Ke Manumalo i Tulaga Faiga‵ta i te Galuega Talai Mai Fale ki Fale

“Ka ko te motou Atua, ne aumai eiloa ne ia te loto malosi o taku atu ki a koutou a te Tala ‵Lei mai i a ia, kae tonu me e tokouke a tino e ‵teke ki a matou.”​​—1 TESALONIA 2:2.

1. Ne a fakalavelave ne fe‵paki mo Ielemia, kae ne manumalo pefea a ia i ei?

E ‵PAU eiloa a lagonaga o Ielemia mo tatou. I te taimi ne fakailoa atu ei ne Ieova tena galuega ke fai mo “pelofeta ki malo,” ne tali atu a ia: “Te Aliki Sili, e se iloa ne au o faipati, au koi foliki.” E tiga eiloa te feitu tenā, ona ko tena talitonu ki a Ieova, ne talia ne ia te galuega tenā. (Ielemia 1:​4-​10) I tausaga e sili atu i te 40, ne fakafesagai atu a Ielemia ki te se fia‵fia o tino, ‵tekemaiga, fakatauemuga, e pelā foki mo fakasauāga. (Ielemia 20:​1, 2) I nisi taimi, ne maua eiloa ne ia se lagonaga ‵fiu. Kae ne kufaki eiloa a ia i te folafolaatuga o te fekau telā e se fia‵fia ki ei a te tokoukega o tino. Ona ko te malosi o te Atua, ne fakataunu ne Ielemia a te mea telā ne seki mafai o fai ne ia i tena malosi eiloa.​​—Faitau te Ielemia 20:​7-9.

2, 3. E fakafesagai atu pefea a tavini a te Atua i aso nei ki tulaga faiga‵ta tai ‵pau kolā ne fe‵paki mo Ielemia?

² E mafai eiloa o malamalama a tavini e tokouke a te Atua i aso nei i lagonaga o Ielemia. Kafai e mafaufau ki te faiga o te galuega talai mai fale ki fale, kāti ne ma‵natu aka a nisi tino i a tatou penei: ‘E se mafai lele eiloa ne au o fai te mea tenā.’ Kae i te taimi ne iloa aka ei me ko te loto o Ieova e folafola atu ei ne tatou te tala ‵lei, ne manumalo tatou i te mataku kae ne fakalavelave faeloa tatou i te faiga o te galuega talai. Ke oko foki loa ki tino e tokouke i a tatou, ne fe‵paki mo tulaga o te olaga kolā ne fai ei ke faigata, i nisi taimi, ke tumau i te faiga o te galuega talai. E tonu, se mea faigata ‵ki a te kamataga o talai atu mai fale ki fale kae ke tumau foki i te talai atu ke oko ki te gataga.​​—Mataio 24:13.

³ Kae e a māfai ko tai leva eiloa ne sukesuke koe ki te Tusi Tapu fakatasi mo Molimau a Ieova, e kau atu sāle ki fakatasiga a te fakapotopotoga kae tai faigata loa ke fanatu koe i te galuega talai mai fale ki fale? Kae e a foki māfai koe se Molimau papatiso telā e faigata ke fanatu i te galuega talai mai fale ki fale, faitalia me malosi ‵lei koe ke fai penā? Ke masaua la, me ko manumalo nei a tino mai koga kese‵kese i tulaga faiga‵ta o te galuega talai mai fale ki fale. Mai te fesoasoani o Ieova, e mafai foki o fai ne koe te mea tenā.

