Ke Talitonu me Alofa a Ieova ki a Koe

1. Kaia ne fakaiku aka ei ne koe ke tavini atu ki a Ieova i tou olaga kātoa? (Onoono foki ki te ata.)

E MASAUA ne koe te taimi ne ˋtalo koe ki a Ieova kae fai atu me ko manako koe o tavini atu ki a ia i tou olaga kātoa? Ne fai ne koe te fakaikuga tenā me ko iloa fakaˋlei ne koe a ia kae alofa foki ki a ia. Ne tauto koe ki a ia me ka fakamuamua ne koe te faiga o tena loto i tou olaga kātoa, kae ka tumau koe i te alofa ki a ia mo tou loto kātoa, tou ola kātoa, tou mafaufau kātoa mo tou malosi kātoa. (Male. 12:30) Talu mai te taimi tenā, ne gasolo aka faeloa o malosi atu tou alofa mō ia. Tela la, se a tau tali ka fai atu ki se tino e fesili mai ki a koe penei, “E mata, e alofa tonu eiloa koe ki a Ieova?” Ka tali fakavave atu koe, “E sili atu toku alofa ki a ia i lō so se tino io me se isi mea aka!”

2-3. Se a te mea e manako a Ieova ke taliˋtonu tatou ki ei, kae ne a mea ka sauˋtala tatou ki ei i te mataupu tenei? (Ielemia 31:3)

² Kae se a tau tali ka fai atu ki se tino e fesili mai penei, “E mata, e mautinoa i a koe me alofa atu eiloa a Ieova ki a koe?” E mata, ka fakatalave koe o tali atu ona ko te mafaufau me e se ˋtau o alofa atu a Ieova ki a koe? Ne fai mai se tuagane telā ne se ˋlei tena putiakaga: “E iloa ne au me alofa au ki a Ieova. E mautinoa i a au a te mea tenā. Kae ko te mea telā e fakalotolotolua faeloa au ki ei me, e mata, e alofa mai a Ieova ki a au?” Kae e pefea eiloa a lagonaga o Ieova e uiga ki a koe?

³ E manako a Ieova ke talitonu katoatoa koe me alofa eiloa a ia ki a koe. (Faitau te Ielemia 31:3.) A te ˋtonuga loa, ko Ieova eiloa ne takitaki mai ne ia koe ki a ia. Kae i te taimi ne fakaiku aka ne koe ke tavini ki a ia i tou olaga kātoa kae papatiso, ne maua ei ne koe se mea telā e tāua ˋki—ko tena alofa fakamaoni. Ko tena uiga a ia e alofa malosi ki a koe, kae ka se mafai o tiaki ne ia koe. E fai ei ke kilo atu a ia ki ana tino tapuaki fakamaoni—e aofia ei koe—e pelā me se “kope tāua” a ia. (Mala. 3:​17, fml.) E manako a Ieova ke ˋpau ou lagonaga mo lagonaga o te apositolo ko Paulo e uiga ki te alofa o Ieova mō ia. Ne mafai o tusi mai a Paulo mo te loto talitonu penei: “E talitonu au me e se mafai ne te mate io me ko te ola io me ko agelu io me ko malo io me ko mea i te taimi nei io me ko mea ka oko mai io me ko malosi pule io me ko mea i luga io me ko mea i lalo io me ko so se mea ne faite ka mafai o ‵vae ne ia tatou kea‵tea mai te alofa o te Atua.” (Loma 8:​38, 39) I te mataupu tenei, ka sauˋtala tatou ki pogai e manakogina i ei ke fakamalosi aka te ˋtou loto taliˋtonu e uiga ki te alofa o Ieova ki a tatou, mo mea e mafai o fesoasoani mai ke fai tatou penā.

