Ke Fakatoka te Fakavae mō te ‵Toe Asiga

TE POGAI E TĀUA EI:

E ma‵nako tatou ke fakasiusiu a fuaga o te munatonu kolā e ‵toki ne tatou. (1Ko 3:6) Kafai e maua ne tatou se tino telā ne fakaasi mai te fiafia, se mea ‵lei ke tuku atu ne tatou se fesili telā e mafai o sau‵tala tatou ki ei māfai ko toe ‵foki atu. Ka ati aka ne te mea tenei a te olioli kae fakafaigofie aka ‵tou fakatokaga mō te toe asiga. Kafai e toe ‵foki atu tatou, e mafai o fai atu tatou me ne asi atu tatou o tali aka te fesili telā ne fakasae aka i te taimi fakamuli ne āsi atu ei tatou.

TE AUALA KE FAI EI:

• I te taimi e fakatoka ei ne koe au pati fakatomua ki te galuega talai mai fale ki fale, ke aofia se fesili ke tali aka i te suā asiga. E mafai o aofia i ei se mea telā e tali aka i te tusi telā e ofo atu ne koe. Io me se fesili telā e tali aka i se tusi fai akoga faka-te-Tusi Tapu telā e mafaufau koe o fakaaoga māfai e toe foki atu.

• Kafai ko fakaotioti tau lua sau‵talaga mo se tino fiafia, fakailoa atu ki ei tou manakoga ke toe sau‵tala koulua kae taku atu te fesili ne fakatoka ne koe ke tali aka māfai e toe foki atu koe. Kafai e mafai, taumafai ke maua te auala ke fesokotaki atu ki a ia.

• Kafai e fai atu koe me ka toe foki atu koe i se taimi mautinoa, ke fakamaoni la ki te lua fakatokaga.—Mat 5:37.