Ke Loto Toa

4. Se a te mea ne fai ei ke mafai ne te apositolo ko Paulo o talai atu te tala ‵lei mo te loto toa?

⁴ E iloa ‵lei ne koe me ko fakataunu eiloa te faiga o te galuega talai i te lalolagi kātoa, ona ko te agaga o te Atua, kae e se ko te malosi mo te poto o tāgata. (Sakalia 4:11) E penā foki eiloa a te galuega talai e fai ne Kelisiano taki tokotasi. (2 Kolinito 4:7) Ke mafaufau ki te apositolo ko Paulo. Ne tusi mai a ia e uiga ki te taimi ne fai fakamasei ei a ia mo tena taugasoa fakamisionale: “Ne sōna fai matou, kae muna maseigina foki i Filipi, . . . ka ko te motou Atua, ne aumai eiloa ne ia te loto malosi o taku atu ki a koutou a te Tala ‵Lei mai i a ia, kae tonu me e tokouke a tino e ‵teke ki a matou.” (1 Tesalonia 2:2; Galuega 16:​22-​24) Kāti e se mafai o fakaataata i ‵tou mafaufau me ne faigata, i nisi taimi, ke fai ne se tino talai loto finafinau e pelā mo Paulo, a te galuega talai. Kae e pelā mo tatou katoa, ne ‵tau o fakalagolago a Paulo ki a Ieova ko te mea ke mafai o talai atu ne ia te tala ‵lei mo te loto toa. (Faitau te Efeso 6:​18-​20.) E mafai pefea o tau‵tali atu tatou ki te fakaakoakoga a Paulo?

5. Se a te auala e tasi e mafai ei o ati aka ne tatou te loto toa ke talai atu?

⁵ A te auala e tasi ke ati aka ei te loto toa ke talai atu ko te faiga o ‵talo. Ne fai mai se paenia, penei: “E ‵talo au ke mafai o faipati atu au mo te loto talitonu, e ‵talo au ke mafai ne au o fakaoko atu te fekau ki loto o tino, kae e ‵talo au ke fiafia foki au ki taku galuega talai. A te ‵tonuga loa, a te galuega tenei i a Ieova, e se i a tatou, tela la, e se mafai eiloa o fai ne tatou se mea e aunoa mo tena fesoasoani.” (1 Tesalonia 5:​17) E ‵tau mo tatou katoa o tumau i te ‵talo mō te fesoasoani o te agaga tapu o te Atua ke talai atu mo te loto toa.​​—Luka 11:​9-​13.

6, 7. (a) Se a te fakaasiga ne maua ne Esekielu, kae se a tena uiga? (e) Se a te akoakoga e maua ne tavini a te Atua i aso nei mai te fakaasiga a Esekielu?

⁶ E fakaasi mai i te tusi ko Esekielu se isi mea telā e mafai o fesoasoani mai ke talai atu mo te loto toa. I se fakaasiga, ne avatu ne Ieova ki a Esekielu se pelugā tusi telā e tusi i feitu e lua a “te tagi malosi mo te tagi fi‵ta” kae ne fai atu ki a ia ke kai ki te pelugā tusi tenā, ana muna: “Te tagata ola, kai te pelugā pepa tenei e avatu ne au; faka‵fonu ki ei tou tinae.” Se a te uiga o te fakaasiga tenei? Ne ‵tau o malamalama katoatoa a Esekielu i te fekau telā ka folafola atu ne ia. I se auala fakatusa, ne ‵tau o fai pelā me se vaega o tena foitino, kae pokotia i ei ana lagonaga ‵loto. Ne toe fai mai te pelofeta: “Ne kai ne au, e pelā eiloa mo te hani i te magalo.” A te folafola atu o te fekau a te Atua ki tino se mea fakafiafia​​—e pelā eiloa me se hani​​—ki a Esekielu. Ne mafaufau a ia me ko oko eiloa tena taulia malosi ke fai a ia mo sui o Ieova kae ke fakataunu te galuega tenei ne tuku mai ne te Atua, faitalia me e fakauiga i ei ki te fakaokoatuga o te fekau ‵mafa ki tino sē fia‵fia.​​—Faitau te Esekielu 2:8–​3:​4, 7-9.

