A te Alofa mo te Loto Fakafetai ki a Ieova e Iku Atu ki te Papatisoga

1-2. E pelā mo te mea ne fakaasi mai i te Galuega 8:27-31, 35-38, se a te mea ne fakamalosi aka ei te eunuka Aitiope ke papatiso?

E MATA, a koe e manako o papatiso e pelā me se soko o Keliso? Ne fakamalosi aka ne te alofa mo te loto fakafetai a tino e tokouke ke fai ne latou a te filifiliga tenā. Mafaufau ki te fakaakoakoga a se ofisa telā ne tavini atu ki te tupu fafine Aitiope.

² Ne gasuesue fakavave te Aitiope ona ko mea ne tauloto ne ia mai te Tusi Tapu. (Faitau te Galuega 8:27-31, 35-38.) Se a te mea ne fakamalosi ne ia tou tagata? E manino ‵lei me ne fakatāua ne ia te Muna a te Atua; ne faitau ne ia se fuaiupu mai te tusi o Isaia i te taimi ne tele atu ei a ia i luga i se kaliota. Kae i tena fai‵patiga mo Filipo, ne ati aka ne ia te loto fakafetai mō mea ne fai ne Iesu mō ia. Kae kaia ne faimalaga atu ei te ofisa tenei ki Ielusalema? Me ko oti ne ati aka ne ia te alofa ki a Ieova. E iloa pefea ne tatou? Ne fatoa tapuaki atu a ia ki a Ieova i Ielusalema. E mautinoa eiloa me ko oti ne tiakina ne te tagata tenei a te talitonuga telā ne puti aka ei a ia kae ko kau atu a ia ki te fenua fua e tasi telā ko oti ne tukugina atu ki te Atua tonu. Ko te alofa foki loa tenei ki a Ieova ne fakamalosi ne ia tou tagata ke kausaki atu ki te suā lasaga tāua, telā ko te papatisoga kae ke fai mo soko o Keliso.—Mata. 28:19.

3. Ne a mea e mafai o taofi ei se tino mai te papatiso? (Ke onoono ki te pokisi “Ne a Mea i Tou Loto?”)

³ Ko te alofa ki a Ieova e mafai o fakamalosi ne ia koe ke papatiso. Kae e mafai foki ne te alofa o taofi ne ia koe mai te fai penā. I te auala fea? Ke onoono ki nisi fakaakoakoga. Kāti koe alofa malosi ki ou kāiga mo taugasoa sē tali‵tonu, kae kāti ka manavase koe me kafai koe ko papatiso, ka takalia‵lia latou ki a koe. (Mata. 10:37) Io me e mafai o fiafia koe ki amioga kolā e takalialia ki ei te Atua, kae ko faigata ke fakagata aka ne koe a amioga konā. (Sala. 97:10) Io me kāti ko matua loa koe mo te fakamanatuga o tuu kolā e isi ne olotou sokoga ki lotu ‵se. Kāti e isi ne mea ‵gali i fakamanatuga konā e se mafai o fakapuli atu ne koe. Ona ko mea konā, ko mafai o faigata ki a koe ke fakagata aka a te fakamanatuga o tuu masani kolā e se fiafia ki ei a Ieova. (1 Koli. 10:20, 21) Ko sae aka ei te fesili, “Se a io me ko oi e alofa malosi au ki ei?”

TE ‵TOE ALOFA TĀUA

4. Se a te fakamalosiga tāua telā ka ‵taki ne ia koe ke papatiso?

⁴ E mafai o uke a mea ‵lei e fiafia kae loto fakafetai koe ki ei. Pelā me se fakaakoakoga, mai mua o suke‵suke mo Molimau a Ieova, kāti ko oti ne ati aka ne koe te āva ki te Tusi Tapu. Kae kāti ko oti foki ne ati aka ne koe te alofa ki a Iesu. Nei la ko iloa ne koe a Molimau a Ieova, e mafai loa o fiafia koe ke ‵kau fakatasi mo latou. Kae ko te fiafia ki mea ‵gali konā ka sē fai ei ke manako koe o tuku atu a koe eiloa ki a Ieova kae papatiso. A te fakamalosiga tāua telā ka ‵taki ne ia koe ki te papatisoga, ko te alofa o koe ki a Ieova te Atua. Kafai e sili atu tou alofa ki a Ieova i lō so se isi mea aka, ka se taofi aka ne so se mea io me ko so se tino a koe mai te tavini atu ki a ia. E mafai o kilo atu koe ki te alofa ki a Ieova e pelā me ko te mataloa ki te papatisoga mo te auala telā ka fesoasoani atu ke tumau koe i te tavini atu ki te Atua.

