Ke Momea Aka ‵Tou Ata‵mai I Te Galuega Talai​—Ke Uiga Faigofie

TE POGAI E TĀUA I EI: E ‵kami ne te kau fakaekegina mo nisi mamoe a tino valevale ke “puke ki te vai o te ola e aunoa mo se ‵togi.” (Fks 22:17) A te vai fakatusa tenei e fakasino atu ki fakatokaga katoa a Ieova ne tuku mai ke faka‵saoloto i ei a tino faka‵logo mai te agasala mo te mate. Ko te mea ke mafai o fesoasoani atu ki tino mai tū mo talitonuga kese‵kese, e manakogina eiloa ke fakaasi atu ne tatou a te “tala ‵lei se-gata-mai” i te auala telā ka fakafiafia atu ki tino taki tokotasi.—Fks 14:6.

TE AUALA KE FAI I EI:

• Ke filifili aka se mataupu mo se tusi faitau telā ka otia i ei a loto o tino i tou koga talai. E mafai o fakaaoga ne koe se manatu fesoasoani mō sau‵talaga io me se suā mataupu magoi telā ko oti ne tofotofo muamua koe ki ei. Ne a mataupu mo tusi faitau ma‵goi ne masani o fakaaoga? E mata, e isi ne tala ‵fou ne pokotia ei a tino kolā e sau‵tala tatou ki ei? Se a te mataupu ka fetaui ‵lei ke sau‵tala mo se tagata io me se fafine?

• Ke aofia i au sau‵talaga a auala e fai ei au pati fakatalofa mo tū mo faifaiga masani i tou fenua.—2Ko 6:3, 4

• Ke fakamasani ki ‵tou tusi mo vitio i loto i ‵Tou Pusa o Mea Faigaluega mo Fai Akoakoga ke fakaasi atu ki te tino fiafia

• Ke ‵kopi mai a fakamatalaga e uiga ki nisi ‵gana o tino kolā ka mafai o fetaui mo koe i tou koga talai

• Ke fakamafuli tau mataupu ke fetaui mo te manakoga o te tino telā e talai atu koe ki ei. (1Ko 9:19-23) E pelā me se fakaakoakoga, ne a au pati ka fai atu māfai ko iloa aka ne koe me ne fatoa galo atu se tino pele o tino i te fale?

KE ONOONO KI TE VITIO, KA OTI KO TALI AKA EI A FESILI KONEI MAI LALO:

• Se a te mataupu ne kamata ki ei te sau‵talaga a te tino talai mo te tino i te fale?

• Se a te mea e tupu i te olaga o te tino tenā ne talai atu a ia ki ei?

• Se a te tusi faitau mai te fakasologa e fetaui tonu mo tena fakanofonofoga, kae kaia?

• E mafai pefea o fakama‵fuli ne koe au sau‵talaga ko te mea ke fetaui ‵tonu mo manakoga o tino i tou koga talai?