⁷ E maua i te fakaasiga tenei se akoakoga tāua ‵ki mō tavini a te Atua i aso nei. E isi foki se fekau ‵mafa e ‵tau o folafola atu ne tatou ki tino kolā e se fakatāua sāle ne latou ‵tou taumafaiga. Ko te mea ke tumau tatou i te ‵kilo atu ki te galuega faka-Kelisiano e pelā me se tauliaga mai te Atua, e ‵tau o ‵kai faeloa tatou ki meakai faka-te-agaga. E se mafai o malamalama katoatoa tatou i te Muna a te Atua māfai e fai fakavave fua io me se fai faeloa ‵tou sukesukega totino. E mata, e mafai o momea aka te ‵lei o te tulaga mo te fakamaoni o koe o faitau kae sukesuke faeloa ki te Tusi Tapu? E mata, e mafai foki o momea aka te uke o taimi e mafaufau ‵loto ei koe ki au mea ne faitau?​​—Salamo 1:​2, 3.

Te Kamataga o Sau‵talaga Faka-te-Tusi Tapu

8. Se a te auala ko oti ne aogā ki nisi tino talai o te Malo ke kamata ki ei a sau‵talaga faka-te-Tusi Tapu i te galuega talai mai fale ki fale?

⁸ Ki tino talai e tokouke, a te ‵toe mea faigata i te faiga o te galuega talai mai fale ki fale ko te kamataga o te sautalaga mo te tino i te fale. E tonu, e faigata ‵ki i nisi kogā koga ke kamata se sautalaga mo se tino. E ‵lei atu ki nisi tino talai ke faipati ki te tino i te fale māfai e filifili faka‵lei olotou pati fakatomua ke kamata ki ei te sautalaga ko tuku atu ei se tamā pepa ki te tino, e pelā mo te mea e fakaasi mai i te pokisi. E mafai eiloa o fiafia te tino ki te ulutala i te tamā pepa io me ko ata ‵gali i ei, kae tuku mai i ei se avanoaga ke fakamatala fakatoetoe atu te pogai o te ‵tou āsiga kae ke fakasae aka foki ei se fesili. A te suā auala ko te fakaasi atu ki te tino i te fale a tamā pepa kese‵kese kae ‵kami atu ke filifili aka te pepa telā e fiafia a ia ki ei. E tonu, e se taumafai fua tatou ke tuku atu a tamā pepa io me ke fakaaogā ne tatou i fale takitasi kae ko te taumafaiga ke kamata a sau‵talaga faka-te-Tusi Tapu kolā e mafai o iku atu ki te faiga o akoga faka-te-Tusi Tapu.

9. Kaia e tāua ei ke fakatoka faka‵lei?

⁹ E tiga eiloa so se auala e fakaaogā ne koe, ka aogā eiloa te fakatoka faka‵lei ko te mea ke toka kae ke loto fiafia foki koe ki te faiga o te galuega talai mai fale ki fale. Ne fai mai se paenia e tokotasi: “E sili atu toku fiafia māfai e fakatoka faka‵lei au. E fai ei ke fia faipati atu au ki tino.” E fai mai foki se isi paenia: “Kafai e masani ‵lei au mo mataupu i loto i te tusi telā e ofo atu ne au, e fiafia malosi eiloa au ke fakaaogā a mataupu konā.” E tiga eiloa e aogā te mafaufau ifo ki au pati ka fai, e iloa ne nisi tino me sili atu te aogā ke fakaakoako olotou pati fakatomua i se leo maluga. A te faiga penā e fesoasoani atu ki a latou ke tuku atu te ‵toe mea ‵lei ki a Ieova.​​—Kolose 3:​23; 2 Timoteo 2:​15.

10. Ne a mea e mafai o fai ke aogā a fakatasiga mō te galuega talai?

¹⁰ A fakatasiga aogā mō te galuega talai e fesoasoani mai ke ma‵goi kae ke fia‵fia foki tatou ki te faiga o te galuega talai mai fale ki fale. Kafai e fetaui ‵lei a te tusi siki mō te aso mo te faiga o te galuega talai, e mafai o faitau kae sau‵tala malie ki ei. Kae e ‵tau o fakaavanoa foki ne te taina e fai ne ia te fakatasiga mō te galuega talai, a taimi e lava ke sau‵tala ki se mataupu io me ke fai se fakaasiga faigofie telā e fetaui ‵lei mo te koga talai io me sau‵tala ki nisi auala aogā kolā e mafai o fakaaogā i te galuega talai i te aso tenā. Ka fesoasoani atu te mea tenei ki tino talai i konā ke tuku atu se molimau magoi. Mai te fakatoka faka‵lei, e mafai ne toeaina mo nisi tino kolā e fai ne latou a fakatasiga konei o fai a mea katoa konei i loto i te taimi telā e fakaavanoa mai mō fakatasiga penā.​​—Loma 12:8.

