Ke Momea Aka ‵Tou Atamai i te Galuega Talai​—Te Faiga o se Toe Asiga

TE POGAI E TĀUA EI: E ‵sala atu a tino e tokouke kolā e fia‵fia ki te fekau o te Malo ki te munatonu e uiga ki te Atua. (Isa 55:6) E ‵tau o toe ‵foki atu faeloa tatou ki a latou ko te mea ke mafai o akoako faka‵lei atu latou i se auala telā e gasolo atu ki mua. E fe‵paki a tino mo tulaga faiga‵ta kese‵kese, tela la, ka kese‵kese foki a auala e fakamalosi aka ei ne tatou te lotou fia‵fia. Kae e mafai o momea aka te ‵tou magoi māfai e fakatoka faka‵lei kae ke isi faeloa se mea e fai i āsiga takitasi, fakatasi mo te fakamoemoega ke kamata se akoga faka-te-Tusi Tapu.

TE AUALA KE FAI EI:

• Taumafai ke toe foki fakavave atu, kāti mai tua fua o nai aso.—Mat 13:19

• Ke mata fiafia kae āva. Taumafai ke se mata polepole koe

• Ke fakatalofa atu mo te alofa. Fakaaoga te igoa o te tino. Fakamasaua atu te pogai ko toe foki atu koe—kāti ke tali aka se fesili, avatu a mekesini ‵fou, fakaasi atu ‵tou fakatuatusi i te itaneti, pei atu se vitio, io me ke fakaasi atu te faiga o se akoga faka-te-Tusi Tapu. Fakafetaui au fakamatalaga māfai e fiafia a ia ki se isi mataupu.—Fpi 2:4

• Fakasiusiu te fuaga o te munatonu ne ‵toki i tena loto mai te fakaasi atu o se manatu faka-te-Tusi Tapu kae kāti mai te tuku atu o se tusi. (1Ko 3:6) Taumafai ke ati aka se va fakataugasoa mo ia

• Fakatoka se fakavae mō te suā asiga