Fakaaoga te jw.org i te Galuega Talai

E fai te ‵tou Web site e pelā me se mea faigaluega tāua ke fesoasoani mai ke fakasalalau atu ne tatou te tala ‵lei “ki toe koga ‵mao i te lalolagi.” (Galu. 1:8) A te tokoukega o tino i fale e se mafai o maua ne latou te jw.org. Kae e iloa ne latou māfai ko oti ne fakasino atu ne se tino talai ki a latou.

Ne ‵kopi ne se ovasia faimalaga e tokotasi a te vitio tenei, Kaia e ‵Tau ei o Sukesuke ki te Tusi Tapu? ki tena selefoni kae fakaasi atu ne ia i so se avanoaga e maua ne ia. E pelā me se fakaakoakoga, kafai e fanatu mai fale ki fale, e fai atu a ia, penei: “E āsi fakavave mai fua au ke fesoasoani atu ki tino ke maua ne latou a tali ki fesili tāua e tolu konei: Kaia ko uke katoa i ei penei a fakalavelave i te lalolagi nei? Ka faka‵lei aka pefea ne te Atua? Kae e mafai pefea o kufaki tatou i te taimi nei? E fakasino atu loa te vitio toetoe tenei ki fesili e tolu konā.” E fakatagi ne ia kae onoono atu ki te tino. Ko oko eiloa i te gali o te vitio ko ala ei o se mafai o taofi aka ne te tokoukega a te fia onoono atu ki te vitio ke oko loa ki te fakaotiga. Kae ne fai atu te ovasia faimalaga: “Ne fatoa lagona ne koe me e mafai o fakamolemole atu koe mō se akoga faka-te-Tusi Tapu. Tela la, e mafai o fakaasi fakavave atu nei ne au te faiga.” Kafai ko talia ne te tino i te fale, ko fakaasi atu ei ne ia te auala e fai ei te akoga mai te fakaaogaga o te polosiua ko te Tala ‵Lei. Kafai e se avanoa te tino, e fai ne ia a fakatokaga ke āsi atu i te suā taimi. Kafai e fanatu a ia ki se fale‵kai o mānava malie i ei, e fai atu foki ne ia i se auala tai ‵pau a te mea ki se tino i ana tafa māfai ko sau‵tala lāua. E mata, e fakaaoga ne koe te jw.org i te ‵tou galuega talai?