Te Aogā o te Fakalogologo Faka‵lei

11, 12. E fesoasoani mai pefea a te fakalogologo faka‵lei mo te alofa ke oko atu tatou ki loto o tino mo te tala ‵lei? Tuku mai ne fakaakoakoga.

¹¹ E se ko te faiga fua o fakatokaga ‵lei kae ko te fiafia malosi foki ki nisi tino e fesoasoani mai ei ki a tatou ke kamata a sau‵talaga faka-te-Tusi Tapu kae ke oko atu foki ki loto o tino i te galuega talai. A te auala e tasi ke fakaasi atu te fiafia tenei ko te auala e fakalogo‵logo ei tatou. Ne fai mai se toeaina asiasi: “A te loto kufaki mo te fakaasiatuga o te fiafia o fakalogologo ki tino e fai ei ke fia‵fia mai a tino ki te tala ‵lei kae se fakaasiga gali foki tenā o te fiafia tonu ki tino.” A te fakalogologo faka‵lei atu mo te alofa e mafai o fai pelā me ko te auala ke ‵tala aka ei te loto o se tino, e pelā mo te mea e fakaasi mai i te tala tenei.

¹² I se tusi telā ne ‵lomi i te nusipepa o Saint-Étienne i Falani, ko te Le Progrès, ne fakamatala mai i ei ne se fafine a te āsiatuga a tino e tokolua ki tena fale mai tua malie eiloa o te mate atu fakapoi o tena tama fafine ko tolu ana masina. “Ne iloa fakavave ne au me i a laua ne Molimau a Ieova,” ko ana pati. “Ne toka au o ‵tuli keatea laua mo te āva, kae ne lavea ne au a te tusi telā e ofo ne laua ki tino. E faipati loa ki te pogai e talia ei ne te Atua a logo‵maega. Tela la, ne fakaiku aka ne au ke ‵kami mai laua ki loto mo te fakamoemoega ke taku fakamasei ne au lā fakamatalaga. . . . E silia malie mo te itula e tasi ne ‵nofo mai ei a Molimau konā. Ne fakalogo‵logo faka‵lei laua ki a au mo te a‵lofa, kae i te taimi ko tiaki ei ne laua te fale, ne pelā aka loa au telā ne talia ei ne au ke toe āsi mai.” (Loma 12:15) Fakamuli ifo, ne talia ne te fafine tenei ke fai sena akoga faka-te-Tusi Tapu. E lavea faka‵lei atu me i te mea telā ne masaua ne ia i te āsiga muamua e se ko pati ne fai atu ne Molimau konei, kae ko te auala telā ne fakalogo‵logo ei laua.

13. E fakamafuli‵fuli pefea ne tatou ‵tou pati fakatomua e uiga ki te tala ‵lei ki tino kolā e fetaui mo tatou?

¹³ Kafai e fakalogo‵logo tatou mo te alofa, ko tuku atu eiloa ne tatou se avanoaga ki tino ke fai mai ne latou te pogai e ma‵nako ei latou ki te Malo. E fai ne te mea tenei ke ‵tu atu tatou i se tulaga ‵lei ke fakailoa atu te tala ‵lei ki a latou. Kāti ko oti ne lavea ne koe me i tino talai ma‵goi ko tino kolā e fakalogo‵logo faka‵lei. (Faataoto 20:5) E fakaasi atu ne latou te fiafia tonu ki tino kolā e fetaui mo latou i te galuega talai. E tusi ne latou olotou igoa mo koga e ‵nofo i ei kae penā foki eiloa mo mea kolā e fia‵fia kae ma‵nako latou ki ei. Kafai e fakasae aka ne se tino se mea telā e manavase a ia ki ei, e fai ne latou olotou sukesukega kae toe ‵foki atu o fakaasi atu a fakamatalaga ne maua ne latou. E pelā mo te apositolo ko Paulo, e fakamafuli‵fuli ne latou olotou pati fakatomua e uiga ki te Malo ke fakafetaui aka ki tino kolā e fetaui mo latou. (Faitau te 1 Kolinito 9:​19-​23.) A te vaegā fiafia tonu tenā e fai ei ke tosina mai a tino ki te tala ‵lei kae fakaata faka‵lei mai foki i ei a “te alofa ‵nau o te ‵tou Atua.”​​—Luka 1:​78.

