Ke Momea Aka Faeloa ‵Tou Atamai i te Galuega Talai—Ke Fakamau a Fakamatalaga e Uiga ki te Tino Fiafia

“Saga faka‵lei faeloa ki a koe mo au akoakoga.” (1 Timo. 4:16) A pati fakatonutonu fakaosofia konei mai te apositolo ko Paulo ki a Timoteo e fakaasi mai i ei, me faitalia me ko tatou koi ‵fou io me ko leva ne ata‵mai e ‵tau o taumafai tatou ke gasolo atu faeloa ki mua. Ke fesoasoani mai ki a tatou i te feitu tenā, e isi se fakasologa fou o mataupu faka‵soko telā e fakaulutala penei “Ke Momea Aka Faeloa ‵Tou Atamai i te Galuega Talai,” ka sae mai i Te ‵Tou Galuega Talai. I mataupu takitasi, ka fakamatala mai i ei se atamai tāua, mo nisi manatu fesoasoani ke fakagalue aka ei te atamai tenā. I te masina kātoa, ka fakamalosi atu ki tino katoa ke ‵saga tonu atu i se auala fakapito ki te atamai tenā. Kafai ko oti te masina, ka tuku mai ne se vaega i te Fakatasiga mō te Galuega Talai se avanoaga ke fakamatala mai ne latou a te auala ne aoga ei a te fakaaogaga o te atamai tenā. I te masina tenei, e fakamalosi mai ki a tatou ke ga‵lue malosi ki te fakamauga o fakamatalaga e uiga ki te tino fiafia.

Te Pogai e Tāua ei: Ke fakataunu ‵tou galuega, e ‵tau o uke atu ‵tou mea e fai i lō te talai atu fua. E ‵tau o toe ‵foki atu tatou ki tino fia‵fia kae akoako atu latou, mai te fakasiusiuga o fuaga o te munatonu kolā ne ‵toki ne tatou. (Mata. 28:​19, 20; 1 Koli. 3:​6-9) E aofia i te mea tenei a te ‵toe ‵foki atu o ‵sala a te tino fiafia, te sau‵tala ki mea e manavase a ia ki ei, kae faka‵soko atu te sau‵talaga telā ne fai i te āsiga muamua. Tela la, kafai e maua ne tatou se tino fiafia, se mea ‵lei ke fakamau a fakamatalaga e uiga ki ei.