POGAI E ˋTAU EI O TALIˋTONU ME ALOFA A IEOVA KI A KOE

4. E mafai pefea o ˋteke atu tatou ki se tasi o togafiti masei a Satani?

⁴ Kafai e taliˋtonu tatou me alofa mai a Ieova ki a tatou, e mafai o ˋteke ne tatou se tasi o “togafiti maˋsei” a Satani. (Efe. 6:11) E taumafai eiloa a Satani o fai ˋtoe mea e mafai ke taofi aka ei tatou mai te tavini atu ki a Ieova. Tasi o togafiti masei e fakamalosi aka ne Satani, ko te loi me i a Ieova e se alofa mai ki a tatou. Ke mo a loa ma puli me salasala faeloa Satani ki se avanoaga ke fakaloiloi tatou. E masani o taua mai a ia ki a tatou i taimi kolā ko vāiˋvai tatou—kāti māfai ko loto mafatia tatou ona ko mea ne ˋtupu i aso mua, ona ko tulaga faigaˋta i aso nei, io me ko tulaga sē mautinoa e uiga ki aso mai mua. (Faata. 24:10) E fai eiloa a Satani e pelā me se leona telā e salasala ki se avanoaga ke taua atu ki tino kolā ko vāiˋvai. Tela la, i te taimi e fanoaˋnoa ei tatou, e taumafai a ia o fai tatou ke ˋfiu vave. Kae kafai e tumau tatou i te fakamalosi aka te ˋtou loto taliˋtonu me alofa mai eiloa a Ieova, ka toka ˋlei eiloa tatou o “ˋteke atu” ki a Satani mo ana auala faitogafiti.—1 Pe. 5:​8, 9; Iako. 4:7.

5. Kaia e tāua ei ke iloa ne tatou me alofa kae fakatāua malosi ne Ieova a koe?

⁵ Kafai e taliˋtonu tatou me alofa mai a Ieova ki a tatou, e mafai eiloa o fakapiliˋpili malosi atu tatou ki a ia. Mafaufau ki te pogai e fai atu ei tatou penā. Ne faite ne Ieova a tatou mo te manakoga ke aˋlofa kae ke alofagina ne tino. Se mea masani ke fakaasi atu ne tatou te alofa ki se tino telā ne fakaasi mai ne ia te alofa ki a tatou. Tela la, kafai ko lavea ne tatou te lasi o te alofa mo te fakatāua ne Ieova a tatou, ka momea aka foki te lasi o te ˋtou aˋlofa ki a ia. (1 Ioa. 4:19) Kae kafai ko gasolo o lasi te ˋtou aˋlofa ki a ia, ka gasolo foki o lasi tena alofa ki a tatou. E fakamatala fakaˋlei mai te Tusi Tapu penei: “Fakapilipili atu ki te Atua, kae ka fakapilipili mai a ia ki a koutou.” (Iako. 4:8) E mafai la pefea o fakamalosi aka ne tatou a te ˋtou loto taliˋtonu me alofa mai eiloa a Ieova ki a tatou?

MEA E MAFAI O FESOASOANI MAI KE TALIˋTONU KI TE ALOFA O IEOVA

6. Ko te mea ke taliˋtonu tatou me alofa mai a Ieova ki a tatou, ne a mea e mafai o ˋtalo tatou ki ei?

⁶ ˋTalo faeloa ki a Ieova ke fesoasoani atu ke malamalama koe i te pogai e alofa ei a ia ki a koe. (Luka 18:1; Loma 12:12) Kāti e manakogina ke ˋtalo atu koe ki a ia fakafia taimi i aso takitasi ke fesoasoani atu ke iloa ne koe ana lagonaga ˋtonu e uiga ki a koe. I nisi taimi, ona ko te maˋsei o ou lagonaga e uiga ki a koe eiloa ko faigata ei ke talitonu koe me alofa atu a Ieova ki a koe. Kae ke masaua me sili atu a Ieova i tou loto. (1 Ioa. 3:​19, 20) E iloa ˋlei atu ne ia koe i lō mea e iloa ne koe e uiga ki a koe; e lavea ne ia a mea kolā e se mafai o lavea ne koe. (1 Samu. 16:7; 2 Nofo 6:30) Tela la, ke mo a ma fakatamala koe o “‵ligi atu ki tua” ou lagonaga ki a ia, kae akai atu mō tena fesoasoani ke talitonu koe ki tena alofa mō koe. (Sala. 62:8) Ko galue ei koe e ˋtusa mo au ˋtalo mai te fakaaogaga o manatu konei mai lalo.

7-8. E fakamautinoa mai pefea ne tusi i te Salamo a te alofa o Ieova mō tatou?

