Ke Fai a Pelofeta Pelā me se Fakaakoakoga—Sapakuka
1. Kaia e ‵pau ei ‵tou tulaga mo te pelofeta ko Sapakuka?
1 I te taimi e fakafesagai atu ei tatou ki te gasoloakaga ki luga o amioga ma‵sei i te lalolagi, ko ‵pau eiloa tatou mo lagonaga o te pelofeta ko Sapakuka telā ne fesili atu ki a Ieova, penei: “Ai a e fai ei ne koe ke lavea ne au a puapuaga konā? E mafai pefea ne koe o kufaki tou kilokilo atu ki faiga sē ‵tonu konā?” (Sapa. 1:3; 2 Timo. 3:1, 13) A te mafau‵fau ‵loto ki te fekau mo te fakaakoakoga fakamaoni a Sapakuka e mafai o fesoasoani mai ke tumau tatou i te ‵nofo fakatali‵tali ki te aso o te fakamasinoga a Ieova.—2 Pe. 3:7.
2. E mafai pefea o fakaasi atu me e ola tatou e auala i te fakatuanaki i aso nei?
2 Ola e Auala i te Fakatuanaki: I lō te manavase ki te tulaga o amioga ma‵sei, ne tumau eiloa a Sapakuka i te matapulapula kae galue malosi i te feitu faka-te-agaga. (Sapa. 2:1) Ne fakatalitonu atu a Ieova ki te pelofeta me ka fakataunu eiloa Ana muna i te taimi tonu kae ko “latou kolā e amio‵tonu ka ola, me i a latou e fakatuanaki ki te Atua.” (Sapa. 2:2-4) Se a te uiga o te mea tenā mō Kelisiano kolā ko ola i te fakaotiotiga o te taimi o te gataga? A te ‵toe mea tāua e se ko te iloa fua o te taimi e oko mai ei te gataga, kae ke loto tali‵tonu me ka oko mai eiloa. E fakamalosi aka tatou ne te ‵tou fakatuanaki ke tumau i te matapula‵pula kae fakatāua a te galuega talai.—Epe. 10:38, 39.
3. Kaia e ‵tau ei o fakatumau te ‵tou fia‵fia i te taviniga ki a Ieova?
3 Ke Fiafia ki a Ieova: I te taimi e oso atu ei a Koka mai Makoka o taua ki tino o Ieova, tenā eiloa te taimi ka tofotofogina ei ‵tou fakatuanaki. (Eseki. 38:2, 10-12) E fakamafua aka ne taua a fakalavelave kae e pokotia foki i ei a tino kolā e manumalo sale i taua. E mafai o oge meakai, ‵galo atu a kope mo te olaga foki ka gasolo o faigata. Ka ‵saga atu pefea tatou ki fakalavelave konei? Ne iloa ne Sapakuka me ka fepaki a ia mo mea faiga‵ta, telā ne fakaiku aka ei ne ia ke fakatumau tena fiafia i te taviniga ki a Ieova. (Sapa. 3:16-19) Ka fesoasoani mai foki a te “fiafia telā ka aumai ne te Aliki [Ieova]” ke mafai ne tatou o kufaki i tofotofoga i aso mai mua.—Nee. 8:10; Epe. 12:2.
4. Se a te fiafia e mafai o maua ne tatou i aso nei e penā foki mo aso mai mua?
4 A tino kolā ka faka‵sao ne Ieova i te taimi e oko mai ei te aso o tena fakamasinoga ka tumau eiloa i te akoako ki auala o Ieova. (Sapa. 2:14) A tino foki kolā ka toe faka‵tu aka ka tauloto foki e uiga ki a Ieova. I te taimi foki tenei, ke na fakaaoga ne tatou so se avanoaga ke fai‵pati atu ki tino e uiga ki a Ieova mo ana galuega fakaofoofogia!—Sala. 34:1; 71:17.