Ke Maua Faeloa se Kilokiloga ‵Lei

14. I te faiga o te ‵tou galuega talai, e mafai pefea o fakaasi atu ne tatou a uiga o Ieova?

¹⁴ Ko oti ne fakaasi mai ne Ieova me e fakatāua ne ia tatou mai te tukumaiga o te saolotoga ke fai ‵tou filifiliga. E tiga eiloa e fai a ia mo fai te Atua Malosi Katoatoa, e se faimālō ne ia so se tino ke tapuaki atu ki a ia kae fakamolemole atu ki tino mo te alofa, e fakamanuia foki ne ia a tino kolā e ‵saga atu mo te loto fakafetai ki ana fakatokaga ‵gali. (Loma 2:4) E pelā me ko ana tino talai, e ‵tau o toka tatou o fakaasi atu te tala ‵lei i te auala telā e fakaaloalo atu ei ki te ‵tou Atua alofa i so se taimi e molimau atu tatou. (2 Kolinito 5:​20, 21; 6:​3-6) Ke fakataunu te mea tenā, e ‵tau o maua faeloa ne tatou se kilokiloga ‵lei ki tino i ‵tou koga talai. Se a te mea ka fesoasoani mai ke manumalo tatou i te tulaga faigata tenā?

15. (a) Se a te mea ne fakatonu atu ne Iesu ke fai ne ana apositolo māfai e ‵teke atu a tino ki te lotou fekau? (e) Ne a mea e mafai o fesoasoani mai ke ‵saga tonu atu ki te ‵salaga o tino loto ‵lei?

¹⁵ Ne fakatonu atu Iesu ki ana soko ke mo a ma tō manava‵se māfai e se talia ne nisi tino a te fekau kae ke ‵saga tonu atu ki te ‵salaga o tino loto ‵lei. (Faitau te Mataio 10:​11-​15.) A te faiga mo te kausaki atu ki fakamoemoega fo‵liki e mafai o fesoasoani mai ke fai te mea tenei. Ne fakatusa ne se taina e tokotasi a ia eiloa ki se tino telā e salasala ki se koloa tāua. Tenei eiloa tena tugāpati e fai sāle, “E olioli eiloa au ki te taimi telā ka maua ei ne au se aulo i te aso nei.” E kausaki eiloa se isi taina “ke fetaui mo se tino fiafia i vaiaso takitasi kae toe āsi atu i nāi aso mai tua ifo o fakamalosi aka tena fiafia.” E taumafai a nisi tino talai ke fakaasi atu fua se tusi siki e tasi ki tino katoa e fetaui mo latou i fale takitasi. Se a te fakamoemoega e mafai o kausaki atu koe ki ei?

16. Ne a pogai e maua ne tatou ke tumau eiloa i te talai atu?

¹⁶ A te iku manuia o te galuega talai mai fale ki fale e se fakalagolago fua ki te ‵saga mai o tino i te koga talai. E tonu, e tāua ‵ki a te faiga o te galuega talai ki te faka‵saoga o tino loto ‵lei, kae e aogā foki eiloa mō nisi pogai tāua. E tuku mai ne te galuega faka-Kelisiano se avanoaga ke fakaasi atu ‵tou a‵lofa ki a Ieova. (1 Ioane 5:3) E fai ei ke se pisipisia tatou i toto o nisi tino. (Galuega 20:​26, 27) E fakailoa atu foki i ei ki tino sē amioatua me “ko oko mai te taimi e fakamasino ei ne [te Atua] a tino.” (Fakaasiga 14:​6, 7) Kae sili i mea katoa, e auala i te talaiatuga o te tala ‵lei, ko tavae atu ei ki te igoa o Ieova i te lalolagi kātoa. (Salamo 113:3) Tela la, faitalia me e faka‵logo a tino io me ikai, e ‵tau o tumau tatou i te folafolaatuga o te fekau o te Malo. E tonu, e kilo mai eiloa a Ieova mo te fiafia ki ‵tou taumafaiga katoa ke folafola atu ei te tala ‵lei.​​—Loma 10:​13-​15.