⁷ Talitonu ki pati e fai mai ne Ieova. Ne fakaosofia ne ia a tino ne tusi ne latou a te Tusi Tapu ke fakamatala mai ne latou a mea ˋtonu e uiga ki a ia. Mafaufau ki te auala gali ne fakamatala mai ne te faisalamo ko Tavita a mea e uiga ki a Ieova. “A Ieova e pili ki a latou kolā e loto mafatia; e fakaola ne ia a latou kolā e loto vāiˋvai.” (Sala. 34:​18, fml.) Kafai ko loto vāivāi koe, kāti ka mafaufau koe me seai se tino e malamalama i ou lagonaga. Kae e tauto mai a Ieova me i taimi penā, a ia e pili eiloa ki a koe me lavea ne ia me manako malosi koe ki tena fesoasoani. Ne tusi mai a Tavita i te suā salamo, penei: “E tausi ne koe oku loimata i loto i tau fagu ne faite ki pa‵kili o manu.” (Sala. 56:8) E lavea ne Ieova māfai koe ko fanoanoa kae logoˋmae. E atafai malosi a ia ki a koe kae malamalama a ia i ou logoˋmaega. I se auala fakatusa, e tausi ne ia ou loimata e pelā eiloa me ne vai kolā e fakatāua malosi ne se tino faimalaga i loto tena fagu telā ne faite ki pakili o manu. E faiˋtau tatou i te Salamo 139:​3, penei: “E masani ˋlei koe [e Ieova] mo oku auala katoa.” E lavea ne Ieova ou auala katoa kae e saga tonu a ia ki mea ˋlei e fai ne koe. (Epe. 6:10) Kaia? Me fakatāua ne ia so se taumafaiga e fai ne koe ke fakafiafia ne koe a ia.a

⁸ E auala i tusi siki fakamafanafana i tena Muna ko te Tusi Tapu, e pelā eiloa me ko fai mai a Ieova, penei: “E manako au ke iloa ne koe a te lasi o toku alofa mo toku atafai ki a koe.” Kae pelā mo mea ko oti ne tauloto ne tatou, e manako a Satani ke taliˋtonu tatou me i a Ieova e se alofa mai ki a tatou. Tela la, kafai e fakalotolotolua koe i nisi taimi e uiga ki te alofa o Ieova mō koe, ke mānava malie kae fesili ifo, ‘Ko oi te tino ka talitonu au ki ei —ko “te tamana . . . o te loi” io me ko “te Atua o te munatonu”?’—Ioa. 8:44; Sala. 31:5.

9. Se a te fakamaoniga e tuku atu ne Ieova ki tino kolā e aˋlofa ki a ia? (Esoto 20:​5, 6)

⁹ Mafaufau e uiga ki lagonaga o Ieova ki tino kolā e aˋlofa ki a ia. Mafaufau ki pati ne fai atu ne Ieova ki a Mose mo te kau Isalaelu. (Faitau te Esoto 20:​5, 6.) Ne tauto atu a Ieova me ka tumau a ia i te fakaasi atu te alofa fakamaoni ki tino kolā e aˋlofa ki a ia. E fakamaoni mai i pati konā me i te ˋtou Atua fakamaoni ka alofa eiloa ki ana tino tapuaki kolā e aˋlofa ki a ia. (Nee. 1:5) Tela la, kafai e manako koe ke fakamautinoa aka me alofa atu a Ieova ki a koe, ke mānava malie kae fesili ifo penei, ‘E mata, e alofa au ki a Ieova?’ Ko mafaufau ei ki te mea tenei: Kafai e alofa koe ki a ia kae fai ˋtoe mea e mafai ke fakafiafia a ia, ko fakamautinoa mai i te mea tenā me alofa malosi a ia ki a koe. (Tani. 9:4; 1 Koli. 8:3) Ko tena uiga, kafai e mautinoa i a koe me alofa koe ki a Ieova, kaia e fakalotolotolua ei koe ki tena alofa mō koe? E mafai eiloa o talitonu katoatoa koe me ka alofa faeloa a ia ki a koe kae e se mafai o tiaki ne ia koe.

10-11. Se a te mea e manako a Ieova ke masaua ne koe e uiga ki te togiola? (Kalatia 2:20)

¹⁰ Mafaufau ˋloto e uiga ki te togiola. A te taulaga togiola a Iesu Keliso ko te ˋtoe meaalofa sili a Ieova ki tino. (Ioa. 3:16) Kae e mata, e fai a te mea tenā e pelā me se meaalofa totino ki a koe? Ao! Mafaufau ki te tala o te aposiotolo ko Paulo. Masaua la, me ne fai ne ia a agasala matagā e uke a koi tuai o fai mo fai se Kelisiano, kae mai tua ifo, ne ˋtau o tumau a ia i te taua atu ki ana vāivāiga. (Loma 7:​24, 25; 1 Timo. 1:​12-14) Kae ne kamata o kilo atu a ia ki te togiola e pelā me se meaalofa totino mai i a Ieova ki a ia. (Faitau te Kalatia 2:20.) Ke masaua me ne fakaosofia ne Ieova a Paulo ke tusi ne ia a pati konā. Kae ko mea katoa i te Tusi Tapu ne tusi ki lalo ke akoako i ei tatou. (Loma 15:4) E fakaasi mai i pati a Paulo ke kilo atu koe ki te togiola, e pelā me se meaalofa totino a Ia ki a koe. Kafai e penā loa tau kilokiloga ki te togiola, ko fakamalosi aka ne koe a tou loto talitonu me e alofa eiloa a Ieova ki a koe.

