E Mata, e Fakatoka Koe mō te Fakamanatuga?

Ne tu ‵kese a te toe Paseka fakaoti a Iesu. Ona ko ia ko pili o mate, ne fakatoka ne ia ke ‵kai fakatasi a ia mo ana apositolo i te ‵kaiga o te Paseka kae ne kamata ne ia se fakamanatuga fou o te tausaga, ko te ‵Kaiga a te Aliki i te Afiafi. Tenā uga i ei ne ia a Petelu mo Ioane ke olo o fakatoka te potu. (Luk 22:7-13; onoono ki te ata i te ‵kava.) E fakamasaua mai ne te mea tenei ki a tatou me ‵tau o fakatoka ki te Fakamanatuga i a Mati  27. Kāti ko oti ne fakatoka ne fakapotopotoga a te failauga, te falaoa mo te uaina, mo nisi mea aka. Kae ne a mea e ‵tau o fai ne tatou taki tokotasi ke toka mō te Fakamanatuga?

Fakatoka tou loto. Faitau kae mafaufau ‵loto ki tusi fai‵tau o te Fakamanatuga. E mafai o maua te fakasologa i te tusi Ke Sukesuke ki te Tusi Tapu i Aso Katoa. Kae maua foki a nisi fakamatalaga ki te fakasologa i te Fakamatalaga Fakaopoopo E12 i te Tusi Tapu i te ‵Fuliga o te Lalolagi Fou. (Ke onoono ki te lōmiga ko te Tusi mō Fakatasiga i a Apelila 2020.) E mafai o maua ne kāiga a fakamatalaga ke mafau‵fau ki ei i olotou tapuakiga a kāiga ki te tāua o te ‵togiola mai te onoono ki te Watch Tower Publications Index io me ko te Research Guide for Jehovah’s Witnesses.

‵Kami a nisi tino ke ‵kau mai. Ke kau katoatoa atu ki te kamiga fakapito tenei. Mafaufau ki tino kolā e mafai o ‵kami mai, pelā mo toe asiga, tino a‵koga mua ki te Tusi Tapu, taugasoa, mo kāiga. E ‵tau o ‵kami ne toeaina a tino kolā ko mate faka-te-agaga. Masaua me kafai se tino e se nofo i te otou koga, e mafai o maua ne koe te taimi mo te koga e fai ei te Fakamanatuga telā e pili atu ki a ia mai te ‵toko i te vaega MATOU i te itulau muamua o te jw.org kae fili te “Fakamanatuga.”

Ne a nisi mea e mafai ne tatou o fai ke mafai o fakatoka?