17. Se a te mea telā ko pili o faimālō atu ki tino ke iloa ne latou?

¹⁷ E tiga eiloa e se fia ‵saga mai a tino e tokouke i aso nei ki ‵tou galuega talai, kae ko pili o ‵kese te lotou kilokiloga ki ei. (Mataio 24:​37-​39) Ne fakamaoni atu ne Ieova ki a Esekielu me i te taimi e fakataunu ei ana fakamasinoga, ka iloa ne tino Isalaelu ‵teke “me e isi se pelofeta ko oti ne oko atu ki a latou.” (Esekielu 2:5) I se auala tai ‵pau, kafai ko fakaoko mai ne te Atua ana fakamasinoga ki te olaga masei tenei, ka faimālō atu ei ki tino ke iloa ne latou me i te fekau telā e talai atu ne Molimau a Ieova i koga valevale kae pelā foki mai fale ki fale ne māfua mai eiloa i te Atua tonu e tokotasi, ko Ieova, kae ne fai eiloa a Molimau e pelā me ko ana sui. Ko tafaga la te gali o te tauliaga ko maua ne tatou ke tauave tena igoa kae folafola atu tena fekau i taimi tāua konei! Ona ko tena fesoasoani, ke na tumau tatou i te manumalo i tulaga faiga‵ta o te faiga o te galuega talai mai fale ki fale.

Ka Tali Mai Koe Pefea?

• E maua pefea ne tatou te loto toa ke talai atu?

• Ne a mea e mafai o fesoasoani mai ke kamata a sau‵talaga faka-te-Tusi Tapu i te galuega talai mai fale ki fale?

• E mafai pefea o fakaasi atu ne tatou te fiafia tonu ki nisi tino?

• Ne a mea e mafai o fesoasoani mai ke maua faeloa ne tatou se kilokiloga ‵lei ki tino i ‵tou koga talai?

[Fakamatalaga o te Ata i te itulau e 14]

Se Auala ke Kamata ei Sau‵talaga Faka-te-Tusi Tapu

Ke kamata:

◼ Kafai ko oti ne fakatalofa atu ki te tino i te fale, e mafai o tuku atu ki a ia se tamā pepa kae fai atu penei, “A te pogai ne āsi mai ei au i te aso nei, ko te mea ke fakaasi atu ki a koe se manatu fakamalosi loto e uiga ki te mataupu tāua tenei.”

◼ Io me e mafai o ofo atu ne koe se tamā pepa kae fai atu, “E āsi fakavave mai fua au ki a koe i te aso nei me e fiafia au ke iloa ne au ou manatu e uiga ki te mataupu tenei.”

Kafai e talia ne te tino te tamā pepa:

◼ E aunoa mo te fakatalave, ke ‵sili atu se fesili faigofie ke fakaasi mai ne te tino ana manatu e uiga ki te ulutala o te tamā pepa.

◼ Fakalogologo faka‵lei, kae taumafai ke malamalama koe i ana kilokiloga. Fakamālō faka‵lei atu mō ana manatu.

Ke faka‵soko te sautalaga:

◼ Faitau kae sau‵tala ki se tusi siki e tasi io me e uke atu, mai te fakafetaui aka o au pati fakatomua ki manakoga mo mea kolā e fiafia ki ei te tino.

◼ Kafai e fiafia eiloa te tino tenā, ke ofo atu ki a ia se tusi kae fakaasi atu te faiga o se akoga faka-te-Tusi Tapu māfai e mafai. Fakatoka ke toe āsi atu.