¹¹ E fakafetai tatou ki a Ieova ona ko te ugamaiga ne ia a Iesu ki te lalolagi ke mate mō tatou. Kae ko te suā pogai ne vau ei a Iesu ki te lalolagi, ke fakailoa atu ki nisi tino a te munatonu e uiga ki te Atua. (Ioa. 18:37) E aofia i te munatonu tenā a lagonaga o Ieova e uiga ki ana tamaˋliki.

NE FESOASOANI MAI A IESU KE TALIˋTONU KI TE ALOFA O IEOVA MŌ TATOU

12. Kaia e mafai ei o taliˋtonu tatou ki fakamatalaga a Iesu e uiga ki a Ieova?

¹² I tena nofoga i te lalolagi, ne fiafia a Iesu o fakaasi mai ne ia me ko Ieova se vaegā tino pefea. (Luka 10:22) E uke ˋki a pogai e ˋtau ei o taliˋtonu tatou ki fakamatalaga ne fai mai ne Iesu e uiga ki a Ieova, me ko Iesu fua ne ˋnofo fakatasi mo Ieova i te lagi i se fia piliona tausaga mai mua o vau ki te lalolagi. (Ko. 1:15) Mai i mea ne lavea ˋtonu ne ia ki ana mata, ne iloa ei ne Iesu a te lasi o te alofa o Ieova ki ana tamaˋliki fakamaoni. E fesoasoani atu pefea a Iesu ki nisi tino ke taliˋtonu ki te alofa o te Atua mō latou?

13. Se a te mea e manako a Iesu ke malamalama tatou i ei e uiga ki a Ieova?

¹³ E manako a Iesu ke ˋkilo atu tatou ki a Ieova e pelā mo te auala e kilo atu a ia ki ei. I tusi Evagelia, ne fakasino atu a Iesu ki a Ieova e pelā me ko te “Tamana” i taimi e silia atu mo te 160. Kae kafai e faipati atu ki ana soko, e fakaaoga ne ia a tugapati e pelā mo “te otou Tamana” io me “te otou Tamana telā i te lagi.” (Mata. 5:16; 6:26) Mai mua o vau a Iesu ki te lalolagi, ne taku sāle a Ieova ne ana tavini fakamaoni e pelā me e ‘Malosi Katoatoa,’ ‘te Tino Tafasili i te Maluga,’ ‘te Mafuaga Sili,’ mo nisi tofi tai ˋpau penā, kae ne masani a Iesu o taku ne ia a Ieova me ko te ‘ˋtou Tamana.’ E fakaasi mai i te tugapati tenā, me e manako a Ieova ko ana tavini ke ˋpili malosi atu ki a ia e pelā eiloa mo te tamaliki telā e pili malosi ki tena tamana alofa. E manino ˋlei me manako a Iesu ke ˋkilo atu tatou ki a Ieova e pelā mo ia, se Tamana alofa telā e pele ki a Ia ana tamaˋliki. Ke iloilo nei ne tatou a nisi fakaakoakoga e lua ne fakaaoga ei ne Iesu a te pati “Tamana.”

14. Ne fakaasi mai pefea ne Iesu me e fakatāua malosi tatou ne te ˋtou Tamana i te lagi? (Mataio 10:​29-31) (Onoono foki ki te ata.)

¹⁴ Muamua la, ke onoono tatou ki pati a Iesu i te Mataio 10:​29-31. (Faitau.) A manu eva foˋliki e se mafai eiloa o aˋlofa io me tapuaki ki a Ieova. Kae ko te ˋtou Tamana e fakatāua ne ia a manu foˋliki konei me iloa ne ia māfai ko tō se manu e tasi ki te laukele. Kae pefea la te tāua atu mo te atafai o ia ki tino tapuaki fakamaoni kolā e tavini atu ki a ia ona ko te alofa! Ne fai mai foki a Iesu me iloa ne te ˋtou tamana a te aofaki o laulu i ulu o tatou taki tokotasi. Ona ko te mea e iloa ne Ieova a mea folikiˋliki e uiga ki a tatou, e mafai eiloa o mautinoa fakaˋlei i a tatou me e alofa malosi a ia ki a tatou. E manino ˋlei me manako eiloa a Iesu ke taliˋtonu tatou me e tāua eiloa tatou i te kilokiloga a te ˋtou Tamana i te lagi.

