki te fakataunuga o te valoaga i te Mika 5:7?

24. Ne a manatu tāua mai te Mika mataupu e 3 ki te 5 ne maua ne koe?

[Ata i te itulau e 13]

E mafai o fakamatala atu ne koe te uiga o pati fakatusa a Mika ki te ulo?

[Ata i te itulau e 14]

E pelā mo Mika, e fai eiloa ne tatou te ‵tou galuega mo te loto toa