Ke Momea Aka Faeloa ‵Tou Atamai i te Galuega Talai —Fakatoka Faka‵lei te Fakavae mō Toe Āsiga

Te Pogai e Tāua ei: Kafai e maua ne tatou se tino fiafia, e ma‵nako eiloa tatou o āsi atu māfai ko nofo te tino i te fale ko te mea ke mafai o fakasiusiu ne tatou a fuataga o te munatonu kolā ne ‵toki ne tatou. (1 Koli. 3:6) A koi tuai o tiaki ne tatou te fale, e manakogina ke fakatoka faka‵lei te fakavae mō te toe āsiga mai te fakamautinoa aka te taimi e mafai o toe āsi atu tatou. E se gata i ei, se mea gali ke fakasae aka se fesili telā e mafai o sau‵tala ki ei i te suā āsiga. A te faiga tenei ka ati aka ei te loto fiafia o te tino, kae ka fiafia malosi a ia o faitau māfai e maua te tali o te fesili i te mekesini. A te fakatoka faka‵lei o te fakavae mō te suā sau‵talaga ka faigofie i ei ke toe āsi atu me ko oti ne filifili aka te mataupu ke sau‵tala ki ei i te suā āsiga, kae ka iloa ne te tino i te fale a mea kolā ka sau‵tala ki ei. Kafai ko toe āsi atu ki a ia, ke fakamatala atu te pogai ne toe āsi atu ei ke sau‵tala ki te fesili telā ne fakasae aka i te āsiga muamua.

Te Auala e Fai i ei:

I te taimi e fakatoka ei au pati fakatomua, ke fakatoka foki se fesili ke mafai o tali aka i te suā āsiga. E mafai o fakavae mai se mataupu i te mekesini telā e ofo atu ne koe, io me mafai ne koe o fakasae aka se fesili telā ko oti ne tali aka i ‵tou lōmiga mō sukesukega māfai ko toe āsi atu.
Kafai ko fakaotioti te lua sau‵talaga mo se tino fiafia, fakailoa atu ki a ia me e manako koe o toe fai‵pati mo ia ko fakaasi atu ei te fesili telā ne fakatoka ne koe. I nisi koga talai, e mafai o fakalavelave ‵ki a tino kae se ma‵nako ki se fakatokaga ke toe āsi atu ki a latou. I fakanofonofoga penā, e mafai o fai atu koe, penei: “Ea, e ‵lei ki a koe ke āsi mai au i te taimi penei? [Faka‵tali ki se tali.] Kāti e āsi mai fua au i te suā vaiaso ke tali aka te fesili tenei . . . Kafai se avanoa koe, fakailoa mai fua ke iloa ne au.”
Kafai ne tauto atu koe ki te tino i te fale i a koe ka āsi atu i te taimi mautinoa, tausi ki au pati. (Mata. 5:37) I te fakaotiga o te āsiga, fai se fakatokaga mō te suā āsiga.

Tofotofo Aka ki te Mea Tenei i te Masina Kātoa:

I te taimi e fakatoka ei au pati fakatomua, ke fakatoka foki ne koe se fesili mō te suā āsiga. Ke fakaasi atu ki nisi tino talai kolā e ga‵lue fakatasi mo koe.