Fakaaoga a Mea ‵Tupu i te Vaitaimi Tenei i Tau Galuega Talai

I tena galuega talai, ne fakaaoga ne Iesu a mea ‵tupu i te taimi tenā ke akoako ei a tino. (Luk 13:1-5) E mafai foki ne koe o fakaaoga a mea ‵tupu i te vaitaimi tenei ke ati aka ei a te fia‵fia o tino ki te fekau o te Malo. Kafai ne faka‵sae aka ne koe a fakalavelave ki mea tau tupe, se fakalavelave o te natula, taua i koga e ‵nofo ei a tino, te umiti ki vailakau tapu, io me se mea tai ‵pau, ke ‵sili atu se fesili telā e fai ei ke mafau‵fau latou ki ei. E mafai o fesili atu koe: “E mata, e mafaufau koe me ka isi se gataga ki te . . . ?” io me “Se a tau faka‵tau, se a te faka‵leiga ki te . . . ?” Ka oti, ko fakaasi atu ei se fuaiupu mai te Tusi Tapu telā e fetaui ‵lei mo te mataupu. Kafai e fakaasi mai ne te tino te fiafia, pei atu se vitio io me se tusi mai te ‵tou Pusa o Mea Faigaluega mō Akoakoga. I te taimi e taumafai ei tatou o faka‵goto ki loto o tino i te ‵tou koga talai, ko “fai ne [tatou] a mea katoa mō te tala ‵lei.”—1Ko 9:22, 23.

Ne a mataupu e mafai o fia‵fia ki ei a tino i tau koga talai?