KE OLA E PELĀ ME NE KELISIANO
Kilo ki a Koe e Pelā mo te Kilo a Ieova
“A Ieova e fiafia ki ana tino.” (Sal 149:4) E tiga tatou e se ‵lei katoatoa, e lavea ne ia a ‵tou uiga ‵lei mo mea e mafai o fai ne tatou. I nisi taimi, e faigata ke maua se kilokiloga paleni ki a tatou eiloa. E maua ne tatou a lagonaga i a tatou e se tāua ona ko faifaiga a nisi tino ki a tatou. Io me kafai e mafau‵fau faeloa tatou ki ‵tou mea ‵se i aso ko teka, e mafai eiloa o fakalotolotolua tatou ki te alofa o Ieova ki a tatou. Ne a mea e mafai o fesoasoani mai māfai ko maua ne tatou vaegā lagonaga penā?
Masaua me lavea ne Ieova a mea kolā e se lavea ne tino. (1Sa 16:7) Ko tena uiga e lavea foki ne ia a mea kolā e se mafai o lavea ne tatou i a tatou eiloa. Kae fakafetai tatou me tuku mai i te Tusi Tapu se famalama ke lavea ne tatou te kilokiloga a Ieova. E ‵kilo tatou ki te famalama tenā e auala i te faitau ke malamalama i fuaiupu mo tala i te Tusi Tapu kolā e fakaasi mai ei te lasi o te alofa o Ieova ki ana tino tapuaki.
ONOONO KI TE VITIO FAKATALITONU ATU A TOU LOTO KI A IEOVA, KAE TALI A FESILI MAI LALO:
Se a te mea e akoako mai ne te ‵tala o te tino tele mo tena tamana e uiga ki te kilokiloga a Ieova ki a tatou?
Kafai se tino ne fai ne ia se agasala matagā kae ko gasuesue o faka‵lei tena fesokotakiga mo Ieova, e mafai pefea o fakamautinoa ne ia tena loto i mua o Ia?—1Io 3:19, 20
Ne aoga pefea ki te taina a te faitau kae mafaufau ‵loto ki tala o Tavita mo Iosefatu?