5. Ne a fesili ka sau‵tala tatou ki ei?

⁵ Ne fai mai a Iesu me e ‵tau mo tatou o a‵lofa ki a Ieova mo ‵tou loto kātoa, ‵tou ola, ‵tou mafaufau, mo ‵tou malosi kātoa. (Male. 12:30) E mafai pefea o tauloto tatou ke a‵lofa kae āva malosi ki a Ieova? A te mafaufau ‵loto ki te alofa o Ieova mō tatou, ka fesoasoani mai ke a‵lofa tatou ki a ia. (1 Ioa. 4:19) Ne a nisi lagonaga mo faifaiga e mafai o ‵sae aka māfai ko oti ne ati aka ne koe a te ‵toe alofa tāua tenā?b

6. E ‵tusa mo te Loma 1:20, se a te auala e tasi e mafai o tauloto koe e uiga ki a Ieova?

⁶ Tauloto e uiga ki a Ieova e auala i ana mea ne faite. (Faitau te Loma 1:20; Faka. 4:11) Mafaufau ‵loto ki te poto telā e lavea faka‵lei atu i te auala ne faite ei a lakau mo manu. Tauloto malielie e uiga ki te auala fakaofoofogia ne faite ei tou foitino. (Sala. 139:14) Kae mafaufau e uiga ki te malosi ne tuku atu ne Ieova ki te ‵tou la, se tasi mai te fia piliona o fetū.c (Isa. 40:26) Kafai e fai koe penā, ka gasolo aka eiloa o āva malosi koe ki a Ieova. Kae ko te iloa atu me i a Ieova e poto kae malosi, se vaega fua e tasi telā e fakavae ki ei a tou fesokotakiga mo ia. Ke ati aka te alofa malosi ki a Ieova, e ‵tau o iloa ne koe a mea e uke atu e uiga ki a ia.

7. Ke ‵poko tou alofa ki a Ieova, ne a mea e ‵tau o talitonu katoatoa koe ki ei?

⁷ E ‵tau o talitonu katoatoa koe me i a Ieova e atafai atu ki a koe. E mata, se mea faigata ke talitonu me e iloa ne te Mafuaga o te lagi mo te lalolagi i a koe e ola kae ko ia e atafai atu ki a koe? Kafai e penā loa, masaua i a Ieova e se “‵mao mai i a tatou taki tokotasi.” (Galu. 17:26-28) E “sukesuke ne ia a loto katoa,” kae tauto atu a ia ki a koe, e pelā mo pati a Tavita ki a Solomona me “kafai e ‵sala koe ki a ia, ka maua eiloa ne koe a ia.” (1 Nofo. 28:9) A te ‵tonuga loa, a te pogai e sukesuke nei koe ki te Tusi Tapu, me e fai mai eiloa a Ieova, “Ne fakapilipili mai ne au koe ki a au.” (Iele. 31:3) Ko te lasi o tou loto fakafetai ki mea ne fai ne Ieova mō koe, ko te ‵poko foki o tou alofa mō ia.

8. E mafai pefea o fakaasi atu ne koe te loto fakafetai ki te alofa o Ieova?

⁸ Tasi o auala ke fakaasi atu te loto fakafetai ki te alofa o Ieova, ko te faipati atu ki a ia i ‵talo. Ka gasolo aka eiloa o lasi tou alofa ki te Atua māfai ko fai atu ne koe ki a ia ou manavasega kae fakafetai atu mō mea ne fai ne ia mō koe. Kae ko te va fakataugasoa o koe mo Ieova ka malosi māfai ko iloa ne koe te auala e tali mai ne ia au ‵talo. (Sala. 116:1) Ka talitonu koe me e malamalama a ia i a koe. Kae ke fakapilipili malosi atu ki a Ieova, e ‵tau o malamalama ‵lei koe i ana mafaufauga. Kae e ‵tau o iloa ne koe a mea e manako a ia ke fai ne koe. A te auala fua e tasi ke maua ne koe te iloaga tenā, ko te sukesuke ki tena Muna ko te Tusi Tapu.

9. I auala fea e fakaasi atu ne koe me e fakatāua ne koe a te Tusi Tapu?

⁹ Ke iloa o fakatāua te Muna a te Atua ko te Tusi Tapu. E maua fua i te Tusi Tapu a te munatonu e uiga ki a Ieova mo tena fuafuaga mō koe. E fakaasi atu ne koe a tou loto fakafetai ki te Tusi Tapu mai te faitau ki ei i aso takitasi, fakatoka ki au sukesukega totino ki te Tusi Tapu, kae fakagalue a mea e tauloto ne koe. (Sala. 119:97, 99; Ioa. 17:17) E mata, e isi sau polokalame ki te faitauga ki te Tusi Tapu? E mata, e tautali koe ki te polokalame tenā, mai te fakamautinoa aka me e faitau koe ki te Tusi Tapu i aso takitasi?