15. Ne a mea e fakaasi mai i pati a Iesu i te Ioane 6:44 e uiga ki tou Tamana i te lagi?

¹⁵ Ke onoono ki te lua o fakaakoakoga e uiga ki te fakaaogaga ne Iesu a te pati “Tamana.” (Faitau te Ioane 6:44.) Ne fesoasoani atu a tou Tamana faka-te-lagi ki a koe ke iloa fakaˋlei ne koe a ia kae ke alofa foki ki a ia. Kaia ne fai ei ne ia te mea tenei? Me ne lavea ne ia a uiga ˋlei i loto i a koe. (Galu. 13:48) I te taimi ne fai atu ne Iesu a pati i te Ioane 6:​44, kāti ne fakasino atu a ia ki pati a Ieova kolā e maua i te Ielemia 31:3. I konā ne fai atu a Ieova ki ana tino, penei: “Ne fakapilipili mai ei ne au koe ki a au mo te alofa fakamaoni [io me, ne fakaasi atu faeloa te alofa fakamaoni ki a koe].” (Iele. 31:3; fml.; fakatusa ki te Hosea 11:4.) Mafaufau la ki te uiga o pati konā. E lavea faeloa ne te ˋtou Tamana i te lagi a mea ˋlei i loto i a koe kolā e se lavea ne koe i a koe eiloa.

16. (a) Se a te mea ne akoako mai ne Iesu, kae kaia e ˋtau ei o taliˋtonu tatou ki a ia? (e) E fakamalosi aka pefea ne koe a tou loto talitonu me i a Ieova ko te ˋtoe Tamana ˋlei eiloa mō koe? (Onoono ki te pokisi “Te Tamana e Maˋnako Tatou Katoa ki ei.”)

¹⁶ I tena fakamatalaga me i a Ieova ko te ˋtou Tamana, e pelā loa me ko fai mai a Iesu ki a tatou: “A Ieova e se ko toku Tamana fua; a ia ko te otou Tamana foki. Kae e fai ˋtonu atu au me e alofa a ia ki a koutou kae atafai malosi ki a koutou taki tokotasi.” Tela la, kafai e fakalotolotolua koe e uiga ki te alofa o Ieova ki a koe, ke mānava kae fesili ifo penei, ‘E a, ka se talitonu eiloa au ki pati a te Tama telā e iloa ˋlei ne ia a te Tamana kae faipati faeloa ki te munatonu?’—1 Pe. 2:22.

FAKAMALOSI FAELOA TOU LOTO TALITONU KI TE ALOFA O IEOVA

17. Kaia e ˋtau ei o tumau tatou i te fakamalosi aka te ˋtou loto taliˋtonu ki te alofa o Ieova mō tatou?

¹⁷ E ˋtau o tumau tatou i te fakamalosi aka te ˋtou loto taliˋtonu ki te alofa o Ieova mō tatou. E pelā mo mea ko oti ne tauloto ne tatou, e fai faeloa ne Satani a te ˋtoe mea e mafai o fai ke taofi aka te ˋtou taviniga ki a Ieova. I ana taumafaiga ke fakavāivāi tatou, e taumafai faeloa a Satani o fai ne ia tatou ke taliˋtonu me e se alofa mai te Atua ki a tatou. Ke mo a eiloa e talia ne tatou ke manumalo a Satani!—Iopu 27:5.

18. E fakamalosi aka pefea ne koe a tou loto talitonu ki te alofa o Ieova mō koe?

¹⁸ Ko te mea ke fakamalosi aka tou loto talitonu ki te alofa o Ieova mō koe, tumau i te ˋtalo ke fesoasoani atu ke lavea ne koe a uiga ˋgali kolā e lavea ne ia i a koe. Mafaufau ˋloto ki fakamatalaga a tino kolā ne tusi ne latou a te Tusi Tapu e uiga ki tena alofa. Mafaufau foki ki ana lagonaga e uiga ki tino kolā e aˋlofa ki a ia. E alofa faeloa a ia ki tino kolā e fakaasi atu ne latou a te alofa ki a ia. Ke mafaufau ˋloto ki pogai e ˋtau ei o kilo atu koe ki te togiola e pelā me se meaalofa totino ne tuku atu ki a koe. Kae talitonu ki pati a Iesu ne fai mai me i a Ieova ko tou Tamana faka-te-lagi. Kae kafai e fesili atu se tino: “E mata, e talitonu katoatoa koe me alofa atu a Ieova ki a koe?” ka tali atu eiloa koe mo te mautinoa penei: “Ao, e alofa mai a ia ki a au! Kae e fai ne au te ˋtoe mea e mafai o fai ne au i aso takitasi ke fakaasi atu ne au toku alofa ki a ia!”