10. Se a te mea e tasi e tu ‵kese ei te Tusi Tapu?

¹⁰ Tasi o mea e tu ‵kese ei te Tusi Tapu, me e aofia i ei a fakamatalaga a tino kolā ne lavea ne latou a mea ne fai ne Iesu. Ko ia fua te tusi telā e fakamatala mai ne ia a mea ‵tonu kolā ne fai ne Iesu mō koe. Kafai e tauloto koe ki pati mo mea ne fai ne Iesu, ka manako eiloa koe o ati aka se va fakataugasoa ‵lei mo ia.

11. E mafai pefea o tauloto koe ke alofa ki a Ieova?

¹¹ Tauloto ke alofa ki a Iesu, kae ka gasolo aka eiloa o lasi tou alofa mō Ieova. Kaia? Me e fakaata mai ne Iesu a uiga ‵lei katoatoa o tena Tamana. (Ioa. 14:9) Tela la, ko te uke o au mea e tauloto e uiga ki a Iesu, ko te lasi foki o tou malamalama mo tou loto fakafetai ki a Ieova. Mafaufau la ki te atafai ne fakaasi atu ne Iesu ki a latou kolā e ‵kilo fatauva ki ei a nisi tino—tino ma‵tiva, tino ma‵saki, mo tino vāi‵vai. Mafaufau foki la ki manatu fesoasoani aoga e tuku mai ne ia mo te auala e momea aka ei te ‵lei o tou olaga māfai e fakalogo koe ki a ia.—Mata. 5:1-11; 7:24-27.

12. I te taimi e tauloto ei koe e uiga ki a Iesu, ne a mea e mafai o fakamalosi atu ke fai ne koe?

¹² E mautinoa eiloa me ka gasolo o malosi tou alofa ki a Iesu māfai ko mafaufau ‵loto koe ki te taulaga ne tuku mai ne ia ke mafai o fakamagalo ei ‵tou agasala. (Mata. 20:28) Kafai e malamalama koe i te loto fiafia o Iesu ke mate mō koe, ka gasuesue eiloa koe o fakaasi atu te salamō tonu kae ‵sala atu ki te fakamagaloga a Ieova. (Galu. 3:19, 20; 1 Ioa. 1:9) Kae ko te lasi o tou alofa ki a Iesu mo Ieova, ko te lasi foki o tou manakoga ke fakapilipili atu ki nisi tino kolā e a‵lofa foki ki a lāua.

13. Se a te mea ne tuku mai ne Ieova ki a koe?

¹³ Tauloto ke alofa ki te kāiga o Ieova. A ou kāiga mo taugasoa sē tali‵tonu e mafai o se malamalama i te pogai e manako ei koe o tuku atu a koe eiloa ki a Ieova. E mafai foki o ‵teke atu latou ki a koe. Ka fesoasoani atu a Ieova ki a koe e auala i tena kāiga faka-te-agaga. Kafai e fakapilipili koe ki te kāiga faka-te-agaga tenā, ka lavea ne koe te alofa mo te fesoasoani telā e manakogina ne koe. (Male. 10:29, 30; Epe. 10:24, 25) Fakamuli loa, e mafai loa o ‵kau atu ou kāiga ki a koe i te taviniga ki a Ieova kae ola e ‵tusa mo ana tulaga.—1 Pe. 2:12.

14. E pelā mo te mea fakasae mai i te 1 Ioane 5:3, ne a mea ko iloa ne koe e uiga ki tulafono a Ieova?

¹⁴ Tauloto ke fakatāua kae fakagalue a tulafono a Ieova. A koi tuai o iloa ne koe a Ieova, kāti ne fai loa ne koe a fakaikuga kolā e mafaufau koe me e ‵lei, kae nei ko lavea ne koe me e ‵lei fakafia atu a tulafono a Ieova. (Sala. 1:1-3; faitau te 1 Ioane 5:3.) Mafaufau ki pati fakatonutonu mai te Tusi Tapu mō tāgata a‵vaga, fāfine a‵vaga, mātua mo tama‵liki. (Efe. 5:22–6:4) Kafai e fakagalue ne koe a pati fakatonutonu konā mai te Tusi Tapu, e mata, ka lavea ne koe te fia‵fia o tou kāiga? I te taimi e fakalogo ei koe ki fakatonuga a Ieova e uiga ki te filifiliga o taugasoa i se auala poto, e mata, ka momea aka ei te ‵lei o au amioga? E mata, ko gasolo o lasi atu nei tou fiafia? (Faata. 13:20; 1 Koli. 15:33) E mautinoa eiloa me i te tali ki fesili konā ko te ao.

15. Ne a mea e mafai ne koe o fai māfai e manakogina ne koe se fesoasoani ke fakagalue aka a fakatakitakiga mai te Tusi Tapu?

¹⁵ I nisi taimi, kāti e faigata ki a koe ke iloa te auala ke fakagalue aka a fakatakitakiga i te Tusi Tapu kolā e tauloto ne koe. Tenā te pogai e fakaaoga ei ne Ieova tena fakapotopotoga ke maua ne koe a tusi kolā e fakavae olotou fakamatalaga ki te Tusi Tapu, kolā e mafai o fesoasoani atu ke iloa ne koe te mea tonu mai te mea ‵se. (Epe. 5:13, 14) Kafai e faitau kae sukesuke koe ki ei, ka lavea ne koe te aoga mo te ‵tonu o mea konā, kae ka manako koe o fakapilipili atu ki te fakapotopotoga a Ieova.

16. I te auala fea ne fakatoka ne Ieova ana tino?

¹⁶ Tauloto ke alofa kae ‵lago atu ki te fakapotopotoga a Ieova. Ko oti ne fakatoka ne Ieova ana tino ki fakapotopotoga; a tena Tama ko Iesu, ko te ulu o fakapotopotoga katoa. (Efe. 1:22; 5:23) Ko oti ne ‵tofi aka ne Iesu se potukau foliki o taina fakaekegina ke fai ne latou te takitakiga i te fakatokaga o te galuega telā e manako a ia ke fai i aso nei. Ne fakasino atu a Iesu ki te potukau tenei o tāgata e pelā me ko “te tavini fakamaoni kae poto,” kae e fakatāua ne latou a te lotou tiute ke fagai kae puipui koe i te feitu faka-te-agaga. (Mata. 24:45-47) Tasi o auala e fesoasoani mai ei te tavini fakamaoni, ko te fakamautinoa aka me ko oti ne filifili aka a toeaina kolā e fetaui ‵lei ke tausi atu ki a koe. (Isa. 32:1, 2; Epe. 13:17; 1 Pe. 5:2, 3) E loto fia‵fia a toeaina o fai te ‵toe mea e mafai o fai mō koe, fakamafanafana koe kae fesoasoani atu ke pili malosi koe ki a Ieova. Kae ko te ‵toe mea tāua e mafai ne latou o fai mō koe, ko te fesoasoani atu ke akoako ne koe a nisi tino e uiga ki a Ieova.—Efe. 4:11-13.

17. E ‵tusa mo te Loma 10:10, 13, 14, kaia e fai‵pati ei tatou ki nisi tino e uiga ki a Ieova?

¹⁷ Fesoasoani atu ki nisi tino ke tauloto ke a‵lofa ki a Ieova. Ne fai atu a Iesu ki ana soko ke akoako a nisi tino e uiga ki a Ieova. (Mata. 28:19, 20) Se mea ‵tau eiloa ke faka‵logo tatou ki te fakatonuga tenā. Kae kafai ko gasolo aka o lasi tou alofa mō Ieova, ka ‵pau eiloa ou lagonaga mo te apositolo ko Petelu mo Ioane, kolā ne fai mai, penei: “E se mafai eiloa o fakagata te mā fai‵pati ki mea ko oti ne lavea kae lagona ne māua.” (Galu. 4:20) E aofia i nāi mea kolā e fai ei ke fia‵fia tatou, ko te fesoasoani atu ki se tino ke alofa ki a Ieova. Mafaufau aka la ki te lasi o te fiafia o te tino talai ko Filipo i te taimi ne fesoasoani atu a ia ki te tagata Aitiope ke tauloto ki te munatonu i te Tusi Tapu kae papatiso! Kafai e fakaakoako koe ki a Filipo kae fakalogo ki te fakatonuga a Iesu ke talai, e fakatalitonu atu ne koe me i a koe ko manako ke fai mo Molimau a Ieova. (Faitau te Loma 10:10, 13, 14.) I te faiga tenā, ka mautinoa eiloa me ka ‵sili mai ne koe a te fesili telā ne ‵sili atu foki ne te tagata Aitiope: “E isi se pogai e se ‵tau ei au o papatiso?”—Galu. 8:36.

18. Ne a mea ka sau‵tala tatou ki ei i te suā mataupu?

¹⁸ Ka fai eiloa ne koe te ‵toe fakaikuga tāua i tou olaga māfai ko papatiso koe. Ona ko te mea se fakaikuga tāua, e ‵tau eiloa o mafaufau faka‵lei koe ki mea e aofia i ei. Se a te mea e ‵tau o iloa ne koe e uiga ki te papatisoga? Ne a mea e ‵tau o fai ne koe mai mua penā foki māfai ko oti koe ne papatiso? Ka tali aka a fesili konā i te suā mataupu.